’Ia tae mai te ma’i tau

Nā Norman C. Hill

E nehenehe te fa’arurura’a i te ’ati i te mau mahana ato’a e tauturu ia tātou ’ia tupu i te rahi i roto i te aroha, te aumihi ’e te itoito.

Hōho’a

te rima o te hō’ē ta’ata e tāpe’a ra i te rima o te tahi atu ta’ata

Hou ’oia ’a fa’aru’e mai ai nā roto i te hō’ē ma’i ha’aparuparu, ’ua ’ata’ata pinepine tō’u metua vahine ’e ’ua nā ’ō ’oia : « ’Aore hō’ē o tātou e haere ’ē atu i teie vahi ma te ora nō reira, ’a fa’a’ohipa maita’i i te mau mea i mauhia e tātou ».

Tei roto te reira i tōna mau mahana maita’i. ’E i roto i tōna orara’a, e rave rahi mahana maita’i tōna.

’Ua tupu ato’a rā te mau mahana e ’ere i te mea ’oa’oa roa. I taua mau mahana ra, e parau mai ’oia : « ’A rave i te mea e haere mai ’e ’a hi’o e nehenehe ānei tā ’oe e rave i te tahi maita’i i roto i te ao nei ».

Nā te ao ato’a nei, e mea ora maoro a’e te ta’ata i tō muta’a ihora.¹ Noa atu rā tē ora maoro nei tātou, e riro ato’a tātou i te fāri’i i te hō’ē ma’i tau : te ma’i ’ōmaha tihota, te Parkinson, te ma’i māriri ’aita’ata, te ’āravī, te Alzheimer ’e mea roa atu ā te tāpura. Nō reira, ’ia tae mai te ma’i tau, nāhea tātou e pāhono atu ?

’A haere i mua ma te fa’aro’o

« ’A fa’aro’o i te pehe, noa atu ē, ’aita ’outou e nehenehe e pi’i i te pehe », tē parau ra te hō’ē taea’e tei fa’ahepohia ’ia rave i te hō’ē fa’aeara’a ’ohipa nō te ma’i, ’a ho’i ai tāna vahine e rave i te ’ohipa nō te turu i tō rāua ’utuāfare. Tē ti’aturi nei ’oia ē, pinepine roa tātou i te ’ō’omo i te hō’ē hōho’a mata ’oa’oa ’o tē tāpe’a ia tātou ’ia ha’apa’o i tō tātou mau mana’o ’aore rā te ha’amaita’ira’a i tō tātou hi’ora’a. « E ’ore tātou e haere i mua ma te fa’aro’o, e fa’aea noa rā tātou ma te tīa’i i te hō’ē temeio ’aore rā e amuamu ’ia ore ana’e te hō’ē e tae mai », tē nā reira ra ’oia. E fa’aruru ’oia nā roto i te fa’aro’ora’a i te mau pāpa’ira’a mo’a ’e te mau a’oraa o te ’āmuira’a rahi ’e nā roto i te fārereira’a i te mau hoa ’e te ’utuāfare nā roto i te niuniu.

« E nehenehe te huru terera’a o te mau mahana ato’a e fa’atopa iā’u », tē parau ra te hō’ē tuahine e ma’i-tāmau tō tāna tāne. « ’Aita roa atu te ea o tā’u tāne fa’aipoipo i maita’i a’e. Tē fāri’i nei au i te reira. Terā rā, te mea teimaha o te mau ’ohipa mātarohia ato’a, e mea rohirohi ïa i te pae ferurira’a, te pae tino ’e i te pae vārua ». E mea au nāna te mau fārereira’a a te mau tuahine aupuru. « ’Ia tae ana’e mai rātou, e tūrama mau te reira i tō’u mahana ».

« I te tahi taime, e mo’e te mau mea ia māua tā’u vahine fa’aipoipo ’e e riri māua i te tahi e te tahi », tē parau ra te tahi atu taea’e pa’ari. « E ’oto māua i te ha’amo’era’a, e tātarahapa māua i muri iho i te mau parau riri tā māua e parau i te tahi e te tahi ». ’Ua ha’api’i mai rāua ’ia pāpa’i i te mau parau nō te tauturu ia rāua ’ia ha’amana’o. E fa’ati’a rāua i te tahi ’e te tahi ’ia rave i te taime nō te tāmarū hou ’a paraparau ai. « ’E », tē nā ’ō ra ’oia, « ua ha’api’i hau atu ā māua i te faufa’ara’a o te parau, ‘māuruuru’, ’e ‘’ua here au ia ’oe’ ».

’Ua ora te tahi atu nā ta’ata fa’aipoipo pa’ari mai te au i tā rāua moni tamau ’e tae roa ē ’ua tāta’ipīti te ho’o o tā rāua mau rā’au. Māuruuru i te mau melo o te ’utuāfare ’e i tā rātou pāroita, ’ua pāhonohia tō rāua mau hina’aro. « I te ha’amatara’a, ’ua huru ’ē māua i te anira’a i te tauturu, i tā māua iho ā rā mau tamari’i », te parau ïa a te taea’e. « ’Ua hina’aro rā te mau ta’ata ato’a e tauturu ».

Hōho’a

Iesu e fa’aora ra i te hō’ē ta’ata

Tuha’a nō He Healed Many of Diverse Diseases [’Ua fa’aora ’oia e rave rahi ma’i], nā J. Kirk Richards, e’ita e nehenehe e tāhoho’a

Te mau mana’o ’e te mau hi’ora’a

Teie te tahi mau mana’o ’e mau hi’ora’a nō roto mai i te feiā e fa’aruru nei i te ma’i tāmau :

Te feiā e fāriu atu i ni’a i te Fa’aora, e ’ite mai rātou i te tīa’ira’a. « ’Ua mana’o vau ē, ’aita e ta’ata e nehenehe e māramarama i te mea tā’u e fa’aruru ra », tē parau ra te hō’ē taea’e tei ro’ohia i te ma’i ha’aparuparu (CFS). « I te hō’ē sābati ’a rave ai au i te ’ōro’a mo’a, ’ua ’ite a’era vau ē, ’ua māramarama te Fa’aora i tō’u māuiui. ’Ua ’ite au ē e nehenehe tā’u e fa’a’oroma’i ma te ha’afātata atu iāna ». (Hi’o Alama 7:11–12 ; Te Ha’api’ira’a Tumu ’e te mau Fafaura’a 121:8 ; 122:8.)
E rahi mai te aumihi i roto i te feiā e « fa’a’oroma’i mā te maita’i » (Te Ha’api’ira’a Tumu ’e te mau Fafaura’a 121:8). « ’O vai tā tātou e hi’o nei, i te tau ’oto ’e te ’ati, nō te tauturu ’e te tāmāhanahanara’a ?… ’O te mau tāne ’e te mau vahine tei māuiui, ’e i roto i tō rātou mau ’itera’a nō te māuiui, tē hōpoi mai nei rātou i te faufa’a nō tō rātou here ’e tō rātou mau tāpa’o aroha ’ei ha’amaita’ira’a nō te feiā i roto i te ’ati i teienei. E nehenehe ānei tā rātou e rave i te reira ’āhiri ’aita rātou iho i māuiui ? »²
’A ta’ahi hō’ē ta’ahira’a i te taime hō’ē. « Tau matahiti i ma’iri a’e nei, e mea teimaha roa te māuiui ’aita vau i ’ite nāhea i te fa’a’oroma’i fa’ahou ā i te reira. ’Ua ha’amata vau i te fa’atupu i te mana’o ’ōnohi », te parau ïa a te hō’ē tuahine tei māuiui i te mau ma’i roro e rave rahi (MS). ’Ua hi’opo’a ’oia iāna iho i roto i te hō’ē nohora’a ea i te pae ferurira’a i te fare ma’i. I roto i te a’ora’a, e ’ere noa tāna parau tumu ē « ’ia ha’apa’o e tae noa atu i te hope’a » (1 Nephi 22:31) terā rā e « ha’apa’o e tae noa atu i te hope’a o te mahana ».
Fa’ananea i te mau hina’aro ’āpī ’e ’imi i te mau rāve’a ’āpī nō te tāvini. ’Eiaha e ’oto nō te mau mea e’ita e nehenehe e rave fa’ahou, ’a ’ite mai i te mau hia’ai ’āpī. ’Ua ’ite te hō’ē tuahine i ro’ohia i te MS ē e’ita tāna e nehenehe e rave i te mau mea o tāna i here nā mua atu, mai te fa’ahorora’a i te pua’arehenua ’aore rā te ha’uti tā’iri pōpō. ’Ua ha’api’i rā ’oia i te pāpa’ira’a hinu. I teienei tē fa’a’ohipa nei ’oia i tāna tārēni i fa’atupu-’āpī-hia nō te hāmani i te mau pāpa’ira’a mo’a o te Buka a Moromona nō tōna ’utuāfare.

’Ia riro ana’e te ma’i tau ’ei ’ohipa nō te orara’a, e fifi rahi mau ïa. Nā roto rā i te fa’aro’o, te tīa’ira’a i te Mesia, ’e te hina’aro ’ia tāmau noa i te tāvini, e nehenehe te fa’arurura’a i te ’ati i te mau mahana ato’a e tauturu ia tātou ’ia tupu i te rahi i roto i te aroha, te aumihi ’e te itoito.

Tē ora nei te ta’ata pāpa’i i Utah, i te Fenua Marite.