Lokol Pej
Wan Krismes blong Holemtaet
Evri yia, man blong mi mo mi mo tugeta ol joen famli blong mitufala i go long wan kamp trip blong selebretem en blong yia holidei sisen. Mifala i jusum wan ples we i save inaf blong holem namba blong mifala evriwan mo afta kamp stat long Krismes Iv i go kasem long Niu Yia Dei.
Ol kamp ia oli wan gudfala taem blong mifala i mekem famli blong mifala i kam strong moa. From plante long mifala i ol memba blong Jos Ia blong Jisas Kraes blong Ol Lata-dei Sent ol kamp ia oli mekem testemoni blong mifala i kam strong long Kraes mo Jos blong Hem taem we mifala i selebretem taem we Hem i Bon.
Long en blong 2020, mifala i faenem wan ples long Bikenibeu Vilej, Tarawa, we i gat wan bigfala mwaneaba (wan kastom miting haos) we ful famli blong mifala i save silip long hem. Olsem oltaem, tawi blong mi we mi lavem, Meteta, i joenem mifala long kamp lafet ia.
Meteta i stap wetem mi mo man blong mi mo, long 71 yia blong hem, hem i olsem wan mama long long mitufala. Hem i luk helti mo aktiv i stap, be hem i wokbaot wetem stik blong wokbaot afta we oli katem hem 20 yia i pas. Meteta i lavem ol trip blong kamp blong mifala mo i wantem tumas blong tekpat long ol famli gem mo ol aktiviti blong mifala.
Long 31 Disemba, sam aoa bifo Niu Yia selebresen blong mifala, Meteta i bin glad tumas. Hem i go swim eli, i jenis mo i sidaon long mwaneaba, i rere blong gat gud taem long naet ia. Evriwan i stap ronron long evri ples, blong olgeta tu i stap rere.
Afta, long medel blong evri samting we i rere, Meteta i kwaet nomo i talem long mi, “Mi harem se jes blong mi i soa we.” Mi lego evri samting we mi stap mekem mo mi singaotem man blong mi mo wan narafala tawi blong mi, mo kwiktaem nomo sam long mifala i stap traem blong helpem hem.
Evri samting i hapen hariap nomo. Fiftin minit afta, Meteta i stap traem blong pulum nogud win. Man blong mi mo pikinini boe blong mi i givim hem wan Prishud Blesing taem mifala i stap wetem long ambulens. Sore nomo, ol dokta oli nomo save mekem blong sevem hem. Afta we mifala i kasem hospital, Meteta blong mifala i lego mifala.
Long naet ia, wol i stop long mifala. Sloslo taem mifala i stap gobak long ples blong kamp–blong serem nogud nius ia mo talem long evriwan se bae mifala i stopem kamp ia—man blong mi mo mi i tingting bak long ol las memori blong Metata. Ol dokta oli traem bes blong olgeta blong hem i kambak, mo olgeta raon long mifala i traem blong givim hop long mifala, be mifala i filim wan kaen blong pis taem we i talem long mifala se hem i taem blong Meteta i go.
Fet blong mifala long Jisas Kraes mo testemoni blong mifala long gospel blong Hem i helpem tu ol narafala memba blong famli blong i akseptem wanem we i hapen. Mifala i jes spendem wan wik long tugeta selebresen blong wol mo saed blong spirit,be olsem holidei kamp blong mifala i jenis i go long wan fenerol, mifala i tanem wol biaen evriwan.
Mifala i harem nogud from Metata blong mifala we mifala i lavem i lego mifala—hem i bin wan bigfala mo strong fandesen insaed long haos blong mifala mo mifala i mas mekem plante jenis taem hem i no stap—be long taem blong fenerol blong hem, mifala i tokbaot moa abaot mining blong laef blong mifala wanwan.
Mifala i lukluk long Sevya blong mifala Jisas Kraes mo long Tabu presen ia blong Hem blong kam olsem god. Mifala i talem bigfala tangkyu from sakrifaes blong Hem mo win blong Hem long girap long ded. Hem i bin wan taem blong riniu long saed blong spirit long mifala. Taem mifala i wok tugeta blong oganaesem mo rere blong talem tata long Meteta long wol ia, ol tingting blong mifala i stap long Plan blong Fasin blong Sevem Man blong Papa long Heven, mo long Pikinini Boe blong Hem, we i mekem i posibol long mifala blong joen wetem Meteta bakegen wan dei.
Ol famli holidei kamp blong mifala i oltaem ol iven we i aktiv, i fulap wetem miusik mo danis, ol talen so, laflaf mo i wan gud taem, be long Krismes ia, glad ia blong mifala blong selebret i soem tru laet blong stap glad - glad ia blong mifala se Sevya Jisas Kraes i karem taem we Hem i bon i kam long wol ia blong givim laef long yumi.
Save blong mifala long gospel blong Hem i wanem we i karem pis i kam long famli blong mifala afta we Meteta i lego mifala. I helpem mifala blong tingbaot stret mining blong Krismes.