Te itoito ’ia ani

Nā Lillian Arp

Tō Te Awhina ’aiūra’a fifi mau. ’Ua fa’a’amuhia ’ōna nā tāna māmā rū’au i te 8ra’a o tōna matahiti, mai reira mai, tauiui noa te ’utuāfare, i reira te rā’au ta’ero ’e te ’āhitahita i te mea ’ōhie a’e ’ia ’itehia mai i te mā’a ’e te fa’aro’o. « ’Aita e paraparaura’a nō te Atua ; ’aita ato’a e paraparauhia nō te rapa’aura’a ’e te fa’a’orera’a hapa… I ora na vau i roto i te tāiroiro ’e te mana’o ’ino’ino nō ’ore ā vau i ha’api’i-maita’i-hia a’e ».

I tōna ’āpīra’a, tei roto ’oia i te hepohepo. « ’Aita tā’u e arata’i, ’aore e pāruru, ’e ’aita e hi’ora’a maita’i. E ta’a ’ore tō’u ’e ’aita e vāhi nō te ’itera’a i te hau », tē ha’amana’o nei ’oia. Hō’ē ana’e tāna orara’a i ’ite i terā ra tau, i te hope’a, ’ua arata’i te reira iāna i te fare ’āuri nō tōna fifi e te ’ava.

’Aita i maoro i tōna tu’u-ra’a-hia i rāpae ’a fārerei ai ’oia i te mau misiōnare a Te ’Ēkālesia a Iesu Mesia i te Feiā Mo’a i te mau Mahana Hope’a nei. Fārerei pinepine noa nei ’oia ia rātou, ē ’ua mātau rātou iāna, i teie rā mahana ’aita ’ōna i ’ite nō te aha hina’aro ai tōna ’ia pi’i ia rātou ’ia haere mai.

« E uira’a tā’u, » tē ha’amana’o rā ’ōna. « E mana’o paha ’outou ē, e uira’a mā’au ri’i teie, terā rā nō’u tei ora mai ma te Atua ’ore… ’Aita vau i ’ite ri’i noa a’e ». Parau mai ra ’ōna i te mau misiōnare : « Mai te peu noa atu e ’ite ’outou i te pāhonora’a o tā’u uira’a, e fa’aro’o vau i [tā ’outou parau poro’i]».

Ui mai ’oia : « E tāne ānei te Atua ’aore rā e vahine ? »

Pāhono maira hō’ē o nā misiōnare : « E Metua tāne here te Atua i te ra’i ».

’Ua hōpoi mai teie pāhonora’a te tahi māramarama ’e te hau ia Te Awhina. Hina’aro a’era ’oia ’ia ’ite rahi atu ā. « Nā reira ïa », tāna parau i te mau misiōnare. « E fa’aro’o ïa vau ia ’outou ».

I teienei, ’auhuru matahiti tō Te Awhina bāpetizora’a hia ’ei melo nō Te ’Ēkālesia a Iesu Mesia i te Feiā Mo’a i te mau Mahana Hope’a nei. ’Aita i maoro i muri mai i tōna bāpetizora’a ’ua riro ’oia ’ei misiōnare tāmau i roto i te misiōni nō Brisbane ’Auterāria. Mai reira mai, i te matahiti 2020, ’ua fa’aipoipohia ia Josh, « te tāne o tā’u i moemoeā noa na ». I teienei rā, tē hina’aro nei ’ia tā’atihia te tahi i te tahi—nō teie taime ’e nō te tau a muri atu—’oi’oi noa atu ’ia ’īriti fa’ahou te hiero nō Hamilton niuterani.

’Ia ferurihia ana’e te ha’amatara’a fa’ahiahia o tōna tere ma te hō’ē noa uira’a ’ōhie, tē ha’apāpū nei Te Awhina ē, ’ua roa’a ia Iosepha Semita i tāna heheura’a hanahana roa a’e nō tōna itoito ’ia ui atu i te Atua tāna uira’a… ’e mai ia Iosepha Semita, ’ua ’apo mai o Te Awhina ē, te tahi taime ’aita te mau pāhonora’a e tae ’ōhie noa mai.

I tō te mau misiōnare fa’ata’ara’a atu i te parau nō te parau pa’ari iāna, tā Te Awhina parau mātāmua ’oia ho’i : « ’Aita ïa, māuruuru ». E noa atu rā ’oia i hepohepo i te fa’aru’e i te rā’au ta’ero, ’ua maere ’oia i te huru vitiviti iāna ’ia ha’apa’o i te parau. E nehenehe e parau ē, « I te hopera’a hoa i te ha’api’ira’a [misiōnare], ’ua vaiiho vau tā’u taofe », ma te hō’ata.

E ’ere atoa i te mea ’ōhie i te fa’a’āfaro, terā rā, tāmau maite rā Te Awhina ē tae atu i te rē o te fa’aorara’a ’e te fa’a’orera’a hapa nā roto i te tāra’ehara a Iesu Mesia. I te roara’a o te mau matahiti, ’ua roa’a mai iāna i te pūai ’e te tīa’ira’a ’ia ’ite ana’e ’ōna ē, ’ua hepohepo ato’a te tamaiti ’āpī Iosepha Semita i roto i te pōiri ta’ota’o, nā mua noa a’e i te temeio o te ’Ōrama Mātāmua, ’ōrama tei ’īriti i te tau tu’ura’a ’evanelia ’āpī i ni’a i te fenua nei.

Nā te mau parau a Elder Jeffrey R. Holland i tauturu ia Te Awhina i te hāro’aro’a i teie hōho’a :

« O teie ho’i te parau mau ’ōhie ’e te māramarama tē tae mai i mua noa mai i te mau taime faufa’a, te mau taime pae vārua rahi iho ā rā, te ’ati, te pāto’ira’a, ’e te pōiri ta’ota’o. Tē vai ra i roto i te orara’a nei te tahi mau tupura’a, ’e e tae mai i te taime iho tei roto i te fa’aotira’a faufa’a mau ’aore rā, i roto i te ta’ahira’a faufa’a roa o te orara’a nei ».¹

Tē parau nei Te Awhina ē : « ’A fa’ahanahana ai au i te ’auhurura’a o te matahiti ’a tomo ai au i te nana nei, ’ua fāri’i au i te fa’aorara’a tei tae mai nā roto ana’e i te haerera’a mai ’a hi’o ai tātou i te Mesia ’e ’ia tātarahapa ». « Tē māuruuru nei nō te mau misiōnare, nō te mau parau mau tei ha’api’ihia iā’u… ’e nō te tauira’a tā te ’evanelia i rave i roto i tō’u orara’a ».