iTukutuku Vakavula ni Liaona, Epereli 2023

Vakabauti Jisu Karisito

italanoa kei Jisu

O Jisu Karisito, mai vei Harry Anderson

Na vakabauti Jisu Karisito sa imatai ni ivakavuvuli ni kosipeli (raica na Yavu ni Vakabauta 1:4). Ena vukei keda na noda vakabauta meda digitaka meda lesu vua na Tamada Vakalomalagi. E rawa ni da cakacaka me vaqaqacotaki na noda vakabauta ena noda bula taucoko.

era soqoni wavokita e dua na ivola na gonelalai kei na itabagone

A Cava na Vakabauta?

Na vakabauta e dua na ka vakadinati dei se nuitaki. Na vakabauta e oka kina na vakanuinuitaki kei na vakadinati ni veika e dina, ena gauna mada ga eda sega ni rawa ni raici ira se kilai ira vakavinaka sara (raica na Iperiu 11:1; Alama 32:21).

iyaloyalo kei Jisu Karisito

iTukutuku mai na Karisito kei na Cauravou Vutuniyau, mai vei Heinrich Hofmann.

Vakabauta e Yavutaki vei Jisu Karisito

Me veimuataki ki na veivakabulai, sa dodonu me yavutaki na noda vakabauta vei Jisu Karisito vaka noda iVakabula ka Dauveivueti. Na vakabauti Karisito e kena ibalebale na noda nuidei Vua. Kena ibalebale na vakararavi vakatabakidua Vua—vakararavi ki na Nona kaukauwa, vuku, kei na loloma. E oka talega kina na vakadinati kei na vakamuri ni Nona ivakavuvuli.

vulica tiko na ivolanikalou na veiwatini

Vakalevutaka na Noda Vakabauta

Na vakabauta e isolisoli mai vua na Kalou, ia sa dodonu me da vakasaqara ka cakacakataka me kaukauwa tiko kina. E rawa ni da vakalevutaka na noda vakabauta ena noda masu ka vulica na ivolanikalou kei na nodra ivakavuvuli na parofita edaidai. Eda na vaqaqacotaka talega na noda vakabauta ni da bula dodonu ka maroroya tiko na noda veiyalayalati.

Bula ena Vakabauta

Na vakabauta e levu cake sara mai na vakadinata walega. E oka kina na cakacakataki ni vakadinata oqori. Eda vakaraitaka na noda vakabauta ena ivakarau ni noda bula. Na vakabauti Jisu Karisito e vakauqeti keda meda muria na Nona ivakaraitaki uasivi. Na noda vakabauta e muataki keda meda talairawarawa ki na ivakaro, veivutunitaka noda ivalavala ca, ka cakava ka maroroya na veiyalayalati.

Vakabula ko Jisu e dua na tagane mataboko

Na Vakabauta e Rawa ni Veimuataki ki na Cakamana

Na vakabauta dina e kauta mai na cakamana, ka rawa ni oka kina na raivotu, tadra, veivakabulai, kei na isolisoli tale eso e lako mai vua na Kalou. E tu ena ivolanikalou e vuqa na kedra italanoa na tamata era ciqoma na cakamana mai vua na Turaga ena vuku ni nodra vakabauti Koya. Raica na “Cakamana” ena iDusidusi ki na iVolanikalou me baleta eso na ivakaraitaki.

Na Vakabauta e Rawa ni Kauta Mai na Vakacegu

Na vakabauta na Kalou kei na Nona ituvatuva ni veivakabulai ena rawa ni vaqaqacotaki keda ena gauna ni noda bolebole. Na vakabauta e rawa ni solia vei keda na kaukauwa me da toso ki liu ka sotava na veika dredre ena yaloqaqa. Kevaka sara mada ga e veilecayaki tu na veisiga ni mataka, e rawa ni solia vei keda na vakacegu na noda vakabauta na iVakabula.

e tauri luvena o tama ni rau raica tu na droini kei Jisu

Na Vakabauti Jisu Karisito ena Veimuataki ki na Veivakabulai

Na cakacakataki ni vakabauti Karisito ena veimuataki ki na noda vakabulai. Sa vakarautaka na Karisito na sala meda ciqoma kina na bula tawamudu. Ni da bula ena noda vakabauti Koya, sa rawa ni vosoti na noda ivalavala ca ka lesu ka laki bula tale kei na Kalou.

Mai na iVolanikalou

Na vakabauta e lako mai ena rogoci ni vosa ni Kalou (raica na Roma 10:17).

Na vakabauta e sega ni cakacakataki sa mate wale (raica na Jemesa 2:17–18).

Sa rawa ni cakava na ka kecega ena vukuda na Turaga kevaka eda vakabauta (raica na 1 Nifai 7:12).

Veivosa eso me Nanumi

Veiyalayalati: e dua na yalayala tabu eda cakava vata kei na Kalou. Eda cakava na veiyalayalati ena gauna ni cakacaka vakalotu me vaka na papitaiso kei na edaumeni ni valetabu.

Cakamana: e dua na ka veivakurabuitaki a yaco ena kaukauwa ni Kalou. Eda raica na cakamana ena vuku ni noda vakabauta na Turaga.

Yavu ni veivakabulai: Na ituvatuva ni Kalou me vukei ira na Luvena me ra ulabaleta kina na ivalavala ca kei na mate me ra lesu tale Vua. Sa ka bibi na vakabauti Jisu Karisito ena ituvatuva oqo baleta mai na Nona Veisorovaki duadua ga eda na vakabulai rawa kina.

Vakaraica Eso Tale

Kevaka e tiko na nomu vakatataro me baleta na vakabauta, e rawa ni o veitalanoa kei ira na nomu turaga se marama dauveiqaravi, nomu iliuliu ni tabanalevu se tabana, se o ira na daukaulotu. E rawa talega ni o kunea na ivakavuvuli kei na ivurevure tale eso me baleta na vakabauta ena ChurchofJesusChrist.org se ena Gospel Library app.

© 2015 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me vakaValagi: 6/19. Vakadonui me vakadewataki: 6/19. Vakadewa ni Monthly Liahona Message, April 2023. Language. ,17464 858