iVakavuvuli Taumada ni Kosipeli

iVolanikalou: Na Vosa ni Kalou

e volavola e dua na parofita ni Veiyalayalati Makawa

Parofita ni Veiyalayalati Makawa, maivei Judith A. Mehr

Na ivolanikalou era ivola tabu era vola vakatabakidua na parofita. Na ivolanikalou e vakadinadinataki Jisu Karisito ka vakavulica na Nona kosipeli. Na ivolanikalou vakadonui ni Lotu sai koya na iVolatabu (ka okati kina na Veiyalayalati Makawa kei na Veiyalayalati Vou), na iVola i Momani, na Vunau kei na Veiyalayalati, kei na Mataniciva Talei.

Veiyalayalati Makawa

Na Veiyalayalati Makawa e itukutuku ni nona cakacaka na Kalou vei ira na Nona tamata ni veiyalayalati ena gauna makawa. E oka kina na nodra ivakavuvuli na parofita me vakataki Mosese, Josua, Aisea, Jeremaia, kei Taniela. E dina ga ni a volai ena vica na drau na yabaki ni bera ni sucu ko Jisu Karisito, era a volavola e vuqa na parofita ni Veiyalayalati Makawa me baleti Koya.

Veiyalayalati Vou

E volai ena Veiyalayalati Vou na sucu, bula vakatamata, ivakavuvuli, kei na Veisorovaki i Jisu Karisito. E oka talega kina na nodra ivakavuvuli na iApositolo i Karisito kei na tisaipeli tale eso. Ena vukei keda na Veiyalayalati Vou meda kila vakavinaka na sala meda bulataka kina na kosipeli i Jisu Karisito nikua.

Na iVola i Momani: E Dua Tale na iVakadinadina kei Jisu Karisito

Na iVola i Momani e ivolatukutuku ni so na tamata era a bula tu mai Amerika makawa. E oka kina na nodra ivakavuvuli na parofita, kei na kena inaki levu duadua oya me vakadeitaka vei ira na tamata kecega ni o Jisu na Karisito. A vakadewataka o Josefa Simici na Parofita mai na peleti koula ena isolisoli kei na kaukauwa ni Kalou.

Vunau kei na Veiyalayalati

Na Vunau kei na Veiyalayalati e umani tu kina na ivakatakila e soli vei Josefa Simici kei ira tale eso na parofita ni gauna oqo. Na ivakatakila e vakamacalataka na sala a tauyavutaki kina na Lotu i Karisito. Era tiko talega kina na ivakavuvuli bibi ni kosipeli me baleta na matabete, na cakacaka vakalotu ni kosipeli, kei na veika e yaco ni oti na bula oqo.

Mataniciva Talei

Na Mataniciva Talei e oka kina na ivola i Mosese kei Eparaama, na ivakadinadina i Josefa Simici, kei na Yavu ni Vakabauta ni Lotu. E oka talega kina na Josefa Simici—Maciu, tiki ni ivakadewa i Josefa Simici ni Veiyalayalati Vou.

Vulici ni iVolanikalou

Era sa vakavulici keda na parofita meda vulica na ivolanikalou ena veisiga. Ni da vakayacora vakakina ena vukei keda meda vakalevutaka na noda vakabauta ka toro voleka vua na Tamada Vakalomalagi kei Jisu Karisito. Ni da vulica na ivolanikalou ena masumasu, ena vukei keda na Yalo Tabu meda kunea na isau ni noda vakatataro.

Ira na Parofita ni Gauna Oqo

Ni ra vosa na parofita kei na iapositolo nikua ena kaukauwa ni Yalo Tabu, sa vaka na ivolanikalou na nodra vosa. E dua na ivakaraitaki ni kena oqo o ya ena koniferedi raraba. E rawa ni da vulica na ivakavuvuli mai na koniferedi ena ilavelave ni Me kei na Noveba ni Liaona.

Na Cava me Wiliki kina na iVolanikalou?

Na ivolanikalou e vakadinadinataki Jisu Karisito (raica na Jekope 7:10–11).

Sa soli mai na ivolanikalou ena veivakauqeti ni Kalou (raica na 2 Timoci 3:15–16).

E rawa ni da vakayagataka na ivolanikalou ki na noda bula (raica na 1 Nifai 19:23).

Na iKuri ni iVakamacala me baleta na Mataniciva Talei

iVola i Mosese: Na iVakadewa veivakauqeti nei Josefa Simici na Parofita ni imatai ni vica na wase ni Nai Vakatekivu. E duatani duadua na wase e 1 ni Mosese; na vo ni wase e yavutaki tiko ena Nai Vakatekivu 1:1–6:13.

Ai Vola i Eparaama: Na iVakadewa vakauqeti nei Parofita Josefa Simici me baleta na volavola nei Eparaama, mai na ivola vivigi papyrus e kunei e Ijipita.

Yavu ni Vakabauta: Na tinikatolu na ivakaro raraba e vola o Josefa Simici e tukuna tiko na noda vakabauta bibi ni da lewena na Lotu ni Turaga.