“Wan Paten we I Gat Paoa blong Stap Papa mo Mama,” Liahona, Septemba 2022.
Wan Paten we I Gat Paoa blong Stap Papa mo Mama
Folem ol prinsipol blong gospel mo stadi we i kam sapotem, paten ia blong stap mekem wok blong papa mo mama i save helpem yu blong krietem ol rilesensip we oli gat mining, blong fidim fet mo groap, mo blong bildimap yuniti, mo fasin blong gohed strong insaed long famli blong yu.
Blong stap wan papa mo mama, i gat stamba tingting we i no save finis biaen long hem, mo hem i save givim gud samting, i givim moa laet, mo i givim glad. Be, from se ol famli oli kam, oli defdefren long sep mo saes, mo oli fesem ol jalenj we i blong olgetawan nomo, blong lukaotem ol pikinini i kam antap, i save kam wan bigfala wok, mo samtaem, wan wok we i mekem yumi taed tumas.
Laki nomo, yumi no nid blong mekem wok ia yumiwan.
Wetem Papa blong yumi long Heven we i stap soem rod long yumi, wetem sapot blong Sevya mo gospel blong Hem, mo taem yumi praktisim ol kaonsel we oli kam wetem insperesen ia wetem help blong prea, yumi save faenem help mo hop long wokbaot blong yumi olsem papa mo mama.
Wan Gospel Sapot Paten blong Stap Papa mo Mama
Taem mifala i tekem gospel blong Jisas Kraes mo stap sapotem ol stadi long saed blong wok blong stap papa mo mama, mifala i bin faenemaot trifala prinsipol we oli lidim yumi blong stap fidim filing blong wan pikinini, mo divelopmen blong hem long saed blong spirit. Taem oli putum olgeta tugeta, ol eria ia we oli joen, oli givim wan paten we i gat paoa, we i save helpem ol famli raon long wol.
Paten ia, i strong from se hem i joenem tugeta ol trutok blong gospel wetem ol ki tingting blong stadi ia stap olsem papa mo mama, mo stadi divelopmen blong pikinini. Taem yu stap lukaotem revelesen blong yuwan long wei blong yusum ol prinsipol ia insaed long paten ia, bae i save helpem yu blong bildimap fasin blong famli blong yu i stap gohed strong, mo blong stanemap wan hom we Jisas Kraes i stap long senta blong hem.
Ol trifala prinsipol ia oli:
-
Krietem ol famli rilesensip we i gat lav long olgeta.
-
Fidim fasin blong stap lanem samting mo stap groap
-
Bildimap yuniti mo paoa tru long seves
Paten ia i helpem yumi blong lukluk nomo long ol samting we oli moa impoten. Wanwan pat blong paten ia, i impoten pat we i mekem ol famli oli kam strong moa. Taem oli wok tugeta, oli mekem se i gat ol gudfala rilesensip mo eksperiens, oli helpem ol famli blong save fesem samting we i kam agensem olgeta, mo i bildimap paoa mo strong fasin blong save stanap bakegen.
Taem yumi groap olsem papa mo mama, paten ia i save stap olsem wan tul we i help blong faenemaot bes wei blong tijim mo fidim wanwan pikinini.
Andanit ia, i wan sot lukluk long wanwan pat blong paten ia, mo wan eksampol aot long laef blong Sevya blong save lidim yumi blong save praktisim paten ia insaed long laef blong yumi. Blong gat moa infomesen abaot fasin blong stap papa mo mama, praktis tingting, mo ansa long ol kwestin we oli askem oltaem long saed blong wok blong papa mo mama, yu save go long family.ChurchofJesusChrist.org.
1. Krietem Ol Famli Rilesensip we I Gat Lav long Olgeta.
Prinsipol ia i rimaenem yumi blong putum faswan ol rilesensip blong lav wetem Papa long Heven, Sevya, mo hasban o waef blong yumi, mo ol pikinini blong yumi. Ol famli rilesensip ia oli impoten tumas. Aedentiti mo ol rilesensip we oli no save finis, blong ol pikinini blong yumi, oli kamaot long stamba trutok ia se, “wanwan long olgeta i wan spirit pikinini boe o spirit pikinini gel blong papa mo mama long heven we oli laekem olgeta tumas, mo from we oli olsem wan spirit, wanwan long olgeta i gat gudfala fasin mo oli gat bigfala janis blong save kam olsem wan god.”1
Mifala i leftemap tingting blong olgeta blong kam blong save God mo Jisas Kraes tru long fet, prea, skripja stadi, mo revelesen blong yumiwan tru long Tabu Spirit (luk long Jon 17:3). Yumi save pusum fet taem yumi fidim ol pikinini blong yumi blong “wantem blong biliv” (Alma 32:27) mo stap helpem olgeta blong filim lav ia blong God. Hem i impoten blong ol pikinini blong yumi blong luksave se Papa long Heven mo Sevya, Tufala i andastanem olgeta fulwan, Tufala i lavem olgeta we i stret gud, mo Tufala i wantem blong helpem olgeta blong oli win long laef (luk long Rom 8:38–39).2
Olsem papa mo mama, hem i impoten blong krietem wan rilesensip we i gat lav, wetem wanwan pikinini, we i fulap wetem gud wom filing, mo andastaning. Taem yumi andastanem tingting mo lukluk blong ol pikinini blong yumi, mo yumi respektem olgeta mo lisin long wanem oli stap talem, i fidim wan rilesensip blong lav mo i sef. Ol pikinini blong yumi oli nidim blong save se yumi gat intres long olgeta, yumi kea long wei we oli stap filim, mo we yumi stap ia blong helpem olgeta. Hao yumi mekem ol samting wetem kea wetem ol pikinini blong yumi, i helpem olgeta blong developem wan gud tingting abaot olgetawan, luksave se oli impoten blong taem we i no save finis, mo developem ol rilesensip blong tras wetem God mo Jisas Kraes.
Antap long hemia, ol memba blong famli oli save stap olsem wan bigfala sapot long wanwan long olgeta. Yumi save pusum o promotem ol famli rilesensip taem yumi kam tugeta blong joen long, prea, kaonsel, mo gat gudfala hapi taem.
Luk long Kraes
Jisas Kraes i bin serem lav blong Hem, wan afta wan, tru long wan rilesensip we i mekem man i filim se hem i pat, hem i gat hop, mo hem i kam oraet bakegen. Afta we Sevya i finis blong toktok long Ol Man blong Nifae, wetem lav mo sore, Hem i go aot, mo i bin givhan long wanwan, blong i hilim mo i blesem wanwan. Wetem lav, “hem i bin tekem ol smol pikinini blong olgeta wan afta narawan, mo i bin blesem olgeta, mo i bin prea long Papa from olgeta” (3 Nifae 17:21).
Olsem papa mo mama, yu save blesem ol pikinini blong yu taem yu krietem wan rilesensip blong lav wetem olgeta—wan koneksen we i gat mining, long wan taem afta long narawan.
Ol Aedia blong Wei blong blong Krietem Ol Famli Rilesensip we I Gat Lav long Olgeta
-
Toktok wetem ol pikinini blong yu taem yu lisin gud, taem yu ansa wetem lav, mo taem yu stap folem weaples oli stap long hem blong lukluk long ol nid blong olgeta.
-
Fidim olgeta blong oli gat fet long Papa long Heven mo long Jisas Kraes, mo leftemap tingting blong olgeta blong stap prea mo kasem revelesen we i blong olgetawan, blong mekem ol tabu rilesensip ia oli kam strong moa.
-
Tekem kea long yuwan mo long mared laef blong yu. Hemia bae i helpem yu blong joen gud moa wetem ol pikinini blong yu, mo blong stap wan papa o wan mama wetem hasban o waef blong yu, long yuniti mo lav, we yutufala i ol ikwol patna. Sapos yu yu singgel, lidim famli blong yu wetem fet mo wetem tras long yuwan. Lukaotem moa sapot long olgeta we yu trastem.
-
Pusum o promotem fasin blong filim sef, filim se yu pat, mo gat glad insaed long hom blong yu.
2. Fidim Fasin blong Stap Lanem Samting mo Stap Groap
Fidim ol pikinini blong yu blong oli groap we oli tekem se i impoten blong gat wan fasin we i blong hemwan, mo givim olgeta wan lav ia we i no stap jenis, mo sapotem ol hadwok blong olgeta. Faenemaot weaples ol pikinini blong yufala oli stap long hem long divelopmen blong olgeta, mo mekem sapot blong yu i stret wetem ol spesifik nid blong olgeta. Eksampol blong yu, instraksen, rod we yu soem, mo fasin blong stap leftemap tingting, oli impoten tumas blong fidim paoa mo tras blong pikinini blong yu. Wantem blong save moa, mo gat lav mo sore taem ol pikinini blong yu oli lanem samting tru long eksperiens.
Papa mo mama we i stap fidim pikinini, oli traem tu blong oli no askem tumas samting, oli no letem tumas samting, o oli no givim tumas samting. Putum ol stret baondri, ol evri dei fasin, mo sam samting we i stret we yufala i wantem luk ol pikinini oli mekem; hemia bae i mekem se i gat gud ples blong pikinini blong yu i groap. Semmak olsem Papa long Heven, papa mo mama i mas lukluk moa blong mekem ol pikinini blong tufala i groap, be i no blong givim tumas kamfot long olgeta (luk long 2 Nifae 28:30; Doktrin mo Ol Kavenan 50:24, 40).
Lidim, soem rod, mo wokbaot long saed blong ol pikinini blong yu taem oli stap lan blong folem Jisas Kraes.3 Tijim olgeta long wei blong tanem olgeta i go long Sevya, mo dipen long Atonmen blong Hem blong helpem olgeta blong groap. Sloslo, bae ol pikinini blong yu oli faenemaot, aot long eksampol blong yu, mo aot long eksperiens blong olgeta, se oli “save mekem evri samting tru long Kraes,” we i fogiv, mo i mekem olgeta oli kam strong moa (Filipae 4:13). Blong stap groap mo jenis, i wan had samting, mo i nidim plante praktis. Papa mo mama we i stret mo gud, mo i gat gud tingting, i traehad blong tijim ol pikinini blong tufala, i no nomo long wei blong “wokbaot long ol wei blong trutok,” (Mosaea 4:15) be tu, from wanem bae oli mas mekem olsem. Fidim haremsave blong olgeta, mo sapotem ol stret mo gud fasin blong olgeta blong yusum fridom blong mekem joes wetem evri step we oli tekem.
Luk long Kraes
Jisas Kraes i givim paoa long wei we yu stap groap, taem Hem i lukluk long ol stret mo gud samting we hat blong yu i wantem, mo i stap helpem yu blong mekem olgeta samting ia oli kamtru (luk long 1 Samuel 16:7; Inos 1:12). Lod i bin askem ol disaepol blong Hem, “wan afta long narawan, i talem long olgeta: ‘?Yufala i wantem se mi givim wanem long yufala?’” (3 Nifae 28:1; luk tu long 1 Nifae 11:1–3). Taem yu tingting long kwestin ia, i save helpem yu blong faenemaot mo developem wanem nao yu tekem se i impoten moa. Tingting long wei we Sevya i bin fidim fasin blong stap lanem samting mo stap groap insaed long brata blong Jared, taem Hem i respektem fridom blong Jared blong mekem joes, mo i askem: “?Wanem nao yu wantem se mi mas mekem?” (Ita 2:23). Lod i bin sapotem hem taem Hem i givim hem ol spesifik instraksen, taem we i bin gat nid from, be tu, taem Hem i leftemap tingting blong Jared blong faenemaot sam samting hemwan nomo. Sevya i no fosem, o kontrolem yu, be, Hem i tijim mo i winim tingting blong yu blong yusum fridom blong yu blong mekem joes, blong gud blong yu (luk long Doktrin mo Ol Kavenan 58:26–28).
Leftemap tingting blong ol pikinini blong yu blong groap taem yu sapotem ol stret mo gud tingting blong hat blong olgeta—wan niu kwestin long wan taem.
Ol Aedia blong Wei blong Fidim Fasin blong Stap Lanem Samting mo Stap Groap
-
Poenem ol pikinini blong yu i go long Jisas Kraes, mo tijim olgeta olsem wanem blong kasem mo yusum paoa blong Atonmen blong Hem.
-
Mekem semmak olsem Jisas Kraes, taem yu givim lav, yu soem rod, yu sapotem, mo gat lav mo sore taem ol pikinini blong yu oli stap lanem blong stap folem Hem.
-
Fidim fasin blong groap taem yu sapotem pikinini blong yu long wanem hem i andastanem, i strong long hem, wanem hem i jusum, mo sapotem tras we hem i gat long hemwan.
-
Go long Kraes, taem yu stap lanem gospel blong Hem mo stap praktis blong stap laef folem gospel ia tugeta taem yufala i stap progres folem kavenan rod ia.
3. Bildimap Yuniti mo Paoa Tru long Seves
Jisas Kraes i bin tijim ol disaepol blong Hem blong oli “lavlavem [olgeta], olsem we mi mi lavem yufala” (Jon 13:34). Taem yu stap givim kamfot, stap leftemap tingting, mo givim seves long wanwan long yufala, yu stap spredem klin lav ia blong Kraes, mo yu stap kam moa olsem Hem. Mo tu, God i stap givim plante moa janis long ol pikinini blong yu blong lanem mo groap taem oli joenem wok blong Hem, mo stap mekem ol promes blong olgeta oli kamtru, hemia taem oli givim seves (luk long Moses 1:39; Mosaea 18:7–11). Blong stap serem lav ia blong Kraes, mo stap saenemaot laet blong Hem, bae i jenisim olgeta mo olgeta we oli stap givim seves long olgeta.
Mo tu, famli blong yu bae i glad blong pat long wan wod o branj, wan ples ia we ol pikinini blong yu bae oli givim mo kasem lav mo sapot. Blong stap wivim ol hat “oli joen tugeta blong kam wan long lav, lav we wan i gat long narawan” (Mosaea 18:21) i wivim wan net we i sapotem ol rilesensip mo ol gud eksperiens we oli mekem famli blong yu i kam strong moa. Taem yu givim seves long ol narawan wetem lav ia blong Kraes, yu save help blong bildimap Saeon insaed long famli blong yu, mo insaed long ful sosaeti (luk long Moses 7:18).
Tijim ol pikinini se seves i save kam wan evri dei praktis, be i no wan samting blong mekem wanwan taem. Blong traehad blong givim seves long wanwan long yumi, bae i helpem ol pikinini mo ol yut blong faenem wan laef we i fulwan moa taem we oli stap luk i go bitim nid blong olgeta, mo lukluk i go long nid blong ol narawan. Mi sapraes tumas olsem wanem we, blong stap bildimap Saeon, i stap bildimap wan Saeon pipol.
Luk long Kraes
Sevya i bin invaetem wanwan long yumi blong lavem mo givim seves long ol narawan (luk long Jon 13:34–35). Taem yumi tekpat insaed long wok ia blong Papa long Heven blong sevem ol man, i mekem yumi kam strong moa mo i jenisim yumi. Blong stap mekem bisnis blong Papa blong Hem, (Luk 2:49) i bin pat blong hao Jisas i bin groap mo eksperiens we Hem i bin gat long yangtaem blong Hem, taem we Hem i bin “groap long waes mo long bodi blong hem, mo oltaem God i glad tumas long hem, mo ol man tu oli glad tumas long hem” (Luk 2:52).
Famli blong yu i stap mekem wok blong God blong sevem ol man mo mekem oli kam olsem wan god taem oli stap laef folem gospel blong Jisas Kraes, stap kea long olgeta we oli stap long nid, stap invaetem evriwan blong akseptem gospel, mo blong joenem ol famli long yuniti blong taem we i no save finis.4
Fidim ol pikinini blong yufala blong oli groap taem yufala i joen wan long hae wok ia blong God (Doktrin mo Ol Kavenan 64:33)—wetem wan aksen blong seves we i gat lav, long wan taem.
Ol Aedia blong Wei blong Bildimap Yuniti mo Paoa Tru long Seves
-
Soem lav blong yu long God, mo kam blong save Hem gud moa taem yu lavem mo givim seves long ol pikinini blong Hem.
-
Lavlavem yufala taem yufala i givhan long olgeta raonabaot long yufala, mo stap kea long olgeta we oli stap long nid.
-
Mekem Isrel i kam tugeta taem yufala i serem gospel, taem yufala i lukaotem famli histri blong yufala, givim seves long tempol, mo stap helpem ol narawan blong mekem mo kipim ol tabu kavenan.
-
Bildimap yuniti, mo joenem paoa taem yufala i givim lav, krietem wan filing we oli pat, mo taem yufala i sapsapotem wanwan long yufala.
Yusum Paten Ia Insaed long Hom blong Yu
Olgeta prinsipol ia oli save lidim yu blong lukluk nomo long wok blong yu olsem papa o mama evri dei. Eksampol: tedei, bae yu wantem tingting long wei we yu save minim blong krietem wan rilesensip we i gat moa lav, blong fidim fasin blong lanem samting, o blong bildimap ol narawan. Taem yufala i praktisim o yusum paten ia, bae yufala i save kam antap moa blong lanem gospel, fidim wei we pikinini blong yufala i stap groap, mo i stap leftemap tingting blong lukluk moa aotsaed, we bae i leftemap mo blesem famli blong yufala. Blong stap praktisim o yusum ol prinsipol ia, i save leftemap wei we yufala i stap yusum ol risos blong Jos blong hom we i senta, olsem Kam Folem Mi mo program blong Ol Pikinini mo Ol Yut.
I gat plante wei blong yusum, o praktisim ol prinsipol blong paten ia. Yu mas save stretem sam samting, mo lukaotem revelesen blong yuwan blong stretem i go stret wetem ol nid blong famli blong yu. Paten ia, blong “krietem, fidim, mo bildimap” i no minim blong stap mekem moa. I gat ol samting we bae yu filim insperesen blong ademap long wanem yu stap mekem finis naoia; be paten ia, i stap blong helpem yu blong mekem plante samting aot long taem ia we yufala i gat tugeta.
Taem yu mekem eni samting blong krietem ol rilesensip blong lav, fidim fasin blong stap lanem samting mo stap groap, o bildimap yuniti mo paoa tru long seves, yu stap putum wan strong fandesen blong evri samting we yu stap mekem insaed long hom blong yu.
Ol Gud Papa mo Mama, Oli Save Dipen long Olgeta, be Oli No Stret Gud Evriwan
Hem i impoten blong tingbaot se yu no nidim blong yu stret gud blong yu stap olsem wan gud papa o mama. Be, lukaotem blong yu stap olsem wan gud ples blong kasem lav, mo sapot long ol pikinini blong yu. Blong mekem ol samting wetem pikinini blong yu long ol smol wei, i save mekem samting i defren.
Taem we blong stap papa mo mama i kam olsem wan samting we yu slakem tingting blong yu long hem, tingbaot blong pulum win blong yu i longwan, stop smol taem, mo gohed blong traem. Yu save gohed fored wetem fet, wetem save ia se Sevya i kea bigwan abaot yu mo ol pikinini blong yu, mo bae i dabdabolem ol tru hadwok blong yu mo ol stret mo gud tingting blong hat blong yu.
Hop long Kraes
Taem yu stap traehad blong gohed blong mekem evri samting we yu save mekem blong lavem, fidim, mo mekem wanwan pikinini i kam strong moa, wan afta wan, yu mo famli blong yu bae i save gat hop long Kraes from promes blong Hem we i no save finis we Hem i bin mekem long yu: “No fraet, ol smol pikinini, from yufala i blong mi, mo mi bin winim wol ia, mo yufala i pat blong olgeta ia we Papa blong mi i bin givim long mi” (Doktrin mo Ol Kavenan 50:41).