Ang Mahangtorong Kaminyoon Mao ang usa ka Mahangtorong Panaw
Kita nagtuo sa mahangtorong kaminyoon, kita nagtudlo sa mahangtorong kaminyoon, ug kita nagtinguha og mahangtorong kaminyoon.
Human sa dili hitupngan nga gugma ug sakripisyo sa Manluluwas nga gihalad sa Tanaman sa Getsemani ug sa krus, ang Iyang walay kinabuhi nga lawas luwas nga naselyo sa usa ka hinulaman nga lubnganan. Apan ang lubnganan dili makatanggong sa balaang Anak sa Dios. “Nganong gipangita man ninyo ang buhi diha sa mga patay? “Wala na siya dinhi, nabanhaw siya.”
Tungod sa kadaogan sa atong Manluluwas batok sa kamatayon ug sala, atong daygon ang Iyang ngalan sa kahangtoran.
Si Jesukristo nagdala og ubang dili masukod nga mga panalangin. Miingon Siya ngadto sa Iyang Apostol nga si Pedro, “Ang inyong itugot dinhi sa yuta, itugot usab didto sa langit.” Ang sagrado nga gahom sa pagselyo gipahiuli na dinhi sa yuta ug makita karon sa Iyang gipahinungod nga mga templo. Miingon si Presidente Gordon B. Hinckley, “Kon wala nay lain pang moresulta gikan sa tanang kaguol ug pagbudlay ug kasakit sa pagpahiuli kay sa gahom sa pagselyo sa balaang pagkapari sa pagbugkos sa mga pamilya sa kahangtoran, angay lamang kini sa tanang bugti niini.”
Pagluhod sa Altar
Sa akong 74 ka tuig nga pangedaron, adunay pipila ra ka kasinatian diin halos tanang emosyon ug pagbati klaro kaayo sa akong panumdoman. Usa sa labing makatandog nga kasinatian mao ang higayon nga nagluhod ko sa altar atbang ni Kathy didto sa sulod sa balaang templo sa Dios. Ang mga paglaom, ang mga damgo, ang gugma nga among giambitan gibati gayod namo samtang among nadungog kadtong dili malimtan nga mga pulong: “alang sa karon ug sa kahangtoran.”
Kaninyo nga anaa niining tibuok kalibotan nga kongregasyon nga mahigugmaong nahinumdom nianang adlawa sa inyong kinabuhi, ako mamulong gayod nganha kaninyo.
Nianang higayona, samtang nagluhod atbang sa altar, nagkadako ang atong pagkaamgo sa giladmon sa atong pasalig ngadto sa Dios ug ngadto sa usag usa. Ang sagrado nga ordinansa nagbugkos kanato ngadto sa atong mahangtorong kapikas ug ngadto sa Dios. Kita maligdong nga nanumpa sa pagtuman sa mga pakigsaad, ug ang Ginoo nagsaad kanato, kon kita magmatinud-anon, ang dili masulti nga mga panalangin sa mortalidad ug sa sunod nga kinabuhi, lakip ang mga trono, mga gahom, ug mga kayutaan sa mahangtorong kalibotan.
Pagtarong sa Atong Kinaiya
Hinuon, ang atong mas dako nga paglaom, mao ang tinguha sa pagtarong sa ato mismong kinaiya, nga mahimong mas sama sa atong Manluluwas, nga magtugot kanato nga makapuyo uban Kaniya sa umaabot. Sulod sa atong sagrado nga kaminyoon, nga nabugkos ngadto sa Dios ug sa usag usa, atong makita ang atong kaugalingon sa grabe nga kasinatian nga maghatag og espirituwal nga paglambo—sakripisyo, gugmang putli, pailob, ug tigpasiugda sa kalinaw, nga gipamulong ni Presidente Dallin H. Oaks kaganihang buntag, ang kinaiya mismo ni Kristo, nga gisulti ni Presidente D. Todd Christofferson—mahimong mas dako nga bahin kanato.
Samtang atong palamboon ang atong gugma alang sa Manluluwas, ang atong gugma alang sa usag usa motubo. Sama sa atong kaugalingong pagkadisipulo, ang atong mahangtorong kaminyoon dili usa ka temporaryo nga butang apan usa ka panaw, usa ka mahangtorong panaw nga mahimo unsa ang gusto sa Dios nga kita mahimo.
Sa kadaghanan sa kalibotan, ang pagsalig sa malungtarong kinaiya sa kaminyoon nagkakunhod. Sa ebanghelyo ni Jesukristo atong gipahayag nga ang “kaminyoon tali sa usa ka lalaki ug usa ka babaye gi-orden sa Dios.” Kita nagtuo sa mahangtorong kaminyoon, kita nagtudlo sa mahangtorong kaminyoon, ug kita nagtinguha og mahangtorong kaminyoon.
Pag-andam alang sa mga Pakigsaad
Atong gipaabot ang atong kaminyoon uban ang pagtuo ug pagsalig tungod kay kita mainampingong nangandam alang sa mga pakigsaad nga atong gihimo diha sa balay sa Ginoo. Sa batan-on pa kita, atong gipalig-on ang atong pagtuo kang Jesukristo ug gituman ang Iyang mga sugo, lakip ang balaod sa kaputli, usa ka balaod nga gisalikway sa kadaghanan sa kalibotan. Atong gidala sa atong kaugalingon ang ngalan ni Jesukristo.
Apan bisan pa sa atong pagpangandam, siyempre matag usa kanato adunay mga kahuyang, ug atong naamgohan nga ang atong kinabuhi magkinahanglan og dugang nga pagkadili hakog, dugang nga paghinulsol, ug dugang nga pagpasaylo. Gisulat namo ni Kathy sa serbilyeta [paper napkin] sa among salo-salo sa kasal kining mga pulong ni William Shakespeare: “Ang gugma dili gugma [nga] mausab kini atol sa kalisdanan.” Niadtong unang mga bulan samtang mas nakaila siya nako, akong gitipigan kadtong nahabiling mga serbilyeta sa tibuok namong apartment.
Sa proseso sa pagdawat sa mga kalipay ug mga kasubo sa mga kasinatian sa kinabuhi, atong ikulit ang atong mga pakigsaad nga dili mapapas diha sa atong mga kalag, ug atong ipunting ang atong mga mata ngadto sa langit, padulong sa mahimayaong destinasyon nga naghulat nato. Nahibalo kita nga ang diosnong mga hiyas nga atong gipangita dili tanan maperpekto niining kinabuhia. Ang mahangtorong kaminyoon usa ka mahangtorong panaw.
Mosalig diha sa Espiritu Santo
Gikinahanglan gayod nato ang gasa sa Espiritu Santo sa atong personal nga kinabuhi ug sa atong kaminyoon. Sama sa gikutlo na niini nga komperensiya, si Presidente Dallin H. Oaks bag-o lang miingon: “Ang kaaway maayo kaayo sa pagtakoban sa kamatuoran nga kon wala kaninyo ang Espiritu Santo, malingla kamo. Daghang babag ang anaa sa unahan. Ang mga makabalda daghan kaayo.”
Usa sa mga panglimbong sa kalibotan mao ang pagpamenos sa sagrado nga importansya ug sa tinuod nga gahom sa ordinansa sa pagselyo. Ibutang ang inyong paglaom diha sa usag usa ug diha ni Jesukristo. Ang Iyang mga saad makatabang nato nga mabuntog ang mga babag ug mga makabalda.
Adunay mga panahon sa among kaminyoon nga nagkinahanglan og dakong pailob.
Sa among ika-25 nga anibersaryo sa kasal, si Kathy ug ako didto sa Philadelphia nakigsulti sa mga misyonaryo. Nakadawat ko og tawag gikan ni Presidente Boyd K. Packer sa Napulog Duha. Sa kataposan sa among panag-istoryahanay, miingon ko, “Presidente Packer, karon ang among ika-25 nga anibersaryo sa kasal. Sa imong hunahuna dili ba kana dakong kalamposan?” Wala magduhaduha, mitubag siya, “Para ni Kathy!” Uban sa imong paglaom ug pagtuo kang Kristo, tugoti ang Ginoo nga mopalapad sa imong espirituhanong mga gasa sa pagsabot ug pailob.
Sa paghisgot bahin sa mahangtorong kaminyoon, tugoti ko nga maghisgot og duha pa ka isyu.
Una, ang matag tinuod nga disipulo ni Jesukristo, kon kini ang iyang tinguha, maselyo sa kahangtoran ngadto sa matarong nga kapikas nga iyang pilion sa tibuok kahangtoran, niining kinabuhia man o sa sunod.
Ikaduha, ang pangutana mao, “Aduna bay mga sitwasyon diin angay nga ikonsiderar ang diborsyo?” Ang tubag oo, aduna, apan ang mga pasidaan importante. Ilakip nako ang propetikanhong mga pagtulun-an bahin niini nga hilisgotan sa mamantala na nga bersiyon sa akong mensahe.
Pag-atiman sa Usag Usa
Singkwenta ka tuig ang milabay, si Kathy ug ako nakaila og usa ka dalaygon nga magtiayon nga bag-o lang usab nga nakasal diha sa balay sa Ginoo. Ang kinabuhi positibo. Nakabaton sila og mga anak. Ang asawa adunay talento ug puno sa pagtuo. Ang trabaho sa bana milambo. Gituman nila ang ilang mga pakigsaad.
Wala damha, ang batan-ong babaye nakasinati og seryosong mga problema sa panglawas.
Bag-ohay lang gipaambit sa ilang anak nga lalaki kini nga mga pamalandong kanako:
“Sa akong kabatan-on, ang akong buotan nga mama nakaagi og kalisod sa grabing depresyon, nga nagdala og taas nga mga panahon sa kalisod sa pag-atiman bisan sa iyang kaugalingong mga panginahanglan. Usa kadto ka bag-ong reyalidad para sa akong duha ka ginikanan. Ang kinabuhi lahi kay sa ilang gilaoman.
“Ang akong papa wala pa gayod makasinati og sakit sa pangisip ug nangayo og tabang sa iyang Langitnong Amahan. Dili nako maihap ang panahon nga nakita nako siya nga nagluhod, o kon pila ka Dominggo nga hilom siyang nagpuasa pag-usab. Nagserbisyo siya sa akong inahan—ug nagserbisyo kanamo—uban ang talagsaong gugma, pailob, ug pagkamapaubsanon. Nagtinguha siya sa impluwensya sa Espiritu Santo, naglaom nga mohigugma, molihok, ug motubag sama sa buhaton sa Manluluwas.
“Ang akong inahan mao ang gugma sa iyang kinabuhi. Kini nga mga panahon usa lamang ka mubo nga gutlo. Nabugkos sila sa usag usa hangtod sa hangtod. Kon magpabilin sila nga matinud-anon, sila mag-uban hangtod sa kahangtoran diha sa kahimsog ug kamalipayon. Kana nga saad naghatag kaniya og hingpit nga kahayag sa paglaom.
“Samtang daghang higayon nga gibati sa akong inahan nga ang iyang mga hagit nakahatag og palas-anon sa akong papa, lahi ang panan-aw sa akong amahan niini. Ganahan siya nga moserbisyo niining talagsaon, bililhong anak nga babaye sa Dios.
“Samtang maisogon—ug milagroso—nga gibuntog sa akong mama ang iyang daghang kalisdanan sa panglawas, ilang nasinati ang kahayag ug kalipay nga magkauban: isip magtiayon ug isip mga ginikanan ug mga apohan.
“Sa kaulahian, sa iyang edad nga mga 60, lahi kaayo ang iyang giatubang nga mga pagsulay, lakip ang kanser sa totoy ug mga problema sa neyurolohiya nga nakaapekto sa iyang abilidad sa paglakaw. Sa makausa pa, siya ug ang akong papa mas mipalig-on sa ilang pasalig ngadto sa usag usa ug sa ilang mga pakigsaad ngadto sa Ginoo.
“Gibuhat nila kini nga magkauban sa kataposang adlaw sa iyang mortal nga panaw.”
Ang mahangtorong kaminyoon usa ka mahangtorong panaw.
Pagdawat sa Kusog
Kinsa ang naghatag ninyo sa kusog aron magkuptanay og hugot sa usag usa ug makompleto ang mortal nga bahin niining mahangtorong panaw?
“Ang walay kataposan nga Dios, … ang Magbubuhat sa mga kinatumyan sa yuta,” Siya nga nabanhaw sa ikatulong adlaw, “[Siya] dili maluya, ni [Siya] kapuyan. …
“Siya nagahatag og gahom [kon kamo] maluya; ug [kon kamo] walay kusog [ Siya] nagdugang sa [inyong] kusog. …
“[Ug magkauban, samtang kamo] maghulat sa Ginoo … [kamo] molupad nga may mga pako sama sa mga agila; [magkauban, kamo] nga modagan, ug dili kapuyan; ug … molakaw, ug dili maluya.”
Ako ligdong nga mopamatuod niining sagrado nga saad sa ngalan ni Jesukristo, amen.