Kwoj Ke Kappukot Kraist Kajjojo Raan?

Jān Orson S. Franco

En̄jake eo aō ilo tampeļ ekar jipan̄ eō kile bwe ij aikuj kappukot n̄an lo Kraist aolep raan.

Rijeje eo ej jokwe ilo Guatemala.

Pija

juon rūm̧m̧an ded likao ej riiti jeje ko rekwojarjar ilo turin juon winto epeļļo̧k

Ke ikar dik, ekkā aō kajjitōk ippa make kajjitōk ko āinwōt “Jetōb Kwojarjar eo ej ke kōnono?” “N̄e ij etal n̄an lan̄, inaaj ke loe Anij?”

Kiiō me irūttoļo̧k jidik, imaron̄ reilikļo̧k im lo bwe Jemedwōj Ilan̄ ej aolep iien tōl eō im kwaļo̧k n̄an eō kam̧ool bwe E emour, ak ikar jab aolep iien pojak n̄an aō kile Pein ilo mour eo aō. Ilukkun jeram̧m̧an bwe ikar rūttoļo̧k ilo juon em̧ eo epād gospel eo an Jisōs Kraist me em̧ōj an jepļaak tok ie, ak ikar mour ilo juon naan in kam̧ool eo me ij mour kake ium̧win juon tōre eaitok. Ekar ben n̄an eō bwe in tōmak ke Anij em̧ool.

Juon raan, ke ekar 15 aō iiō, bisop eo aō ekar kōjjeļā kōn juon tūrāāp n̄an tampeļ. Em̧ōj aō kar kadede etal n̄an tampeļ ippān baam̧le eo aō, kōn menin ikar jab ļōmņak kōn men in eļap. Ikar jab lukkuun en̄jake eļap im jab meļeļe aorōkin bujen im kain̄i ko kōm̧m̧an ilo tampeļ eo.

Ke ej itok raan eo, ikar deļon̄e tampeļ eo im kar jānij aō nuknuk n̄an mouj. Ilo aō kar etetal turin juon kilaaj, ikar lo eō make kōn nuknuk mouj im aō ettōn̄ dikdik. Ke ikar kōttare aolep membōr in ward eo aō, ikar m̧ōņōņō im mijak jidik. Ikar kejokļo̧kjeņ kōn aibojooj eo an jikin peptaij en im uno ko ke ilo jidimkij, ikar en̄jake an Jetōb un̄ūr buruō.

Ijamin meļo̧kļo̧k naan ko me rekar jiktok ilo kōļmenļo̧kjeņ e aō: “Orson, en̄in ej m̧weo m̧ōn Irooj. Ej iakwe eok. Ej kōņaan bwe kwon ukōt mour eo am̧ im kajjieon̄ erom̧ juon armej em̧m̧an jidik kōn jidik.”

Ikar en̄jake eļap iakwe ilo naan ko ak ejjab to ikar obrak kōn burom̧ōj. Ikar lukkuun bōk koņaaō ilo tampeļ n̄an kiiō itōpar iien in. Kōn menin ikar jar ilo buruō, kajjitōk ippān Jemedwōj Ilan̄ n̄an jeorļo̧k aō bōd.

Im ikar ijeļā Ekar ron̄ jar ko aō kōnke ikar en̄jake eļap aeņōm̧m̧an ilo buruō.

Raan eo, ikar kam̧wūlaļļo̧k tōmak eo aō im kar bōk naan in kam̧ool eo aō kōn gospel eo me eto aō jan̄nuwaad kake. Raan eo, ikar maron̄ ba ilo aō kar bōk kapen eo āinwōt rikaļoor ro ruo an Jon: “Kōm ar lo Messaia” (lale Jon 1:41).

Wāween ko Repidodo n̄an Koneek

Jān kar en̄jake in, ikar kajjieon̄ bwe en em̧m̧anļo̧k aō kile im̧we eo an Jemedwōj Ilan̄ ilo mour eo aō ilo aō kappukot Jisōs Kraist kajjojo raan. Men̄e laļ in emaron̄ kōm̧m̧an bwe en pen ad ron̄jake ainikien Rilo̧mo̧o̧r ilo jet iien, ijeļā kiiō bwe E em̧ool im bwe E ej pād ippa.

Elōn̄ iaad ewōr iien ko me rej en̄jake jidik aer epaake lan̄ ijjeļo̧kin men ko jeminene kake. Ewōr bar iien ko reppen n̄e jej apan̄ n̄an en̄jake im̧we eo An jekdo̧o̧n ewi jon̄an an pen ad kajjieon̄ ak boub n̄e jejjab maron̄ lo ebwe iien ko aer n̄an kappukot E. Ak ijeļā bwe eļan̄n̄e ewōr juon ikdeleel n̄an kappukot E, jenaaj lo Pein ilo mour ko ad.

N̄e kwoj en̄jake am̧ ettoļo̧k jān Rilo̧mo̧o̧r, kajjitōk ippam̧ make, Ij ke kajjieon̄ n̄an kappukot Messaia ilo kajjojo raan?

Ilo ad kappukot n̄an erom̧ āinwōt Rijilōk ro etto, etal jān o̧o̧k eo ad (lale Matu 4:20) im eddo im itok limo ko jet ilo juon iien n̄an oktak ļo̧k n̄an E, jenaaj lo E.

Elōn̄ kein jipan̄ ko an kajoor ilo jetōb me emaron̄ jipan̄ kōj. Rikanaan Alma ekar kakeememej kōj “bwe jān men ko reddik im reļam waan men ko reļļap rej kūrm̧ool” (Alma 37:6). Jerbal jiddik ko kōn tōmak im kaminene ko an jetōb jej kōm̧m̧ani kajjojo raan emaron̄ jipan̄ kōj kōļapļo̧k maron̄ eo ad n̄an kile Irooj ilo mour ko ad.

Jet iaan kein jerbal ko an jetōb emaron̄ men ko āinwōt:

Jar ilo Tōmak
Ekkatak jeje ko rekwojarjar ilo m̧ool in bōro im ļap meļeļein
Jipan̄ ro jet ilo ejjeļo̧k kalijōkļo̧k
Kwaļo̧k naan in kam̧ool eo am̧ ippān juon m̧ōttan
Ron̄jake al in jar ko ak al ko rej bōktok jetōb
Pād ilo kūlaaj in institute
Kōjparok Raan in Jabōt im kōkwojarjare
Jitlo̧k
Emakijkin am̧ etal n̄an tampeļ eo

Elōn̄ men ko remaron̄ jipan̄ kōj kappukot Jisōs Kraist, ak ki eo ej wōnm̧anļo̧k wōt n̄an kappukot E. Būreejtōn Russell M. Nelson ekar katakin: “Ilo ad kappukot n̄an erom̧ rikaļoor ro an Kraist, kijejeto ko ad n̄an ron̄jake E ej aikuj bwe en lukkuun jān kōņaan eo ad make. Ej bōk bōkļōkōt im emakijkij in kijejeto n̄an kobrak mour ko ad kajjojo raan kōn naan ko An, katak ko An, m̧ool ko An.” ¹

Em̧ōj Ke Am̧ Loe Rainin?

Men̄e eļan̄n̄e kwoj bōk aolep uwaak ko rej kappukoti kiiō, kwon etal wōt! Kappukot Kraist im kālet bwe en wōr am̧ tōmak ilo E. Eļan̄n̄e kwonaaj kajjieon̄ pukot E kajjojo raan kōn jerbal ko reddik, ijeļā bwe kwonaaj en̄jake An jiburlep im atbokwoj jān lan̄. Ijeļā menin em̧ool kōnke ikar en̄jake.

Jemedwōj Ilan̄ ej kile kijejeto ko ad. Ejjab lukkuun kea kōn jon̄an ļap in men ko jej kōm̧m̧ani n̄an kōketak jetōb ko ad eļan̄n̄e jemaron̄ ba kajjojo raan kōn dim im alikkar: “Rainin em̧ōj aō lo Messaia eo!”

Ej aō jar bwe jen maron̄ jeļā im iakwe ad Rilo̧mo̧o̧r kajjojo raan. Men ne jenaaj kōm̧m̧ane āinwōt an Moronai elmakote im “kappukot Jisōs” (Ether 12:41). Kwe im n̄a kōjro maron̄ loe, ilo jem̧ļo̧kin kajjojo raan, juon eo me Moses im rikanaan ro jet rekar jeje kake: Jisōs Rinazareth. Ilo ad kappukot Kraist, jenaaj loe pein Anij ilo mour ko ad. Im an ļapļo̧k ad kappukot Kraist kajjojo raan, enaaj ļapļo̧k ad kappukot E im maron̄ kile Ainikien, tōl kōj aolep ilo aolepān mour ko ad.