Pagpatunhay sa Atong Pakigrelasyon ngadto sa Langitnong Amahan ug ni Jesukristo

Ni Tracy Y. Browning

Ikaduhang Magtatambag diha sa Kinatibuk-ang Kapangulohan sa Primary

Imahe

Sister Tracy Y. Browning

Kita makatrabaho sa pagpatunhay sa atong pakigrelasyon ngadto Kanila sa pagbarog nga malig-on dinhi niini nga kalibotan.

Imahe

usa ka hamtong nga babaye nag-ampo

Dili pa kaayo dugay, samtang nagbasa sa mga kasulatan, akong naagian ang pulong nga patunhay, ug kini midani kanako sa usa ka paagi nga ako wala makabantay kaniadto. Usa ka gamay nga ideya misulod sa akong hunahuna. Sunod niana, gibati ko nga ingon og akong nasugatan kini nga pulong bisan asa.

Gibati ko nga ang Espiritu nagdapit kanako sa pagpamalandong og tulo ka pangutana:

Unsa ang buot ipasabot sa pagpatunhay sa usa ka butang?
Unsa ang akong gipaninguha sa pagpatunhay sa akong kinabuhi?
Unsa ang maobserbahan nga mga lakang nga akong gihimo padulong niana nga pagpatunhay?

Ang pangutana 1 migiya kanako, sa tagna nga paagi, ngadto sa diksyonaryo sa pagpangita sa patunhay. Nakagusto ako sa pulong nga akong nakaplagan didto. Mitabang kini kanako sa paghanduraw sa katuyoan sa pagpatunhay. Akong nakat-onan, sama pananglitan, nga ang pagpatunhay nagpasabot:

Sa pagpabilin niini nga luwas gikan sa kadaot o kasakit
Sa pagpanalipod, sa pagpabilin nga buhi o wala maunsa
Sa pagbantay, pagsiguro, pagsagang, pagpasilong, pagsanta, ug paghatag og dangpanan

Sa kataposan, kini nga pagbansay klaro nga mihatag og gibug-aton sa pipila ka mga butang alang kanako:

Ang atong tinguha sa pagpatunhay og usa ka butang nagpakita sa bili niini sa atong mga kinabuhi.
Gusto natong ipatunhay kining bililhong mga butang tungod kay kita nahibalo nga kini mga dali nga takboyan og kadaot, kadunot, pagkankan, o gani pagkahugno.
Ang pagkagusto lamang nga ipatunhay ang usa ka butang dili igo. Kinahanglan kitang makakuha og maobserbahan nga mga lakang sa pagpanalipod sa mga butang nga atong gihatagan og bili ug sa pagpugong sa bisan unsa nga makadaot nga pagkadunot.

Uban niini nga pagsabot, nakahimo ako sa pag-ila kon unsay gipaningkamotan sa Espiritu sa Ginoo sa pagsulti kanako. Gusto Niya nga akong timbang-timbangon ang tanan, kon unsaon nga ako makapatunhay sa akong hugot nga pagtuo diha sa Langitnong Amahan ug sa Iyang Anak nga si Jesukristo ug sa akong pakigrelasyon ngadto Kanila.

Kining nag-inusara nga pangutana nagtawag kanako sa paggamit sa tanan nga akong nagkat-on mahitungod sa pagpatunhay ngadto sa akong pakigrelasyon sa Langitnong Amahan ug ni Jesukristo ug sa mga pakigsaad nga akong gihimo uban Kanila. Migiya kini kanako sa pagtino kon ako ba nagbutang Kanila sa nagpatigbabaw nga kahimtang diha sa akong personal nga lista sa mga hiyas, nagtugot sa tanan sa akong kinabuhi sa pagdagayday gikan nianang labing importante nga pakigrelasyon.

Ang ilang lugar diha sa atong mga kinabuhi nagtabang kanato sa pagbantay sa atong tanang uban nga mga pakigrelasyon. Ang pagpatunhay sa atong pakigrelasyon ngadto ni Jesukristo nagtabang kanato nga mahibalo kon unsaon sa paggamit og matarong nga mga hiyas sa atong pagtinguha og balaang pakigbanay uban sa tanang mga anak sa Dios, naghimo niadtong mga mithi nga mas nasentro ni Kristo.

Miabot usab ako sa pag-ila nga sama lamang nga ang Dios naghangyo kanato sa pagbutang Kaniya og una diha sa atong mga kinabuhi, Siya naghimo sa sama alang kanako, kanimo, ug tanan sa Iyang mga anak. Sa Iyang kaugalingong tingog, ang Dios miingon, “Kay tan-awa, mao kini ang akong buhat ug ang akong himaya—ang pagpahinabo sa pagka-imortal ug sa kinabuhi nga dayon sa tawo (Moises 1:39).”

Diha niini ug sa ubang mga kasulatan (tan-awa sa 2 Nephi 29:9), nagsulti kanato ang Dios nga ang iyang unang prayoridad mao kita, Iyang mga anak. Gusto Niya nga kita makigbahin sa Iyang himaya, sa pagbaton sa hingpit nga kalipay nga kita gilalang nga makadawat (tan-awa sa 2 Nephi 2:25), ug sa pagbaton sa “kinabuhi nga dayon, … ang labing mahinungdanon sa tanang mga gasa sa Dios” (Doktrina ug mga Pakigsaad 14:7). Diha sa Iyang Pangamuyo nga Pag-ampo, si Jesus miingon, “Ug ang kinabuhing dayon mao kini, ang ilang pagpakaila kanimo nga mao ang bugtong tinuod nga Dios, ug kang Jesukristo, nga imong pinadala” (Juan 17:3).

Samtang ako naghunahuna sa maobserbahan nga mga lakang nga gihimo sa Dios sa pagpatunhay sa Iyang pakigrelasyon uban kanako, akong nailhan ang usa ka sundanan nga nagtudlo kanako kon unsaon nga ako makapatunhay sa akong pakigrelasyon, pagbinayloay, ngadto Kaniya.

Upat ka Paagi Nga Gihimo sa Dios sa Pagpatunhay sa Iyang Pakigrelasyon uban Kanato

Ang Dios Mipadala Kanato sa Iyang Anak, nga si Jesukristo, sa Pag-ula alang Kanato

Usa ka mahigugmaon ug maalamon nga Amahan mipadala ni Jesukristo kanato aron sa pagtubos kanato gikan sa mga epekto sa sala, nagsiguro nga kita dili mabiyaan diha sa usa ka walay kataposang kahimtang sa pakigbulag gikan sa Dios. Hinoon, pinaagi sa gasa sa balaang kalooy sa Manluluwas, tanan kita gihatagan og hingpit nga pagka-imortal ug pagbalik ngadto sa presensiya sa Dios aron pagahukman (tan-awa sa 2 Nephi 2:5–10; Helaman 14:15–17). Sa Tanaman sa Getsemani ug didto sa Kalbaryo, Siya migamit sa Iyang gahom, nga gihatag sa Amahan Kaniya (tan-awa sa Helaman 5:11), sa pag-antos “alang sa tanan, nga [kita] unta dili mag-antos kon [kita] maghinulsol” (Doktrina ug mga Pakigsaad 19:16). Dayon Siya nagbitay diha niana nga kahoy ug mitugyan sa Iyang kinabuhi—alang kanato (tan-awa sa 1 Pedro 2:24).

Unya, unsa, ang atong buhaton sa pagpatunhay og usa ka pakigrelasyon uban Kaniya, kinsa sa gamhanang paagi mipakita kon unsa Siya kaandam nga mobuhat alang kanato?

Kita ba mas mahimong hingpit nga Iyang matinud-anong mga disipulo?
Kita ba mahimong mas hingpit sa pagdala sa Iyang ngalan diha kanato?
Kita ba mahimong mas may tulobagon ug maghinulsol kon kita masayop?
Kita ba moamuma sa atong mga pagpamatuod?

Ang Dios Nakapadala sa Iyang Pulong pinaagi sa mga Kasulatan ug sa Modernong mga Propeta ug Apostoles

Lain nga tataw nga timaan kabahin kon giunsa kita paghatag og bili sa Dios mao nga Siya naghatag kanato sa matunhayon, makapanalipod nga gahom sa Iyang pulong. Sama sa gisaad ni Nephi:

“Ug si kinsa kadto nga mopatalinghog sa pulong sa Dios, ug hugot nga mogunit niini, dili gayod … malaglag; ni ang mga pagtintal … sa kaaway makabuntog kanila … , sa pagdala kanila sa kalaglagan” (1 Nephi 15:24).

Ang Dios naghatag sa Iyang buhi nga mga pulong ngari kanato pinaagi sa mga tugon sa kasulatan apan usab pinaagi sa mga ba-ba sa buhing mga propeta ug apostoles. Ang Simbahan ni Jesukristo adunay mga lider nga Iyang pinili ug gihatagan sa gahom ug awtoridad sa pagpahayag sa Iyang kabubut-on ngadto sa Iyang katawhan.

Ang mga pulong sa Dios makatuhop sa bisan unsa nga kahilig ngadto sa kalibotanong “kultura, mga naandan nga lihok, mga pagpihig, gihunahuna nang daan, ug mga pagduda.”¹ Ang iyang pulong makasulti og direkta “ngadto sa kinahiladmang bahin” sa atong mga kasingkasing, walay pagsapayan sa atong ang-ang sa pagkamatarong.² “Ang pulong sa Dios makabulag sa kamatuoran gikan sa kasaypanan” ug makatabang kanato sa pag-ila ug pagwagtang gikan sa atong panghunahuna sa bisan unsa nga sayop nga mga pagtulon-an nga makapahanap sa atong pagpangatarongan ug pagsabot “pinaagi sa paghan-ay niini batok sa yano ug bililhong mga kamatuoran sa Dios.”³

Unya, unsa, ang atong mabuhat sa pagpatunhay sa atong hugot nga pagtuo diha sa mga pulong sa Dios, ingon nga nadawat pinaagi sa mga kasulatan ug sa iyang pinili nga mga propeta ug apostoles?

Kita ba mas motuyo sa “pagpatalinghog” ngadto sa ilang mga pagtulon-an?
Kita ba “mogunit og maayo” ngadto sa pulong sa Dios kon mga tintasyon, mga pagsulay, o mga hagit moabot, aron dili kita mabuntog?

Ang Dios Nakatanyag og usa ka Lawom nga Pakigrelasyon ug Kaluwasan pinaagi sa mga Pakigsaad uban Kaniya

Ang labing importante nga mga saad nga kita naghimo uban sa Dios mao kadtong atong gihimo pinaagi sa mga pakigsaad. Kining sagrado nga mga pakigsabot mao ang paagi nga ang Dios nakigtambayayong uban sa Iyang mga anak sukad sa sinugdanan sa panahon. Atong nakita ang Dios nga nagpakita sa Iyang pasalig ngadto sa Iyang mga anak sa pakigsaad sa labing sayong bahin diha sa mga kasulatan—nagsugod diha sa basahon sa Genesis (tan-awa sa Genesis 6:18)—ug nagpadayon sa tibuok kasaysayan sa kasulatan. Ang paghimo ug paghupot sa mga pakigsaad makahimo og usa ka gamhanang giya diha sa mga pagpili nga kita naghimo.

Kining “dagko ug bililhon uyamot nga mga saad” (2 Pedro 1:4) giuban sa mga ordinansa ug mga pakigsaad nga kita naghimo uban sa Dios nga Amahan pinaagi sa Iyang Anak, si Jesukristo. Ug ang Dios naghangyo kanato sa pag-ambit niini aron nga Siya makapatunhay kanato gikan sa pagkadaotan sa kalibotan.

Unya, unsa, ang atong mahimo sa pagpatunhay sa atong pakigrelasyon uban sa Langitnong Amahan ug ni Jesukristo samtang kita naningkamot sa paghatag og dungog sa atong mga pakigsaad uban Kanila?

Kita ba maningkamot pa og dugang nga hingpit nga kalipay sa pagkanahiusa ngadto sa Langitnong Amahan ug ni Jesukristo pinaagi sa mga pakigsaad?
Kita ba nag-ambit sa sakramento sa Ginoo agi og paghandom ug pagbag-o sa atong mga pakigsaad?
Kita ba nag-andam sa atong mga kaugalingon sa pagsulod sa balay sa Ginoo ug nagpahimulos sa mga pakigsaad nga gitanyag didto?
Kita ba dayon mobalik kanunay sa templo?

Ang Espiritu Santo Gipadala sa Dios nga makig-uban Kanato

Ang Espiritu Santo mao ang tinubdan sa personal nga pagpamatuod ug pagpadayag. Siya makagiya kanato sa atong mga desisyon ug makapanalipod kanato gikan sa pisikal ug sa espirituwal nga peligro. Pinaagi sa Iyang gahom kita nabalaan—o na-set apart, o nahimong balaan—samtang kita naghinulsol (tan-awa sa 3 Nephi 27:20), nagdawat og makaluwas nga mga ordinansa, ug naghupot sa atong mga pakigsaad.

Sa panahon sa Kataposang Panihapon sa Manluluwas uban sa Iyang Apostoles, samtang ilang gibati ang kabalaka mahitungod sa ilang pagtultol sa dalan (tan-awa sa Juan 14:5), mihatag si Jesus kanila niini nga saad:

“Ang Manlalaban, ang Espiritu Santo, nga sa akong ngalan igapadala sa Amahan, siya mao ang magatudlo kaninyo sa tanang butang, ug magapahinumdom kaninyo sa tanan nga akong gikasulti kaninyo” (Juan 14:26).

Kana nga saad gipalugway nganha kaninyo ug kanako usab.

Unya, unsa, ang atong mabuhat sa pagpatunhay sa kanunay nga pakig-uban sa Espiritu Santo, ang ikatulong sakop sa Dios nga Kapangulohan, aron nga kita makadawat sa gisaad nga pisikal ug espirituwal nga panalipod?

Kita ba mag-ampo alang sa inspirasyon nga mahibalo kon unsa ang gusto sa Dios kanato nga buhaton ug alang sa gahom ug kapasidad sa pagbuhat niini?
Mas maayo ba nga atong sundon ang espirituwal nga mga pag-aghat nga atong madawat sa usa ka paagi nga motugot sa tingog sa Dios nga magpabilin sa atong mga kinabuhi?
Kita ba, uban sa nagkadakong sinseridad ug intensiyon, nagtinguha sa panghimatuod nga saksi sa Espirtu kabahin sa Dios nga Amahan ug sa Iyang Anak, si Jesukristo, kabahin sa mga kamatuoran sa ebanghelyo, ug sa makaluwas nga mga ordinansa nga makaplagan lamang diha sa Simbahan sa Manluluwas?

Akong mga higala, ako nagpamatuod nganha kaninyo nga ang Dios kanunay naninguha sa pagpakigsulti nganha kaninyo—bisan kon kamo dili makamatikod niini. Kasagaran Siya naninguha sa pagsulti kaninyo nga Siya nahigugma kaninyo ug nga kamo mao ang Iyang prayoridad. Siya nakahatag ug mopadayon sa paghatag og daghang dili maihap nga mga paagi sa pagpakita sa atong bili ug pagkaprayoridad. Sa hingpit nga kalipay atong suklian ang Iyang gugma pinaagi sa paghimo Kaniya nga atong nag-una nga prayoridad sa atong mga kinabuhi. Ug dayon atong ipatunhay kana nga pakigrelasyon pinaagi sa pagsunod Kaniya sa matinud-anong paagi isip Iyang mga disipulo: naghupot og maayo sa Iyang pulong, naghimo ug naghupot sa mga pakigsaad uban Kaniya, ug naningkamot sa kanunay nga pakig-uban sa Espiritu Santo.

Ako nagpamatuod nga si Jesukristo mao ang buhing Anak sa Dios ug nga Siya andam sa paghatag sa Iyang kinabuhi sa pagluwas sa atoa ug sa pagtanyag kanato sa labing mahinungdanong gasa sa Dios kanato: kinabuhing dayon. Ikaw ang Iyang buhat ug ang Iyang himaya.