“Ang Pag-ula ni Jesukristo, Kaluoy sa Dios, ug Ikaw,” Liahona, Okt. 2025.

Ang Pag-ula ni Jesukristo, Kaluoy sa Dios, ug Ikaw

Ni Elder Jörg Klebingat

Sa Seventy

Si Jesukristo atong Higala, atong Giya, atong Talagsaong Mananambal, atong Tigtambag, ug, labaw sa tanan, atong Manluluwas, Manunubos, ug Manlalaban sa Amahan.

Si Jesukristo ba ingon og layo ra kaayo, dili gayod maakses, ug kulang kaayo sa personal nga koneksiyon nga ang usa ka litrato sa bongbong o estatuwa o usa ka ngalan diha sa mga kasulatan mahimo nimong personal, praktikal, ug matag adlaw nga Manluluwas?

Atong sutaon kon dili ba nato masarado kining wala kinahanglana nga gintang pinaagi sa pagrebyo sa unsay atong nahibaloan ug kon unsay atong tukma nga ikasulti gikan sa kasulatan ug sa propetikanhong mga gipamulong kabahin sa atong pakig-uban sa premortal nga Kristo ug sa unsang paagi kana nga kahibalo makatabang kanato karon sa atong relasyon Kaniya.

Unsay Atong Nahibaloan

Nasayod kita “nga ang pamilya mahinungdanon ngadto sa plano sa Tiglalang alang sa walay katap[o]san nga destinasyon sa Iyang mga anak” ug nga “didto sa premortal nga gingharian, [kita mga] espiritung anak nga lalaki ug mga anak nga babaye [sa Dios].”
Nasayod kita nga kita “kauban sa mga hamili ug mga halangdon” (Doktrina ug mga Pakigsaad 138:55; tan-awa usab sa Abraham 3:22) ug nga kita “nakadawat sa [atong] unang mga leksiyon didto sa kalibotan sa mga espiritu” (Doktrina ug mga Pakigsaad 138:56).
Nasayod kita, sama sa gitudlo ni Presidente Nelson, nga “gireserba sa atong Langitnong Amahan ang daghan sa Iyang labing halangdon nga mga espiritu—tingali, moingon ko, nga labing nindot Niya nga team—alang niining kataposang hugna. Kadtong halangdon nga mga espiritu—kadtong labing maayo nga mga magdudula, kadtong mga bayani—mao kamo!”
Nasayod kita, sigon sa gitudlo ni Elder NeilL. Andersen sa Korum sa Napulog Duha ka Apostoles nga ang “atong indibidwal nga pagkatawo nakapatik diha kanato sa hangtod. Sa mga paagi nga dili nato masabtan sa hingpit, ang atong espirituhanong paglambo didto sa premortal nga kalibotan nag-impluwensya kon si kinsa kita dinhi.”
Nasayod kita nga aron mamahimong sama sa atong langitnong mga ginikanan, kinahanglan nga mobiya kita sa ilang presensya. Ang plano sa kaluwasan gipresentar, ug gidawat kini sa pipila ug gisalikway sa uban. Si Jesukristo mitikang paabante ug miingon, “Amahan, ang imong pagbuot mao ang matuman, ug ang himaya imo sa kahangtoran” (Moises 4:2).
Nasayran nato nga, isip resulta, usa ka gubat sa langit ang nahitabo diin si “Miguel [ang premortal nga si Adan] ug ang iyang mga anghel nakiggubat batok sa dragon [Satanas] … ug sa iyang mga anghel” (Pinadayag 12:7) ug nga kita “nakadaog batok kaniya pinaagi sa dugo sa Kordero ug sa pulong sa ilang pagpamatuod” (Pinadayag 12:11).
Nasayod kita nga kita, nga usa sa labing maisog ug kasaligan nga mga anak sa Langitngong Amahan, “mitalikod sa kaaway ug mipahiluna sa atong kaugalingon kauban sa mga puwersa sa Dios, ug [nga] kadtong maong mga puwersa nagmadaugon.”
Nasayod kita nga ang atong gamay nga asul nga planeta sa Milky Way galaxy usa ka labing mahagiton nga dapit tungod kay, sama sa gipamatuod sa Ginoo kang Enoch, “taliwala sa tanan nga mga binuhat sa akong mga kamot walay sama ang hilabihan nga pagkadaotan ingon sa imong mga kaigsoonan” (Moises 7:36).
Nasayod kita nga ang pagtugot sa oposisyon sa tanan nga butang, ang labing maayo ug ang labing sanag sa uniberso gipadala usab dinhi niining partikular nga yuta sa porma nga mao si Jesukristo ug ang tanan niadtong kinsa misunod Kaniya—tanan kita.
Nasayod kita nga pipila sa labing halangdon ug matinud-anon taliwala sa espiritung mga anak sa Langitnong Amahan, kita gipili nga moanhi dinhi uban ni Jesukristo niining kataposang mga adlaw.

Healing Hands [Mga Kamot nga Moayo], ni Adam Abram

Kita ang Mga Higala sa Manluluwas

Gusto nakong ihanduraw sa akong hunahuna kon unsa kaha ka malipayon ang pagpaabot sa Manluluwas nga kita, nga Iyang gisaligan nga mga premortal nga disipulo ug mga higala, magpadayon sa pagkamaunongon sa Iyang kawsa samtang ania dinhi sa yuta. Busa kita wala masurprisa nga si Kristo sa kaulahian mopamatuod ngadto sa Iyang mga disipulo nga “kamo mao ang gihatag sa akong Amahan ngari kanako; kamo ang akong mga higala” (Doktrina ug mga Pakigsaad 84:63). Kini nga deklarasyon sa pagbati, ako nagatuo, sa natural nga paagi kini gipadangat ngari sa tanan kanato.

Sunod miabot ang saad nga tungod sa atong kamaunongon ug kamasulundon didto sa atong premortal nga kinabuhi, kita sa moabot nga adlaw dunay potensiyal nga mahimong mga sakop sa balay ni Israel pinaagi sa kaliwatan ni Amahang Abraham tungod sa atong espirituhanong kinaiya nga maminaw ug mopatalinghog sa tingog sa Dios ug pinaagi sa pagsulod ngadto sa sagradong mga pakigsaad uban sa Dios (tan-awa sa Doktrina ug mga Pakigsaad 29:7). Isip mga sakop sa balay ni Israel, kita adunay katungod sa mga panalangin sa pakigsaad ug mga responsibilidad sama sa saad ni Kristo nga gipahayag ngadto sa mga Nephita: “Ang Amahan kay unang mituboy kanako nganha kaninyo … kay kamo mao ang mga anak sa pakigsaad” (3 Nephi 20:26).

Ikaw ug ako gimarkahan—sa pagkatinuod, gireserba sa usa ka katuyoan—tungod sa atong premortal nga kamaunongon ug kamasulundom. Kay mibarog nga lig-on makausa kauban sa atong Manluluwas, lakip sa panahon sa Gubat sa Langit, karon gitawag kita nga magpasakop na usab sa makausa pa niining kataposan nga pakig-away, uban sa Gubat sa Langit nga nagpadayon, ingon sa gihapon, niini nga habig sa tabil niining mao gihapon nga mga linya sa pakig-away sa maayo batok sa daotan, kahayag batok sa kangitngit, ug sa kamatuoran batok sa kasaypanan.

Hinaot nga imong mabatyagan nga si Jesukristo kaniadto ug karon atong Higala, atong Giya, atong Talagsaong Mananambal, atong Magtatambag, ug, labaw sa tanan, atong Manluluwas, Manunubos, ug Manlalaban sa Amahan. Posibling nasaypan nimo sa pagdeklarar ang imong kaugalingon isip labihan ka huyang ug pagka-gubaon aron mahimong angayan sa Iyang gugma.

Ah, “bisan kon [ikaw] wala nay mahimo gawas sa pagtinguha nga motuo” nga Siya nagpakabana kanimo sa personal, “tugoti nga kini nga tinguha mopalihok [kanimo]” (Alma 32:27) ug mosalig kang Kristo bisan anaa sa pagduhaduha—o, kondili, alang sa bunga sa imong “pagtuo ngadto sa paghinulsol” (Alma 34:15–17), sa bunga sa imong labing maayo nga paningkamot.

Kon ikaw sa tinuod suod Kaniya sa premortal nga paagi (ug nagtuo nga ingon niana), kon Siya nag-antos man ug namatay alang kanimo (ug kay Siya nag-antos man gayod), kon ang Iyang maulaon nga sakripisyo para man gayod kanimo sa indibidwal ug sa piho nga (ug kay mao man gayod kini), kon ang paglimpyo sa mga sala ug dugang nga pagtubo sa pagtulon-an human sa usa ka pagtulon-an nga paglambo niining kinabuhia maoy tuyo nganong nia ka dinhi (ug kay mao man gayod), tingali imong masabtan nganong ang kapungot sa Amahan mapukaw batok niadtong kinsa “dili makasabot sa [Iyang] mga kaluoy nga [Iyang] gitugyan kanila tungod sa [Iyang] Anak” (Alma 33:16).

Gitagamtan sa Dios ang Pagka-manggiluy-on

Ang padayon nga paghinulsol gituyo aron mahimo kining kasinatian nga puno sa kalipay samtang atong ma-akses ang Pag-ula sa Manluluwas ug mao usab ang kapasayloan sa mga sala. Sa laing bahin, patuohon kita sa kaaway nga ang paghinulsol usa ka dili malaoman, usa ka pagbugalbugal sa kaugalingon nga buhat—nga parehas lamang kini sa kanunay nga mga pahinumdom sa atong mgapagkadili hingpit.

Palihog hinumdomi nga ang Pag-ula sa Manluluwas ug ang kinabubut-ong paghalad manalipod kanato dili lamang sa atong mga sala apan usab sa atong mga kahuyang. Batoni ang pagtuo nga ang Manluluwas hingpit sa pag-ila tali sa atong mga kahuyang ug sa atong planado, tinuyo nga mga sala. Ang usa sa Iyang mga sulugoon, si Presidente Jeffrey R. Holland, Akting nga Presidente sa Korum sa Napulog Duha ka Apostoles, mitudlo nga, “Usa ka butang nga ang Dios ganahan kaayo isip usa ka Dios mao ang kahinam sa pagkamaluluy-on, ilabi na niadtong wala magdah[o]m niini ug kanunay mibati nga dili angay niini.”

Minahal kong mga higala, sa “pagpadayon sa panahon” (Moises 7:21) ug “pagtulon-an human sa usa ka pagtulon-an“ lagda human sa lagda” (2 Nephi 28:30), samtang mapaubsanon kitang nagtinguha og kapasayloan sa mga sala pinaagi sa sinsero ug dihadiha dayon nga paghinulsol matag adlaw ug sa pagkahimong balaan, ang buhat nga “ipatigbabaw ang Dios labaw sa tanan” ug ang “paghunahuna og celestial” kinahanglan ug angay nga makita mismo diha sa atong kinaiyahan, kinaiya, ug pagkatawo; sa atong kasingkasing, kusog, hunahuna, ug kalag (tan-awa sa Lucas 10:27); sa atong mga hunahuna, mga pulong, ug mga buhat.

Ang Hanas nga Mananambal

Mga kaigsoonan, mopamatuod ko mahitungod sa reyalidad sa Iyang tinuod gayod nga Pag-ula. Mopamatuod ko nga sa Iyang ospital, Siya ang Talagsaon nga Doktor, Dakodako nga Surgeon, ug Mananambal. Mopamatuod ko nga espesyalista Siya sa pagpang-ayo sa labing huyang sa mga huyang ug pagdala og kahupayan niadtong kinsa wala kaayo magdahom niini. Mopamatuod ko nga ang tanang balayranan sa tambalanan ug sa mga klinika Iyang gibayaran didto sa tanaman ug sa krus. Mopamatuod ko nga ikaw pagaabiabihon didto alang sa padayon nga espirituhanong mga pagpahiling ingon man alang sa makaluwas sa kinabuhi nga mga pang-emerhensiya nga mga pag-opera. Abli Siya kanunay sa iyang panarbaho 24/7, ug kanunay nga adunay lawak ug kahigdaan alang kanimo.

Ang bayad mao ra gayod ang imong gugma alang Kaniya, imong tinuod nga katuyoan, imong kinasingkasing nga pagkadisipulo ug kaandam nga maningkamot sa pagkahimong tigtuman sa pakigsaad—buot ipasabot, imong masulub-on nga kasingkasing ug mahinulsolon nga espiritu (tan-awa sa 2 Nephi 2:7; 4:32).

Sa mga pulong ni Presidente Russell M. Nelson:

“Walay kinutoban ang kapasidad sa Manluluwas sa pagtabang kaninyo. Ang Iyang dili matugkad nga pag-antos sa Getsemani ug sa Kalbaryo para kaninyo! Ang Iyang walay kinutoban nga Pag-ula para kaninyo!

“Ako moawhag kaninyo sa paggahin og panahon matag semana—alang sa tibuok ninyong kinabuhi—sa pagdugang sa inyong pagsabot sa Pag-ula ni Jesukristo.”

Agig pagtapos, “hinaot nga ang Dios motugyan … nga unta [ikaw] madala ngadto sa paghinulsol ug sa maayo nga mga buhat, nga [ikaw] anam-anam nga mapahiuli ngadto sa grasya, sumala sa [imong] mga buhat” (Helaman 12:24) aron [ikaw] “makahangad [ngadto] sa Dios niana nga adlaw nga adunay putli nga kasingkaing ug limpyo nga mga kamot … , ingon nga may hitsura sa Dios nga gikulit sa inyong mga panagway” (Alma 5:19).