Tshilejilu tshia Bobumua mu Yezu Kilisto

Kudi Mulombodi Mukulu Russell M. Nelson

Mulombodi Mukulu wa Ekelezia wa Yezu Kilisto wa Bansantu ba Matuku a Ndekelu

Patudi bikala mu bobumua mu Yezu Kilisto bu bantu ba mu 4 Nefi, dijinga dietu dia kuikala bamua didi dipita mashilangana etu ne ditulombola ku disanka.

Tudi mu tshikondu tshidi dipangilangana ne dikokangana bikala bitangalaka mu buloba. Diambuluisha kudi technologie ne busonsodi bua kudi bantu badi ne mitshima miteketa, makola a ditapuluka â adi akeba kûja mioyo yetu ne kapeji ne kunyanga miyuki yetu ne makokangana. Malanda a mu nsombelu adi akoseka. Mvita idi itua ntangatshibua.

Mu mushindu ewu, balondi balelela ba Yezu Kilisto badi bakeba ditalala ne badienzeja bua kuibaka musoku wa mushilangana—ewu udi muikala mushindamena pa malongesha a Yezu Kilisto. Bua bualu ebu, Mukalenga mmutupesha bujitu bua kuikala bamua; ne nuenu kanuyi bamua kanuena banyi to (Dilongesha ne Bipungidi 38:27). Bushuwa, bobumua budi ngikadilu wa Ekelezia mulelela wa Yezu Kilisto.

Mushindu kayi utudi mua kuluangana ne makola a ditapulula ne makokangana? Mushindu kayi utudi mua kufika ku bobumua?

Diakalenga, 4 Nefi mu Mukanda wa Molomo udi utupesha tshilejilu. Shapita ewu udi ulonda mu tshikosu mushindu uvua bantu basomba panyima pa Mupandishi mubakumbula, mubalongesha, ne mushikika Ekelezia wenda munkatshi muabu. Mulubu ewu udi uleja mushindu udi bantu aba bafika ku bobumua bua disanka ne bua ditalala, ne udi utupesha tshilejilu tshitudi mua kulonda bua tuetu kufika bietu ku bobumua bua nunku.

Dikudimuna moyo

Mu 4 Nefi 1:1, tudi tubala: “Bayidi ba Yezu bakenza Ekelezia wa Kilisto mu bulaba bonsu ku mpenga yonsu. Ne [bantu] bakalua kudibu, ne bakakudimuna mutshima ku mibi yabu bulelela.”

Tudi tushala mu bobumua banyunguluka Mukalenga ne Mupandishi Yezu Kilisto. Padi muntu yonsu ulonga pa Yezu Kilisto, Lumu luimpa luenda ne Ekelezia wenda, Nyuma wa Tshijila neajadika bua bulelela mu moyo wa muntu yonsu. Yonsu wa kutudi udi mua kuitaba dibikila dia Mupandishi bua kuikala ne ditabuija mu Yeya ne kumulonda ku dikudimuna mutshima.

Nanku kimudi luendu lua muntu lua dikudimuna moyo lubanga—ushala ntanta ne majinga enda a tshilema ne a mibi ne utangila kudi Mupandishi. Udi tshishimikidi tshia ditabuija dietu. Ne bu mudi yonsu wa kutudi utangila kudiye mu meji onsu (tangila Dilongesha ne Bipungidi 6:36), Udi ulua bukola bua bobumua mu mioyo yetu.

Bipungidi

Mulubu mu 4 Nefi udi utungunuka wamba ne aba bakalua ku Ekelezia ne bakakudimuna mitshima bua mibi yabu “bakatambuishibua mu dîna dia Yezu; ne bakapeta kabidi Nyuma wa Tshijila” (4 Nefi 1:1). Bavua babuela mu tshipungidi—malanda a pabuawu, a disuikakana—ne Nzambi.

Patudi tuenza ne tulama bipungidi, tudi tuangata dîna dia Mukalenga pa mutu petu bu bantu. Mu dikumbaja, tudi tuangata dîna dienda pa mutu petu bu tshisamba. Bonsu badi benza bipungidi ne baditatshisha bua kubilama badi balua tshisamba tshia Mukalenga, bubanji buenda bua pabuabu (tangila Ekesode 19:5). Nanku, tudi mu luendu mu njila wa tshipungidi muntu nkaya anyi mu musumba. Malanda etu a tshipungidi ne Nzambi adi atupesha kipatshila kamua ne dimanyika dimua. Bu mutudi tudisuika kudi Mukalenga, udi utuambuluisha bua kuikala ne “ mitshima yetu misuikakaja pamua mu bobumua ne mu dinanga dia muntu bua mukuenda” (Mosiya 18:21).

Bujalama, Dipetangana, ne Kuambuluisha Bapela

Mulubu mu 4 Nefi udi utungunuka: “Kakuvua makokangana anyi matandu munkatshi muabu to, ne bantu bonsu bakasomba mu bululama muntu ne mukuenda.

“Ne bavua basangisha bintu biabu bionsu pamua; bua nanku kakuvua mubanji ne mupela, mupika ne mudikadila to, kadi bakavuijibua bonsu badikadila, ne bapetshi ba dipa dia mu diûlu” (4 Nefi 1:2–3).

Mu malanda etu a mubidi, Mukalenga mmusua bua tuikala bajalama mu dienza malu ne bakuabu, kumbusha dishimangana anyi dimuenena bakuabu (tangila 1 Tesalonike 4:6). Patudi tusemena kudi Mukalenga, “katuakuikala ne meji a kuenzelangana bibi, kadi a kusomba talala, ne a kupesha muntu yonsu tshintu tshienda” (Mosiya 4:13).

Mukalenga wakatupesha kabidi mukenji wa kuambuluisha mupela ne mukengi. Tuvua ne tshia “kufila bintu [bietu]” bua kubambuluisha, bilondeshila bukola buetu bua kutshienza, kakuyi dibalumbuluisha (tangila Mosiya 4:21–27).

Yonsu wa kutudi udi ne bua kumona mukuenda bu mudiyi (Dilongesha ne Bipungidi 38:24). Patudi basua kuikala tshisamba tshia Mukalenga ne bikala mu bobumua, kabiyi anu mudimona umua ne mukuabu momumua, kadi tudi ne bua kudimona bamua ne banga momumua ne kudiumvua mu mioyo yetu ne tudi momumua—momumua kumpala kua Nzambi, mushinga wa momumua ne buikadi bua momumua.

Ditumikila

Dilongesha didi dilonda mu 4 Nefi didi difuma ku tshiambilu tshikesa: “bavua benda bilondeshila ku mikenji yakapetabu kudi Mukalenga wabu ne Nzambi wabu” (4 Nefi 1:12).

Mukalenga wakalongesha bantu aba Dilongesha dienda, wakabapesha mikenji, ne wakabikila basadidi bua kubalama. Kamua ka ku tuipatshila tuenda mu dienza dia etshi kavua ka kutuishibua ne kakuakuikala makokangana munkatshi muabu (tangila 3 Nefi 11:28–29; 18:34).

Ditumikila dietu ku malongesha a Mukalenga ne ku basadidi benda didi ne mushinga ku bobumua buetu bualua. Tshidi tshiangata didifila dietu bua kutumikila mukenji bua kukudimuna mutshina nansha tuetu bapona ne kuambuluishangana patudi tuditatshisha bua kuenza bimpa ne kuikala bimpa dituku dionsu.

Dituilangana Pamua

Pashisha, tudi tulonga ne bantu ba mu 4 Nefi “[bakatungunuka] mu dijila ne disambila, ne mu dituilangana pamua misangu mivula bua kusambila ne bua kumvua dîyi dia Mukalenga” (4 Nefi 1:12).

Tudi tujinga bua kutuilangana pamua. Bisangilu bietu bia ku lumingu bidi bikala tshipolu tshia mushinga buetu bua tupeta bukola, ku muntu ne ku musumba. Tudi tuangata biakudia bia tshijila, tulonga, tusambila, tuimba, ne tukuatshishangana. Bisangilu bikuabu bidi biambuluisha kabidi bua kuvudija ngumvuilu wa buikadi, wa bulunda, ne wa kipatshila ka momumua.

Dinanga

Mulubu wa mu 4 Nefi udi utupesha kabidi tshidi pamuapa bu tshintu tshia mushinga ku bionsu ebi—tshintu tshia tshiotshi katshiyiku bobumua bua bushuwa kabuenaku: “kakuvua dikokangana mu bulaba to, bua bualu bua dinanga dia Nzambi divua dikala dikadila mu mitshima ya bantu” (4 Nefi 1:15).

Ditalala dia nkaya didi dipetshibua patudi bananga Nzambi bulelela, mu dikôkela dia didipuekesha, bananga Nzambi bulelela. Etshi tshidi mukenji wa kumpala ne munena. Kunanga Nzambi bikola kupita bantu anyi bintu bionso tshidi dibangu didi difila ditalala, bulenga, dieyemena ne disanka. Patudi tutantshisha dinanga dia Nzambi ne Yezu Kilisto, dinanga dia dîku ne dia bena mutumba nedilonda nkayadi.

Disanka dinena dituapeta ne dimueka patudi tudiûja tenta ne dinanga dia Nzambi ne dia bana Benda bonsu.

Bunangi, dinanga dilelela dia Kilisto, budi buanga bua dikokangana. Ki ngikadilu munena wa mulondi mulelela wa Yezu Kilisto. Patudi tudipuekesha kumpala kua Nzambi ne tusambila ne makanda etu onsu a mutshima wetu, Yeya neatupesha bunangi (tangila Moloni 7:48).

Patudi tukeba bonsu bua kuikala ne dinanga dia Nzambi mu ndondu wa mitshima yetu, tshishima tshia bobumua netshimueneka tshijima mu tuetu.

Dimanyika dia Bunzambi

Ndekelu, bantu ba mu 4 Nefi bakaleja tshimanyinu tshia bobumua tshidi tshikoka ntema yetu: “Kakuvua banyengi, anyi bashipianganyi, anyi Bena Lamana, anyi mushindu nansha umua wa ditapulukangana mu bisumbu bia bantu to; kadi bonsu bavua tshintu tshimua, bana ba Kilisto, ne bapianyi ba bukalenga bua Nzambi” (4 Nefi 1:17).

Bimuekelu bivua bitapulula bantu mu nkama ya bidimu biakajimina kumpala kua dimanyika dishindama ne dia bunema bua bungi. Bakaditua mushinga nkayabu—ne bakuabu bonsu—bilondeshila malanda abu ne Tatu wa mu Diûlu ne Yezu Kilisto.

Mashilashilangana ne mashilangana adi mua kuikala mimpa ne makana buetu. Kadi mamanyika etu a mushinga adi â adi apetangana ne mfukilu ne kipatshila bietu bia bunzambi.

Tshia kumpala ne tshinena, yonsu wa kutudi udi muana wa Nzambi. Tshibidi, bu tshidimba tshia Ekelezia, yonsu wa kutudi udi muana wa tshipungidi. Ne tshisatu, yonsu wa kutudi udi muyidi wa Yezu Kilisto. Ndi nulomba bua ne kanuitabi bua kuangata dimanyika dikuabu bua “kushintakaja, kualuja, anyi kuangata mushinga mupita ndejilu eyi isatu.”

Ikalayi Tshintu Tshimua

Nzambi wakabikila bantu bonsu bua balua kudiye. Kudi muaba bua muntu yonsu. Tudi mua kushilangana mu tubukulu, bididi, bisamba, ndilu, ne mishindu mikuabu ya bungi. Kadi patudi mu bobumua mu Yezu Kilisto, mashilangana adi akupuka ne bâpingana kudi dijinga dietu dinena dia kuikala bamua—bua ne tuikala benda.

Kuata mu moyo malonga malongesha mu 4 Nefi. Padi yonsu wa kutudi uditatshisha bua kuela bintu ebi bia mushinga bia bobumua mu mioyo yetu, nebatuamba, bu muakabambabu, “bushuwa kakuvua bantu bavua mua kuikala ne disanka dipita munkatshi mua bantu bonsu bavua bafukibua ku tshianza tshia Nzambi to” (4 Nefi 1:16).

© 2024 kudi Intellectual Reserve, Inc. All rights reserved. Bipatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Monthly Liahona Message, October 2024. Tshiluba. 19359 760