“Meyɛ Jesus Christ N’Osuanyi,’’ Ma Mbabun Enya Ahoɔdzen, Sanda 2024
Bosoom bosoom For the Strength of Youth Amandzɛɛbɔ, Sanda 2024
Meyɛ Jesus Christ N’Osuanyi
Ibotum aka Agyenkwa no do na atserɛw Ne nsɛm akyerɛ nkaafo.
Ana adwendwen siantsir a, Ɔasa nkorɔfo yarba ekyir no, Jesus kãa kyerɛɛ hɔn mu binom dɛ mma wɔnnkã ho asɛm nnkyerɛ obiara da no a (hwɛ Mark 7:36)? Siantsir kor botum ayɛ akadofo pɔkyee a Ohia hɔn. Ibotum adwen dɛ sɛ nkorɔfo kã hɔn ayarsa ho asɛm a ɔbɛyɛ kwan papa ama Jesus dɛ ɔbɔtwe akadofo. Mbom, nna Jesus nnhia akadofo ara. Nna Ohia esuafo.
Jesus kãe kyerɛɛ Peter na Andrew dɛ, “Hom nkã mo do’’ (Matthew 4:19). Joseph Smith Nkyerɛasee wɔ nyiyimu no ho kenkan dɛ, “Emi na nkɔnhyɛfo akyerɛw wɔ mo ho; hom nkã mo do’’ (Joseph Smith Nkyerɛasee, Matthew 4:18 [wɔ Matthew 4:19, ase asɛnsin a]). Nna nsato no nnyɛ dɛ wɔnye No bɛnantsew kakra ara. Nna Ɔpɛ dɛ wɔyɛ N’esuafo afebɔɔ.
Nna Ɔmmpɛ dɛ wɔbɔhwɛ ara dɛ Ɔkyerɛkyerɛ nkorɔfo, ɔdɔ nkorɔfo, na ɔyɛ anwanwadze. Nna Ɔpɛ dɛ wɔyɛ dɛmara. Nna Ɔpɛ dɛ N’edwuma bɛyɛ hɔn edwuma. Wɔresan mu eyi Christ ase kyerɛ dɛ wobosũa asom dɛ mbrɛ Osii somee na wɔadwen dɛ mbrɛ Ɔdwenee no. Wobosũasũa abɔ bra dɛ mbrɛ Ɔbɔɔ bra, na Ɔbɛkyerɛkyerɛ hɔn na Ɔama hɔn mboa a wobehia dze abɛyɛ tse dɛ Ɔno yie no.
Greek osuanyi kasafua nye mathetes. N’asekyerɛ bor tra ɔkadofo anaa adzesũanyi. Wɔtaa kyerɛ ase dɛ sũasũanyi. Christ n’aber do no, nna ɔda edzi dɛ esuafo no san mu yi owura a wɔpɛ dɛ wosũa fi no hɔ a hɔn enyi da kwan dɛ hɔnankasa so wɔbɛyɛ ewuranom. Christ enndzi dza wɔtɔ yɛ no do. Ɔsesaa no, na mbom Ɔhwehwɛɛ N’esuafo. Ndɛ, Christ frɛ hɛn dɛ yɛmbra No hɔ. Ɔfrɛ hɛn dɛ yɛnyɛ N’esuafo na yɛmpaa mu nkã N’asɛm wɔ No nkorɔfo no mu ama woetum eenya daapem nkwa (hwɛ 3 Nephi 5:13).
Akatasiaba bi a ofi Haiti wɔ Caribbean kyerɛɛ ne pɛ dɛ ɔbɛyɛ Christ osuanyi ber a ɔto nsa frɛ ne nyɛnko a nna ɔnnyɛ Asɔrba dɛ ɔnye no nkɔ FSY ehyiadzi. Ahyɛse no nna nyɛnko no n’egya mmpɛ dɛ ɔma ne ba no kwan ma ɔkɔ. Asɔr baanodzifo kyerɛkyerɛɛ sũahu horow apapa a wɔwɔ hɔ ma no na young adult apamfo anwanwafo a wɔbɔhwɛ no do mu. Egya no maa ne ba basiaba no kwan dɛ ɔnkɔ, na ohun nsonsonee a ɔdze baa n’abrabɔ mu no, ɔsanee so maa no kwan dɛ ɔnkɔ Asɔr nhyiamu horow na—abosoom esia ekyir no—wonumaa no.
Aberantsɛba bi fi Argentina wɔ South America kyerɛɛ ne pɛ dɛ ɔbɛyɛ Christ osuanyi ber a ɔmaa ne nyɛnko a nna ɔnye no afow hɛn rokɔ skuul no ne tɔfe no bi. Ber a onyaa tɔfe a kɔfe wɔ mu no, ɔkyerɛkyerɛɛ mu dɛ no kɔn nndɔ tɔfe a ɔtse dɛm bi da osiandɛ obiara nnyi n’ebusua mu a ɔnom kɔfe. Ɔno gyaa no kɔr Asɔr no ho nkɔmbɔdzi, a ogyaa kɔr nsato dɛ ɔmbra nhyiamu horow, a eiwei no ogyaa ma ne nyɛnko no bɛyɛ Asɔrba na ɔrosom asɛmpa dwuma wɔ Chile.
Nnyɛ obiara a ekã Asɔr no no ho asɛm kyerɛ no anaa eto nsa frɛ no wɔ Asɔr dwumadzi na ɔpɛ dɛ ɔbɛka ho. Na ɔno Ye. Nnyɛ obiara a Christ nye no kasae wɔ N’asaase somdwuma ber mu no na ɔbɛka ho so. Ɔdaho ara dɛ, sɛ yɛsan mu yi dɛ yɛbɛyɛ Jesus Christ n’esuafo na yɛapaa mu akã N’asɛm a, Ɔbɛma hɛn akokodur na mboa krɔnkrɔn. Yebosũa mbrɛ yebesi abɛyɛ tse dɛ Ɔno yie, na dɛm na esuafo yɛ.
© 2024 odzi wɔ Intellectual Reserve, Inc.Wɔakora ho tumdzi nyinara. Wotsimtsimii wɔ USA. Ngyiresi Borɔfo kasa ngye ntomu: 6/19. Nkyerɛase ngye ntomu: 6/19. Monthly For the Strength of Youth Message, Sanda 2024ne nkyerɛase. Language.19273 502