Te rirora’a ’ei ’ite

Hōho’a

Tē fa’a’ite ra Moroni ia Mary Whitmer i te mau ’api ’auro

Mary Whitmer and Moroni [Mary Whitmer ’e ’o Moroni], nā Robert Pack

I te tau fa’atupura’a rā’au nō te matahiti 1829, ’ua fāri’i poupou Mary ’e ’o Peter Whitmer ia Iosepha ’e ia Emma Semita ’e Oliver Cowdery i tō rāua fare, ’ia ti’a i te ’īritira’a o te mau ’api ’auro ’ia fa’aotihia. E mea teitei mau te mau tītaura’a i te taime ’o Mary. ’Ua ha’apa’o ’oia e iva ta’ata i roto i tōna iho fare ’e ’ua tauturu i tāna mau tamari’i fa’aipoipohia e ora ra nā pīha’i iho mai.

’Ua riro mai nā tamāroa e pae a Mary ’e tāna nā huno’a (i muri iho) e piti ’ei mau ’ite mana nō te mau ’api ’auro i te ’āva’e Tiunu 1829. I taua ā ’āva’e ra, ’ua fāri’i Mary i tōna iho ’itera’a pāpū.

I rāpae’au i tōna fare, ’ua ha’afātata mai te hō’ē ta’ata rouru hinahina ’e te hō’ē pūtē tua i ni’a i tōna tapono ia Mary ’e ’ua parau mai, « ’O Moroni tō’u i’oa. ’Ua rohirohi roa ’oe i te mau ’ohipa hau tei tītauhia ia ’oe ’ia rave ». Ma te rave mai i te pūtē tua i tōna tapono, ’ua nā ’ō fa’ahou atu ra Moroni ē, « ’ua vai ha’apa’o maita’i noa ’oe ’e te itoito i roto i tā ’oe mau ’ohipa. Nō reira, e mea tano ’ia fāri’i ’oe i te hō’ē ’itera’a pāpū ’ia ti’a i tō ’oe fa’aro’o ’ia ha’apūaihia ». ’Ua fa’a’ite atu ra ’oia i muri iho i te ’ohipa i roto i tāna pūtē tua—te mau ’api ’auro.¹

’Ua riro Mary ’ei ’ite nō te mau ’api ’auro, mai nā ’ite to’otoru ’e to’ova’u, tei roto tō rātou ’itera’a pāpū i te mau ’api ’ōmuara’a o te Buka a Moromona. Nā te ha’eha’a ’e te itoito o Mary i fa’aineine iāna ’ia riro ’ei ’ite. ’Aita tōna ’itera’a pāpū i pāpa’ihia i roto i te mau ’api ’ōmuara’a o te Buka a Moromona, ’e ’aita tōna i’oa i ni’a i te mau pāpa’a parau, te mau patu, ’aore rā i roto i te ferurira’a o te rahira’a feiā mo’a tei haere mai i muri mai iāna. Noa atu ē, ’aita tāna mau tauturura’a i roto i tōna fare ’e tōna ’utuāfare i ’itehia e te mau ta’ata e rave rahi, ’ua ’itehia ra te reira e te Atua.

’Ua ha’api’i Elder Dieter F. Uchtdorf nō te pupu nō te Tino ’Ahuru ma Piti ’āpōsetolo :

« E mea ta’a ’ē roa te ha’avāra’a a te Fatu i tā tātou. E ’oa’oa ’oia i te tāvini tura, ’eiaha i te tāvini tura ha’apa’o noa iāna iho.

« Te feiā ha’eha’a i roto i teie nei orara’a, e korona nō te hanahana tō rātou i roto i te orara’a a muri a’e ».²

I teienei, ’ua ’īritihia te mau pāpa’a parau a Moroni i roto i te Buka a Moromona, ’e e nehenehe tātou e fāri’i i te hō’ē ’itera’a pāpū nō te parau mau o te reira, mai te au i te fafaura’a tā Moroni i vaiiho i roto i tāna mau ’api hope’a : « ’E ’ia fāri’i ’outou i teie mau mea, tē a’o atu nei au ia ’outou ’ia ani atu ’outou i te Atua, i te Metua mure ’ore, nā roto i te i’oa o te Mesia, e ’ere ānei teie mau mea i te parau mau ; ’e mai te mea e ani atu ’outou ma te ’ā’au hina’aro mau, ma te mana’o pāpū, ’e ma te fa’aro’o i te Mesia, e fa’a’ite mai ïa ’oia i te parau mau nō te reira ia ’outou, nā roto i te mana o te Vārua Maita’i » (Moroni 10:4).

Tē mana’o ra ānei ’outou i te tahi taime ē, e mea teimaha tā ’outou mau hōpoi’a, ’aita rā tā ’outou mau tauto’ora’a i ’itehia ? ’Ua ’ite te Metua i te ao ra ia ’outou, ’e ’ua ’ite ’oia i te maita’i tā ’outou e rave nei. ’A rave ai ’outou i te maita’i (hi’o Te mau ’Ohipa 10:38), te tāvinira’a ma te fa’a’oto ’ore i te pū, ’e te pātēra’a i te mau pāpa’ira’a mo’a, e nehenehe te Vārua Maita’i e ha’apāpū mai ia ’outou i te parau mau o te ’evanelia.

Te mau tamari’i a Mary ’e ’o Peter Whitmer metua.

Christian Whitmer	Jacob Whitmer	John Whitmer	David Whitmer	Catherine Whitmer (Page)	Peter Whitmer	Elizabeth Ann Whitmer (Cowdery)
Hō’ē o nā ’ite to’ova’u	Hō’ē o nā ’ite to’ova’u	Hō’ē o nā ’ite to’ova’u	Hō’ē o nā ’ite to’otoru	’Ua fa’aipoipo ia Hiram Page, hō’ē o nā ’ite to’ova’u	Hō’ē o nā ’ite to’ova’u	’Ua fa’aipoipo ia Oliver Cowdery, hō’ē o nā ’ite to’otoru