Itulau i le lotoifale
O se Kerisimasi e Faapelepele i ai
O tausaga uma lava ma te o ma lo’u toalua ma o ma aiga lautele uma i se faigamalaga mo se tolauapiga e faamanatu ai vaitau o malologa i le faaiuga o le tausaga. Sa matou filifilia se nofoaga e mafai ona ofi ai le fuainumera o le matou aiga ma matou tolauapi ai mai le Afiafi a o lumanai le Kerisimasi seia maea le Aso o le Tausaga Fou.
O nei tolauapiga o se taimi matagofie mo i matou e faamalosia ai o matou sootaga faaleaiga. Talu ai o le toatele o i matou o tagata o Le Ekalesia a Iesu Keriso o le Au Paia o Aso e Gata Ai, o nei tolauapiga e faamalosia ai foi a matou molimau ia Keriso ma Lana Ekalesia a o matou faamanatuina Lona soifua mai.
I le faaiuga o le 2020, sa matou maua ai se nofoaga i le Nuu o Bikenibeu, Tarawa, lea e i ai se mwaneaba (o se falefono faaleaganuu) telē e mafai ona momoe ai lo matou aiga atoa. E pei lava ona masani ai, sa faatasi mai le tuafafine pele o lo’u toalua, o Meteta, ia matou fiafiaga i le tolauapiga.
Sa nofo Meteta faatasi ma maua ma lo’u toalua ma, i le 71 o lona soifua, sa pei lava o ia o se tina ia i ma’ua. Sa matua soifua maloloina o ia ma to’aga, se’i vagana ai e savali o ia i tootoo ona o le taunuuga o se ta’otoga sa faia i le 20 tausaga talu ai. Sa matua fiafia tele Meteta i a matou malaga mo tolauapiga o le Kerisimasi ma sa auai ma le naunauta’i i taaloga ma gaoioiga a le matou aiga.
I le aso 31 o Tesema, i ni nai itula ona faia lea o le matou fiafia o le Tausaga Fou, sa matua fiafia lava Meteta. Sa vave ona faamalū o ia, fai ona laei ma nofo loa i totonu o le mwaneaba, ma sauni e faafiafiaina i le po. Sa faanatinati solo tagata uma, ma sauni foi.
I le ogatotonu o nei sauniuniga uma, sa fai mai lemu lava Meteta ia te a’u, “E lagona le tiga mumū i lo’u fatafata.” Sa taofi uma a’u mea sa fai, valaau lo’u toalua ma le isi ona tuafafine e o mai, ma vave ona taumafai nisi o i matou e fesoasoani ia te ia.
Sa matuā vave lava ona tutupu mea uma. E tusa o le sefululima minute mulimuli ane, ua amata ona tautatā Meteta e manava se ea. Sa faia e lo’u toalua ma lo’u atalii sona faamanuiaga faaleperisitua a o matou faatalitali mo le taavale a le falemai. O se mea e faanoanoa ai, sa leai se mea tele na mafaia e fomai mo ia. E le i umi ona matou taunuu i le falemai, ae malaga ese loa Meteta [mai lenei olaga].
I lena afiafi, sa taofi le lalolagi mo i matou. A o faagesegese lava ona matou toe foi atu i le nofoaga o le tolauapiga—e faasoa atu le tala faanoanoa tele ma ta’u atu i tagata uma e taape loa le tolauapiga—sa ma tomanatu ma lo’u toalua i toe taimi o Meteta. Sa faia e fomai mea sili latou te mafai e toe faaola mai o ia, ma sa taumafai i latou sa siomia i matou e aumai le faamoemoe, ae sa uiga ese lava le ituaiga filemu sa ta’u maia ia i ma’ua ua oo i le taimi o Meteta e malaga ai.
O lo ma faatuatua ia Iesu Keriso ma a ma molimau o Lana talalelei sa fesoasoani foi i le atoaga o le matou aiga e talia le mea ua tupu. Sa faatoa uma atu lava ona faaalu se vaiaso e faia ai fiafiaga faalelalolagi ma faaleagaga, ae na suia lo matou malologa i se falelauasiga, sa liliuese atoatoa o matou manatu mai le lalolagi.
Sa matou faanoanoa tele i le toesea o la matou Meteta peleina—o ia sa avea ma punavai sili mo le mautū i lo matou aiga, ma sa tele lava ni fetuutuunaiga sa tatau ona faia e aunoa ma ia—ae i le afuaga o lona maliu, sa matou talatalanoa atili ai i le uiga o o matou lava olaga.
Sa matou taulai i lo matou Faaola ma Lana meaalofa paia o le faaeaga. Sa matou faaleo atu le faafetai loloto mo Lana taulaga Togiola ma Lona manumalo i le tuugamau. O se taimi lava o le faafouina faaleagaga mo i matou uma. A o matou galulue e faatulaga ma saunia mo le faamavaega faalelalolagi a Meteta, sa i ai o matou manatu i le Ata o le Faaolataga a le Tama Faalelagi, ma Lona Alo, o Lē ua mafai ai e i matou uma ona toe faatasia ma Meteta, i se aso.
O a matou tolauapiga o aso malolo e masani lava e pisapisao, tumu i musika ma siva, faaaliga taleni, toeega ma mea malie, ae o lenei Kerisimasi patino, sa foliga ua matua faaitiitia le fiafia o a matou faafiafiaga i le malamalama o le olioli moni—o le olioli lea sa aumaia ina ua fanau mai o Ia i lenei lalolagi ina ia aumaia ia i tatou le ola.
O lo matou malamalama i Lana talalelei lea sa aumaia i lo matou aiga le filemu ina ua mavae le maliu o Meteta. Sa fesoasoani ia i matou ia manatua le uiga moni lava o le Kerisimasi.