Na Cava na Lotu Vakamatavuvale?

iVakatakilakila

dabe o tina, tama, kei na goneyalewa lailai e tautuba

Na lotu vakamatavuvale sa gauna biu vakatikitiki ena veimacawa me ra soqoni vata kina na nomu matavuvale. Ena gauna oqo, sa rawa mo “vulica na kosipeli, vaqaqacotaka na ivakadinadina, tara cake na duavata, ka veilomani” (iVoladusidusi Raraba: Veiqaravi Na Lotu i Jisu Karisito ni Yalododonu Edaidai, 2.2.4, ChurchofJesusChrist.org). Na lotu vakamatavuvale e duidui toka ena veimatavuvale yadua. Ia sa kena inaki me vakayagataki na gauna oqo me toro voleka yani ka voleka vua na iVakabula.

Vakavakarau

Vakasamataka e dua na itaviqaravi eratou dau taleitaka na nomu matavuvale kei na dua na ulutaga vakosipeli o gadreva mo dou veivosakitaka ka vulica vata. Digitaka talega e dua na siga kei na gauna ena veimacawa ka rawa ni sota kina e levu duadua na lewe ni matavuvale taucoko. E vakauqeti ira na lewenilotu na Lotu me ra dau lotu vakamatavuvale ena bogi ni Moniti. Ia e rawa ni ra sota na matavuvale ni vinaka duadua vei ira.

iVakatakilakila

e masu tiko na matavuvale

\Masu

E vuqa na matavuvale era tekivu ka tinia na lotu vakamatavuvale ena masu. Oqo e sureta na Yalo Tabu ki na nodra itikotiko. Na lotu vakamatavuvale sa gauna uasivi vei ira na gone kei na uabula me ra vulica me ra masu vata kei na dua na ilawalawa lailai.

Sereivakatagi

E vuqa talega na matavuvale e tiko na kena idola ka isogo ni sere. Era dau digitaka e dua na sere mai na ivola ni serenilotu se na ivola ni sere ni Lalai. E tiko ena Lotu na katokatoni ni serenilotu ena music.ChurchofJesusChrist.org. E rawa talega ni o sarava na vidio ni Tabernacle Choir ena Temple Square. Na lagasere ena lotu vakamatavuvale ena vukei ira na lewenilotu me ra vulica na serenilotu e lagati e valenilotu.

Lesoni

E vuqa tu ena Lotu na ivurevure e rawa ni veivuke ena lotu vakamatavuvale. E rawa ni o taura e vica na miniti mo wilika ka veivosakitaka e dua na itukutuku mai na Liaona, na iTokani, se Me iSakisaki ni iTabagone. Oqo e rawa talega ni gauna me saravi ka veivosakitaki kina na vidio ni Lotu. Se o rawa ni wilika e dua na vosa mai na koniferedi raraba, wilika na ivolanikalou, se veivosakitaka na wiliwili ni macawa oya ena Lako Mai , Mo Muri Au.

iVakatakilakila

era caka cookies na gone

Kedra itaba na gone era caka cookies mai vei Michelle Loynes

Vakaitavi vakamatavuvale

E rawa ni ra vakaitavi na gone ena lotu vakamatavuvale. E rawa ni ra veivuke ena kena tuvanaki na itaviqaravi, masu, se digitaka ka liutaka na sere. E rawa talega ni ra vakavulica na lesoni. Ni bera na lotu vakamatavuvale, e rawa ni o vukea na luvemu me wilika e dua na italanoa ena mekasini na Friend se nodra italanoa taleitaki ni ivolanikalou. Sa na qai rawa vua na gone me tukuna na italanoa oqori ki na matavuvale me lesoni. E vuqa talega na gone era marau me ra matanataka na italanoa ni ivolanikalou ena lotu vakamatavuvale. Me ra tuvanaka na gone qase cake na lesoni se digitaka e dua na vosa ni koniferedi raraba era vinakata me ra wilika. Me ra qai liutaka na veivosaki.

iTaviqaravi

E vuqa na matavuvale era marautaka tiko ni ra cakava tiko na itaviqaravi me tiki ni lotu vakamatavuvale. Na itaviqaravi e loma e rawa ni oka kina na qito, caka cakacaka ni liga, se vakasaqa vata.

Ena itaviqaravi e tautuba e rawa ni o taubale kina, lako ena taubale vakamatavuvale, se qitotaka e dua na qito e tautuba. Vakaraica e dua na itaviqaravi e rawa ni ra cakava kece na lewe ni matavuvale, ka marautaka vata. Levea na gauna ni veisisivi ka rawa ni kauta tani na Yalotabu.

Veiqaravi

Na lotu vakamatavuvale sa gauna cecere ki na matavuvale mera qaravi kina na tani. Sa rawa mo vukea eso na wekamu qase cake, vakarau kakana ena dua na ivakaruru, volavola vei ira na daukaulotu, se tomi benu, me ivakaraitaki.

© 2022 mai na Intellectual Reserve, Inc. Dodonu taucoko e taqomaki. Tabaki e Amerika. Vakadonui me vakaValagi: 6/19. Vakadonui me vakadewataki: 6/19. Vakadewa ni Tukutuku Vakavula ni Liaona, Okosita 2022. Fijian. 17467 858