Liahona
Mauaina o le Malamalama o le Faaola i le Tusi a Mamona
Ianuari 2024

“Mauaina o le Malamalama o le Faaola i le Tusi a Mamona,” Liahona, Ian. 2024.

Mo Mātua

Mauaina o le Malamalama o le Faaola i le Tusi a Mamona

Ata
aiga o loo faitauina faatasi ia tusitusiga paia

Mātua Pēlē,

O le lomiga o lenei masina o loo maua ai ni malamalamaaga e uiga i le Tusi a Mamona o se mataupu aoaoina o le Sau, Mulimuli Mai ia te A’u mo le 2024. O tusiga o loo i lalo e talanoaina ai ki mo le mauaina o le malamalama ma le upumoni i se lalolagi e masani ona faatumulia i le pogisa ma le le mautonu.

Talanoaga o le Talalelei

Sailia o le Malamalama o le Faaola

Mafaufau e faasoa atu i lou aiga nisi o manatu mai le tusiga a Peresitene Eyring o loo i le itulau e 4, ma talanoaina le matafaioi o loo faia e le malamalama i o tatou olaga. Toe iloilo le tala a Kamryn e uiga i le mauaina o le Faaola i le pogisa. E mafai faapefea e lou aiga ona maua le malamalama o le Faaola e ala i lau suesuega o le Tusi a Mamona i lenei tausaga?

O Fea e Saili i ai mo le Upumoni

O le Atua o le punavai o upumoni uma, ma e mafai ona tatou aoaoina Lana upumoni e ala i le sailia ma le filigā. Sa manaomia e Elder ma Sister Silva ona filifili po o fea e nonofo ai ina ua foi mai se misiona, o lea sa la sailia ai le taitaiga mai le Alii (tagai i le itualu 20). O anafea na tuuina atu ai e le Alii ia te oe le taitaiga sa e manaomia?

Tagai Atili i Au Suesuega o le Talalelei

Pe a asiasi atu i se falemataaga o faatufugaga, e masani ona faanatinati tagata e vaai i mea uma latou te mafaia, ma mafua ai ona latou misia le matagofie o le faatufugaga. E faapena foi, e mafai e le aufaitau o le Tusi a Mamona ona misia upumoni taua pe afai latou te faanatinati le faitauina. O a ni auala e mafai ona fesoasoani ia i tatou e vaavaai totoa ai i lenei tusi o tusitusiga paia? Tagai i le itulau e 12 mo nisi o manatu.

Mea Mālie Faaleaiga i le Sau, Mulimuli Mai ia te A’u

O le Ala Lauitiiti ma le Vaapiapi

1 Nifae 8; 11; 15

O le ’ai i le fua o le laau o le ola o se faatusa o le filifilia o le ola e faavavau e ala ia Iesu Keriso (tagai i le 1 Nifae 15:36; Mataupu Faavae ma Feagaiga 14:7). Faataitai le gaoioiga lenei e aoao ai pe faapefea e le ai uamea (le afioga a le Atua) ona taitai atu ai i tatou i lenei meaalofa silisili a le Atua.

  1. Faapipii se ata o le laau o le ola i luga o se puipui.

  2. Faapipii se manoa (e faatusa i le ai uamea) i lalo o le ata, ma fai i se tasi e tu i le isi itu o le potu ma le isi pito o le manoa.

  3. Taimi pe o le a le umi e alu ai se tamaitiiti o fusi mata e savali mai le tasi itu o le potu i le laau o le ola e aunoa ma le pipii i le manoa.

  4. Ia taimi nei loa po o le a le umi e oo atu ai i le laau o le ola a o pipii i le manoa.

Talanoaga: O le a se mea e mafai ona tatou faia e pipiimau ai i le ai uamea ma aua lava nei faamamuluina?