“Ol Riferol insaed long Kalabus,” Liahona, Septemba 2023.
Ol Eksampol blong Fet
Ol Riferol insaed long Kalabus
Insaed long kalabus, Sista Llanos i neva lusum lukluk blong hem long stamba wok blong hem olsem wan we i ripresentem Jisas Kraes, blong stap tijim olgeta we oli stap wetem hem long semmak rum blong kalabus abaot tabu aedentiti blong olgeta mo olsem wanem blong prea.
Foto i kam long Amelia Lyon
Sista Aketzaly Llanos i wan gudfala eksampol blong ol misinari wetem wan testemoni we i stap fetful long hem. Oli asaenem hem blong go long Kosta Rika San Jose Is Misin, be hem i givim seves wetem waef blong mi, Janeen, mo mi long Meksiko Aguascalientes Misin blong wan yia bifo hem i kasem visa blong go long Kosta Rika.
Long Epril 2022, mifala i talem tata taem Sista Llanos i go insaed long wan plen blong Meksiko Siti, long ples ia bae hem i save kasem wan flaet we i go long Kosta Rika. I no kasem 24 aoa yet afta we mifala i talem tata, be, polis long Meksiko Siti, oli kolem mitufala.
“Mifala i arestem Aketzaly Llanos long eapot from hem i tekem wetem hem wan bolet blong ol ami,” oli talem. “Hemia i agensem loa blong kantri, mo bae oli pasem hem long kot.”
Kwiktaem mi kondaktem eria Jos ofis, mo oli pem wan loya blong hem i lukaotem blong oli rilisim Sista Llanos. Loya ia i no wan memba blong Jos. Hem i komitim hemwan blong helpem mifala be hem i soem se bae i save gat nogud nius tu. Hem i eksplenem se blong karem long yuwan wan bolet blong ol ami, mo sapos yu wan ami, i wan series kraem, nomata wanem hem i wantem mekem wanem wetem.
Afta, Sista Llanos i talem long mitufala se hem i bin pikimap bolet ia long wan rod long las eria blong hem. Mi ting se bae i wan memori. Bolet ia, nomata wanem, be i tekem tugeta memori ki jen we oli salem aotsaed long wan olfala ples blong maen long wan eria we hem i bin stap long hem. Ol man blong Gavman we oli stap traem blong faenemaot stret risen, oli tritim hem olsem wan teroris. Sam dei i pas, oli muvumaot Sista Llanos long kalabus blong eapot i go long wan hae sekiuriti kalabus long ples ia, ol woman we oli komitim ol series kraem oli stap long hem.
OI Prea blong Fet
Kwiktaem ol prea blong rilisim Sista Llanos i stat. Mi mo Janeen, mitufala i invaetem ol 115 misinari we oli stap givim seves long misin blong mifala blong eksasaesem fet se bae mifala i save luk wan merikel, sapos i tingting blong Lod. Mi kondaktem ol misin presiden long Meksiko Siti, Kosta Rika San Jose Is Misin, mo Misinari Trening Senta long Meksiko, mo oli invaetem ol misinari blong olgeta blong joen wetem mifala long prea.
Insaed long ol wol blong kalabus, Sista Aketzaly Llanos i neva lusum lukluk blong hem long stamba wok blong hem olsem wan we i ripresentem Jisas Kraes.
Insaed long kalabus, Sista Llanos i neva lusum lukluk blong hem long stamba wok blong hem olsem wan we i ripresentem Jisas Kraes. Hem i tijim ol naen woman we oli stap long semmak rum blong kalabus blong prea long moning mo long naet olsem wan grup, evri dei. Hem i tijim olgeta tu abaot tabu aedentiti blong olgeta.
Wan long ol woman ia i talemaot se, “Mi, mi wan nogud woman from samting we mi mekem blong kam long ples ia, mo God i no laekem mi.” Sista Llanos i lukluk stret long ae blong hem mo talem, “No. Yu no wan nogud woman. Yu wan woman we i bin mekem wan samting we i nogud. Be yu wan pikinini gel blong God, !mo Hem i lavem yu!
Wan narawan i tokbaot wan drim we hem i luk bifo oli arestem sista Llanos. Woman ia long rum blong kalabus i drim se wan grin pijin i bin flae i kam insaed long kalabus blong helpem hem. Bifo sista Llanos i bin joenem Jos, hem i bin gat wan pikja blong wan grin pijin we oli mekem olsem tatu long baksaed blong hem. Taem we woman ia long rum blong kalabus i luk tatu ia, hem i save se hem i mas lisin long misinari mesej blong Sista Llanos.
Sista Llanos i tijim hem abaot Restoresen blong gospel blong Jisas Kraes mo givim wan kopi blong Buk blong Momon long hem we hem i bin karem i kam wetem hem long kalabus—semmak kopi we ol sista misinari oli bin givim long Sista Llanos faef yia bifo hem i faenemaot abaot Jos.
Oli putum kwik long taemtebol wan fas tes long Meksiko Siti. Mi mo Janeen i go blong testifae mitufalawan. Taem mitufala i mitim tim blong gavman aotsaed long kot haos, i klia se loya i fraet tumas, i go kam antap mo daon long saed blong rod.
Mi tekem hem i go long saed mo talem: “Tedei bae yu filim moa gud mo gat moa pis bitim we yu eva filim bifo long wan kot rum. Bae mi talem long yu from wanem bae i olsem. Moa long 500 misinari mo ol famli blong olgeta oli stap prea from yu mo sakses blong yu tedei. Oli stap prea tu se bae jaj i gat wan sopsop hat mo se bae hem i rilisim Sista Llanos long kalabus.”
Ae blong loya i fulap long wota blong ae, mo hem i talemaot tangkyu from fet mo ol prea blong plante pipol long bihaf blong hem.
Long 10:00 a.m. ol kwestin i stat, be oli askem mi blong stap aotsaed kasem taem blong mi blong testifae. Tu longfala aoa i pas finis. Afta, sekiuriti blong kot rum i kamaot mo talem se jaj i no nidim blong harem testemoni blong mi—hem i mekem desisen blong hem finis.
Mi wari tumas mo go insaed long kot rum, mo jaj i stat blong toktok. Hem i tokbaot loa ia we Sista Llanos i bin brekem mo abaot ol series panismen we bae hem i fesem.
“Hem i no wantem lisin long evri samting ia,” hem i gohed, “Mi biliv se pruf hem i gudfala fasin blong Sista Llanos we hem i bin soem.” Afta, hem i kwotem wan pat blong loa we i no klia we i letem hem blong givim sore, mo kwiktaem hem i rilisim Sista Llanos.
Sista Llanos wetem Sista Janeen Redd, we sista Llanos i foldaon long han blong sista Janeen afta we oli talem se hem i rilis.
“God i stap long Saed blong Mi”
!Hemia i merikel we yumi luk! Sista Llanos i kam fri bitim we bae i stap long kalabus blong fo o plante yia. Afta long wanem we oli harem long kot, loya blong hem i talem se dei ia i wan long ol nambawan dei we hem i gat long Profesonol wok blong hem.
“I tru, mi bin filim God long saed blong mi,” hem talem. “Mi wantem lanem moa abaot ol bilif blong yufala.”
Mi invaetem hem blong kam long Tempol blong Meksiko Siti long Senta blong ol Visita. Mi talem long hem, “Bae yu luk ol narafala misinari long ples ia we oli gud semmak olsem Sista Llanos.” “Bae yu luk laet we saen long ae blong olgeta, mo bae yu askem yuwan se, from wanem i olsem.”
Twelef aoa i pas, Sista Llanos i bin rilis, i werem yet ol klos blong kalabus. Hem i foldaon long han blong Janeen. Long taem we mifala evriwan i stop blong krae, mo filim se inaf blong toktok, Sista Llanos i talemaot se, “Presiden, !mi gat sam riferol long kalabus!”
Eksperiens ia i konfemem se “God i no bin stop blong stap wan God blong ol merikel” (Momon 9:15). Mi no gat tu tingting se fet mo ol prea blong plante gudfala pipol ia oli bin helpem wan loya mo toktok from kastoma blong hem mo mekem hat blong jaj i kam sopsop.
From se oli arestem Sista Llanos, sam long ol woman we oli stap long kalabus oli bin kasem hop tru long gospel blong Jisas Kraes, wan loya i planem wan sid blong fet, mo bilif blong yumi i kam strong se God i save yusum yumi blong mekem wok blong Hem i go moa, nomata weaples yumi stap long hem.
Sista Llanos long Tijuana, Meksiko Tempol.