Mupandishi wa Bonsu, Lumu Luimpa bua Bonsu

Kudi Mulombodi Mukulu Jeffrey R. Holland

Mulombodi Mukulu Udiku wa Mpuilu wa Bapostolo Dikumi ne Babidi

Lumu luimpa, Bupikudi, ne Dibika ku Lufu bia Yezu bidi bibenesha bana bonsu ba Nzambi.

Lumu luimpa lupingajilula lua Yezu Kilisto ludi, kupita bionsu, ne bua kashidi, mushimi wa diakalenga dia tshiendelela, ditalala dilelela, ne disanka bua muntu yonsu mu matuku a ndekelu aa. Mabenesha adi afuma ku lumu luimpa ne ku mudimu wa Kilisto udi kawuyi ne ndekelu ne kawuyi ne difutu kaavua umvuija anu bua basungula bakesa, pa kala anyi mu bikondu ebi.

Nansha tuetu bumvua ne katuena tukumbana, kuteka ku luseka mibi idi mua kutusemeja kula nenda bua tshikondu, Mupandishi wetu udi utujadikila ne “udi olola bianza bienda [kutudi] dituku dionsu dijima” (Yakoba 6:4), utubikila tuetu bonsu bua tulua kudiye ne tumvua dinanga dienda.

Mabenesha a Lumu Luimpa bua Buloba Bonsu Bujima

Lumu luimpa lua Yezu Kilisto luvua “lupingajilula mu matuku a ndekelu aa bua kupetangana ne… majinga a tshisamba tshionsu, bisa bionsu, muakulu onsu, ne bantu bonsu pa buloba.”¹ Lumu luimpa ludi lusambuka bantu ba bisambi bionsu ne dikala dionsu padilu lusambuka milongo ya bikadilu bua kulongesha ne “bonsu badi momumua kudi Nzambi” (2 Nefi 26:33).² Mukanda wa Molomo udi wimana bu bujadiki bua pabuawu bua bulelela ebu.

Muandiku munena ewu udi ujadika ne Kilisto udi uvuluka bisamba bionsu (tangila 2 Nefi 29:7) ne neadimuenesha “kudi bonsu badi bamuitabuija, … [ne wenza] bishima bikola, bimanyinu, ne malu a dikema, munkatshi mua bana ba bantu” (2 Nefi 26:13). Munkatshi mua bishima bikola ebi, bimanyinu, ne malu a dikema aa mudi ditangalaja dia lumu luimpa. Nanku, tudi tutuma bena bukenji mu buloba bujima bua kujadika bua mikenji milenga yalu. Tudi kabidi tutangalaja lumu luimpa ne badi mu nyunguluilu wetu. Dienzela dia nsapi ya buakuidi mipangajilula bua badi ne moyo ne bafua didi ditutuisha ne tshiwudi tshia lumu luimpa netshikale bushuwa pabuipi kudi muana yonsu wa baluma ne wa bakaji ba baledi betu ba mu diulu—kala, katataka, anyi bikondu bialua.

Ndondu wa lumu luimpa elu—mukenji munena wa muambi yonsu ne mupostolo udi mubikidibua bua kuenza mudimu—udi ne Yezu udi Kilisto ne wakalua bua kubenesha muntu yonsu. Bu bidimba bia Ekelezia wa Yezu Kilisto wa Bansantu ba Matuku a Ndekelu, tudi tujadika ne mulambu wenda wa bupikudi udi bua buloba bujima.

Dijinga dia Bupikudi budi kabuyi ndekelu ne bua Tshiendelela

Pantu ngendakana mu buloba bujima, Ntu ngenza miyiki ne tshisumbu tshinena tshia bidimba bia Ekelezia. Nyuma utu unungena bua kumvua mushindu udibu bumvua mabenesha a Bupikudi bua Yezu Kilisto mu mioyo yabu, nansha padibu batonda mibi kampanda ya kala. Disanka kayi bua ne dikankamika ditokeshi dia Bupikudi buenda didi misangu yonsu pabuipi netu bonsu!

“Kudi ne tshia kuikala Bupikudi buenjibua,” Amuleke wakajadika, “anyi bukua bantu bonsu budi ne tshia kufua kakuyi diepuka to.” Tuvua ne tshia kuikala bua kashidi “bapona ne… bajimina, … pa kumbusha mu bupikudi,” budi bulomba “mulambu udi kawuyi ndekelu ne wa tshiendelela.” Bualu bua “kakuena mua kuikala tshintu nansha tshimua tshidi katshiyi tshikengela bupikudi budi kabuyi ndekelu tshia kumbana bua mibi ya ba pa buloba to” (Alama 34:9, 10, 12).

Muambi munena Yakoba wakalongesha bienda ne bualu mudi “lufu lupita pa mutu pa bantu bonsu, … kudi ne tshia kuikala bukola bua dibika ku lufu” bua kututuala ku mesu kua Nzambi (2 Nefi 9:6).

Bubi ne lufu bubidi bidi bijinga kutshimunyibua. Etshi tshivua bukenji bua Mupandishi, buvuayi mukumbaja ne dikima bua bana bonsu ba Nzambi.

Getesemane, kudi J. Kirk Richards, kabiena mua kutentudibua to

Mulambu wa Mupandishi wetu

Mu butuku buenda bua ndekelu mu tshifuaka, Yezu Kilisto wakabuela mu budimi bua Getesemane. Momu, wakatua binu munkashi mua mitshi ya olive ne katuadija diumvua dia busami bukola bua lufu budi wewa ne mema katuyi mua kumvua.

Momu, wakatuadija kuangata pa mutu penda mibi ya buloba. Wakumvua busami bonsu, busami bua mutshima, busami bua anyima, ne wakananukila dikenga dia lufu ne disama dimanya kudi wewa, mema, ne anyima yonsu wakasomba anyi wasomba pa buloba. Dikenga dinene ne didi kadiyi ndekelu edi [diakamuenza], … munena wa ku bonsu, kuzakala bua busami, ne bua kupuekesha mashi mu kasosu konsu (Dilongesha ne Bipungidi 19:18). Uvua anu ne mua kuenza esthi.

Kakuvua buimpa bukuabu bupita ebu nansha
Bua kufuta mushinga wa bubi. 
Uvua anu bua kukangula tshibi
Tshia diulu ne kutulekela tubuela.3

Yezu wakatuadibua ku Calvaire, ne mu tshikondu tshibi ne tshia kansungansunga tshia mulubu wa buloba ebu, wakapopibua pa mutshi mutshiamakana. Kakuvua muntu uvua mua kuangata moyo wenda kudiyi to. Bu Muana Umuepela wa Nzambi, uvua ne bukokeshi pa lufu lua mubidi. Uvua mua kusambila kudi Tatu wenda, ne mituta ya banjelo ivua mua kulua bua kutshimuna baluishi benda ne kuleja bukokeshi buenda pa mutu pa bintu bionsu. “Kadi mushindu kayi uvua mifundu ne mua kukumbajibua,” Yezu wakebeja mumutungidi wenda, “ne bikala nanku anyi?” Matayo 26:54

Kumbusha ditumikila dishuwa kudi Tatu wenda—ne dinanga dishuwa buetu—Yezu mu budisuila wakafila moyo wenda ne kukumbaja mulambu wa bupikudi wenda udi kawuyi ndekelu ne wa tshiendelela, udi upingana mu tshikondu tshishala ne utungunuka mu tshiendelela tshionsu.

Butshimunyi bua Mupandishi Wetu

Yezu wakateka bapostolo benda bua kutungunuka ne mudimu wenda panyima pa lufu Luenda. Mushindu kayi uvuabu mua kutshienza? Babungi ba kubobu bavua anu balobi, ne nansha umua wa kubobu kavua mulongesha mu nsunagoga bua kusadila. Mu tshikondu atshi, Ekelezia wa Yezu wakamueneka bu ukavua ujimina. Kadi Bapostolo bakapeta bukola bua kuambula bujitu bua dibikila diabu ne kusonga mulubu wa buloba.

Ntshinyi tshia kafila bukola bua kulua mu buteketa bua nunku? Mulombodi wa Ekelezia wa Anglican ne Mulongeshi Frederic Farrar bakamba: “Kudi dimua, ne anu dimua diandamuna dipepela —dibika dia ku lufu. Ditanta dinena dionsu edi divua bua bukola bua dibika ku lufu dia Kilisto.”⁴ Bu bajadika ba Mukalenga mubika ku lufu, Bapostolo bavua bamanya ne kakuvua tshintu tshivua mua kuimanyika mudimu ewu bua kutanta nansha. Bujadiki buabu buvua mushimi wa bukola buvua butua mpanda bu muvua Ekelezia wa ntuadijilu mutshimuna bipumbisha bipita bukola.

Tshikondu tshia Pasaka, bu umua wa ku bajadiki bajidila, Ndi manyisha ne patshiatshia pa dinda dishema dia Dialumingu, Mukalenga Yezu Kilisto wakabika ku lufu bua kutukankamika ne kukosa nshinga ya lufu bua muntu yonsu. Yezu Kilisto Udi ne Moyo Kupitshila ku Yeya, lufu kalutshiena ndekelu wetu to. Dibika ku lufu didi dipa didikadila ne dia buloba bujima kudi bonsu.

Yezu ne Maliya ku lukita, kudi Joseh Brickey

Luayi Kudi Kilisto

Lumu luimpa ne Bupikudi bia Yezu Kilisto bidi bua bonsu—buena kuamba ne, muntu yonsu. Mushindu umuepela utudi tumanya mabenesha muula tenta a mulambu wa bupikudi wa Mupandishi udi mu kuitaba kua nkaya dibikila dienda: “Luayi kundi” (Matayo 11:28).

Tudi tulua kudi Kilisto patudi tuteka ditabuija mu Yeya ne tukudimuna mitshima. Tudi tulua Kudiye patudi tutambushibua mu dina dienda ne tupeta dipa dia Nyuma wa Tshijila. Tudi tulua Kudiye patudi tulama mikenji, tupeta milulu, tunemeka bipungidi, tupeta mamanya mu ntempelu, ne tusomba mu mushindu udi bayidi ba Yezu basomba.

Mu bikondu, neupeta ditekeshibua ne dinyingalaja. Mutshima weba udi mua kunyingalala bueba wewa nkayeba anyi bua muntu uudi munanga. Udi mua kumvua bujitu bua mibi ya bakuabu. Bilema biwudi muenza—bidi mua kuikala binena—bidi mua kuenza bua umvua bowa ne ditalala ne diakalenga bia kumbuka kuudi kashidi. Mu bikondu bia buena ebi, vuluka ne Mupandishi kena anu mumbusha bujitu bua bubi to kadi kabidi “wakake[nga] busami ne ntatu ne matetshibua a mushindu onsu” (Alama 7:11), kuela ne bieba! Bua bionsu biakapitshilaye bueba wewa, Mmumanya pa nkaya mushindu wa kukuambuluisha pawudi witaba dibikila dia dishintulula moyo: “Luaku kundi.”

Bonsu Badi Bakidila

Yezu Kilisto mutshileja patoka ne bana bonsu ba Tatu wa mu Diulu badi ne dipeta dia momumua pa mabenesha a lumu luimpa ne Bupikudi bienda. Udi utuvuluija ne bonsu “badi ne bunema muntu yonsu bumudi mukuabu ne nansha umua kena mukandikibua” (2 Nefi 26:28).

“Udi ubabikila bonsu bua kulua kudiye ne kuangata buimpa buenda; ne kena ubengela nansha umua udi ulua kudiye to, bafika ne batoka, bapika ne badikadila, baluma ne bakaji” (2 Nefi 26:33).

“Udi ubabikila bonsu”—buena kuamba ne bonsu buetu! Katuena mua tukeka bimanyinu ne matapulula bienza pa tuetu nkayetu anyi pa bakuabu. Katuena mua kuteka bikandi ku dinanga dia Mupandishi anyi kuela bienjenji ne tuetu anyi bakuabu tudi pa mutu pa difika dienda. Bu mumvua muambe diambedi, “kabiena bipepela bua [muntu yonsu] kupueka muishi kupita bukenka budi kabuyi ndekelu bua Bupikudi bua Yezu butokesha.”⁵

Kadi, bu muvua Muena kuanyi Holland ne Mema balongesha ngondu mikesa kumpala kua kufua kuenda, tudi balombibua bua “kuikala ne bunangi, bunangi budi dinanga” (2 Nefi 26:30).⁶ edi didi dinanga didi Mupandishi utuleja, bualu bua “Kena wenza tshintu to amu bikala bua dikuatshisha dia ba pa buloba; bualu udi munanga ba pa buloba, nansha udi ufila moyo wenda bua akoka bantu kudiye” (2 Nefi 26:24).

Ndi njadika ne lumu luimpa ne Bupikudi bia Yezu Kilisto bidi bua bantu bonsu. Ndi nsambila ne nenupeta mu disanka mabenesha adiye utuala.

© 2024 kudi Intellectual Reserve, Inc. All rights reserved. Bipatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Mukenji wa ku Ngondu wa Liahona Ngondu Muisatu 2024. Tshiluba. 19284 760