“Ntxiv Dag Zog rau cov Tub Hluas Ntxhais Hluas: Tus Cawm Seej Zaj Lus rau Nej,” Ntxiv Dag Zog rau cov Tub Hluas Ntxhais Hluas, Peb Hlis Ntuj 2024.
Zaj Lus hauv phau Ntxiv Dag Zog rau cov Tub Hluas Ntxhais Hluas Txhua Hli, Peb Hlis Ntuj 2024
Ntxiv Dag Zog rau cov Tub Hluas Ntxhais Hluas: Tus Cawm Seej Zaj Lus rau Nej
Phau no pab nej txiav txim siab txog ib yam dab tsi kom phim Yexus Khetos thiab Nws tej lus qhuab qhia.
Kuv Sawv ntawm lub Qhov Rooj thiab Khob, los ntawm J. Kirk Richards
Cia li xav tias nej ua neej nyob hauv lub teb chaws Kalilais, 2,000 xyoo dhau los. Nej thiab nej cov phooj ywg yuav mus koom ib txoj kev sib ntsib rau cov tub hluas ntxhais hluas ntawm lub tsev teev ntuj nyob ze, es muaj ib tug neeg tshwj xeeb yuav hais lus: Yexus uas tuaj Naxales tuaj. Thaum Nws hais lus txog nrab, Yexus caw cov tub hluas ntxhais hluas nug Nws ib co lus nug.
Nej xav hais tias lawv yuav nug Nws dab tsi?
Tej zaum ib co lus nug yuav hais txog tej kab lis kev cai thiab tej yam muaj los thaum lub sij hawm ntawd. Tiam sis kuv ntseeg tias ib co lus nug yuav zoo li cov lus nug peb muaj niaj hnub nim no.
Piv txwv hais tias, hauv Phau Tshiab, cov neeg nug tus Cawm Seej cov lus nug li nram qab no:
-
Kuv yuav tsum ua li cas kom thiaj txais tau lub neej nyob mus ib txhis li?1
-
Puas muaj leej twg saib kuv rau nqi? Puas muaj ib pawg neeg twg uas txais yuav kuv?2
-
Yog tias kuv tus npawg ua txhaum kuv, kuv yuav tsum zam txim pub rau nws pes tsawg zaus?3
-
Yuav muaj li cas rau lub ntiaj teb no nyob rau lub sij hawm yav tom ntej? Kuv puas yuav nyob nyab xeeb?4
-
Koj puas yuav kho tau tus neeg kuv hlub?5
-
Qhov tseeb yog dab tsi?6
-
Kuv yuav ua li cas paub saib kuv puas taug txoj kev yog?7
Peb puas xav txog tej lus nug no ib yam qee zaum? Ib tiam dhau ib tiam, cov lus nug tsis tau hloov ntau. Thiab tus Cawm Seej tseem muaj siab hlub cov neeg uas nug Nws lus. Nws paub hais tias lub neej no muaj kev nyuaj siab thiab kev ntxhov siab ntau npau li cas. Nws paub hais tias yeej yooj yim poob zoo. Nws paub hais tias qee zaum peb txhawj xeeb txog lub sij hawm yav tom ntej. Thiab Nws hais rau nej thiab rau kuv, ib yam li Nws hais rau Nws cov thwj tim yav thaum ub hais tias:
Thaum nej yuav tsum xaiv tej yam tseem ceeb, ces kev xaiv Yexus Khetos thiab Nws txoj moo zoo yeej yog kev xaiv zoo tshaj plaws. Thaum nej muaj lus nug, Yexus Khetos thiab Nws txoj moo zoo yog lus teb zoo tshaj plaws.
Yog vim li no kuv thiaj nyiam phau Ntxiv Dag Zog rau cov Tub Hluas Ntxhais Hluas: Phau Ntawv Coj Kev Pab Neeg Xaiv. Phau no taw peb mus rau Yexus Khetos kom peb thiaj txais tau Nws lub dag zog. Kuv ceev ib phau cia hauv kuv lub hnab tsho tsis tu qab li. Thaum kuv ntsib tib neeg nyob txhua qhov txhia chaw hauv lub ntiaj teb no uas xav paub saib yog vim li cas peb, ua mej zeej ntawm Yexus Khetos lub Koom Txoos, thiaj ua tej yam uas peb ua, kuv muab phau ntawv no rau lawv saib.
Ntxiv Dag Zog rau cov Tub Hluas Ntxhais Hluas qhia tej qhov tseeb nyob mus ib txhis hais txog tus Cawm Seej thiab Nws txoj Kev. Phau no caw nej xaiv tej yam zoo vim yog tej qhov tseeb ntawd. Thiab nws qhia txog tej koob hmoov uas cog tseg tias Nws yuav muab pub rau lawv cov uas ua raws li Nws hais. Thov kom nej nyeem, xav txog, thiab faib phau ntawv no!
Caw Nws Los
Yexus Khetos xav nyob hauv nej lub neej—ib tug uas nyob ntawd ruaj khov, txawm zoo los phem. Nws tsis nyob ntawm qhov chaw txoj kev kawg, tos ntsoov nej caum tau Nws. Nws yuav nrog Nej taug kev txhua ruam mus. Nws yog txoj Kev!
Tiam sis Nws yuav tsis yuam nej cia Nws los rau hauv nej lub neej. Nej caw Nws los, dhau ntawm tej yam nej xaiv ua. Yog vim li no phau ntawv pab neeg xaiv no, ib yam li Ntxiv Dag Zog rau cov Tub Hluas Ntxhais Hluas, yeej muaj nqi heev. Txhua zaus uas nej xaiv qhov ncaj ncees vim yog tus Cawm Seej tej qhov tseeb nyob mus ib txhis li, nej qhia Nws hais tias nej xav kom Nws nyob hauv nej lub neej. Tej kev xaiv ntawd qhib tau lub qhov rooj ntug, thiab Nws lub dag zog nchuav los rau hauv nej lub neej.11
Ua Kom Sib Txuas Yam Muaj Zog
Tej zaum nej nco qab hais tias tus Cawm Seej muab cov uas hnov thiab ua raws li Nws tej lus piv rau tus neeg txawj ntse uas “ua nws lub tsev saum ib lub pob zeb.” Nws piav hais tias:
“Thaum nag los, thiab tej dej los nyab, thiab tej cua tshuab, thiab nplawm rau lub tsev ntawd; thiab nws tsis vau, vim nws tau cog rau saum lub pob zeb.”12
Ib lub tsev tiv tsis taus ib kob nag loj vim lub tsev muaj zog. Thiab nws tiv tsis tau ib kob nag loj vim lub pob zeb khov kho xwb. Lub tsev tiv tau kob nag loj vim yog nws txuas rau lub pob zeb khov kho ntawd yam ruaj kho. Yog lub dab zog ntawm kev txuas rau lub pob zeb ntawd uas muaj qab hau.
Ib yam li ntawd, thaum peb txhim tsa peb lub neej, tseem ceeb heev uas peb xaiv qhov zoo. Thiab tseem ceeb heev uas peb to taub tus Cawm Seej qhov tseeb nyob mus ib txhis li. Tiam sis lub dag zog uas peb xav tau kom tiv tau lub neej no tej kob nag loj los rau peb thaum peb muab peb tej kev xaiv txuas rau Yexus Khetos thiab Nws tej lus qhuab qhia. Twb yog qhov ntawd uas Ntxiv Dag Zog rau cov Tub Hluas Ntxhais Hluas pab peb ua.
Piv txwv hais tias, tej zaum nej cov phooj ywg paub hais tias nej sim kom tsis txhob hais lus dev los yog hais lus luag thuam. Tej zaum lawv yuav pom nej sim ua phooj ywg nrog rau tus tub hluas los sis ntxhais hluas tom tsev kawm ntawv uas neeg feem coob tsis xav txog los sis luag thuam. Tiam sis lawv paub hais tias nej ua tej yam no vim Yexus Khetos qhia hais tias “tag nrho txhua haiv neeg yog nej cov kwv tij thiab cov muam—suav … cov neeg uas txawv nej”?13
Tej zaum nej cov phooj ywg paub tias nej mus koom lub koom txoos txhua hnub Sunday. Tej zaum lawv yuav pom thaum nej tsis mloog ib zaj nkauj uas tsis zoo los sis tsis kam saib ib zaj muv vim uas tsis tsim nyog. Tiam sis lawv puas paub hais tias nej xaiv ua tej yam no vim nej “zoo siab nrog Leej Txiv Saum Ntuj Ceeb Tsheej thiab Yexus Khetos sib raug zoo,” thiab hais tias ua ib feem ntawm nej txoj kev txiav txim siab ua raws li tus Cawm Seej, nej zoo siab “muaj tus Vaj Ntsuj Plig Dawb Huv ua nej luag tsis tu qab”?14
Tej zaum lwm cov neeg paub hais tias nej tsis haus dej haus cawv los sis haus luam yeeb los sis haus tshuaj phem. Tiam sis lawv puas paub tias nej xaiv ua tej yam no vim Yexus Khetos qhia tias “nej lub cev dawb ceev,” “ib lub txiaj ntsim zoo kawg los ntawm nej Leej Txiv Saum Ntuj Ceeb Tsheej,” es tsim kom zoo ib yam li Nws lub meej mom?15
Tej zaum nej cov phooj ywg paub tias nej yuav tsis khib lav los sis dag thiab hais tias nej saib kev kawm ntawv rau nqi. Tiam sis lawv puas paub hais tias nov yog vim Yexus Khetos qhia hais tias “qhov tseeb yuav ua rau nej muaj kev ywj pheej”?16
Qhov tseem ceeb tshaj plaws, nej cov phooj ywg puas paub tias nej xaiv tej yam no kom thiaj coj raws nraim li Khetos tej kev cai vim nej paub hais tias “Yexus Khetos yog nej lub dag zog”?17
Nws Yog Nej lub Dag Zog
Kuv ua tim khawv rau nej hais tias Yexus Khetos yog txoj Kev kom thiaj muaj qhov yam tom ntej zoo kawg—nej lub sij hawm nyob yav tom ntej. Thiab Nws kuj yog txoj Kev ua kom lub sij hawm tam sim no zoo kawg thiab. Taug Nws txoj kev, thiab Nws yuav nrog nej mus. Nej yeej muaj peev xwm ua!
Kuv cov phooj ywg hluas, Yexus Khetos yog nej lub dag zog. Yeej meem nrog Nws mus kev, thiab Nws yuav pab nej nce mus “muaj phab tis ib yam li dav loj”18 ya mus rau txoj kev xyiv fab nyob mus ib txhis li uas Nws npaj tseg rau nej.
© 2024 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly For the Strength of Youth Message, March 2024. Hmong. 19356 295