Mukenji wa ku Ngondo wa Liahona Ngondo Muibidi 2022

Bipungidi bidi Bitutuangaja ne Nzambi

Kuenza ne kulama bipungidi kudi kutuala mabenesha.

Tshipungidi tshidi mulayi udi pankatshi pa Tatu wa mu Diûlu ne bana benda. Udi ufila malu a kuenza bua bipungidi bitudi tuenza nenda. Patudi tuenza tshidiye utulomba, tudi tupeta mabenesha abungi. Ne katuena anu tupeta mabenesha a pa buloba to—patudi tuenza ne tulama bipungidi, tudi tupingana bua kusomba ne Nzambi ne dîku dietu mu diûlu dituku dikuabu.

Bipungidi ne Milulu

Tudi tuenza bipungidi diba dia milulua kampanda. Tudi ne bua kupeta milulu ayi ne kutumikila bipungidi abi mu mushindu wa kupingana bua kusomba ne Nzambi. Milulu idi ikumbajibua kupitshila ku bukokeshi bua buakuidi. Milulu ayi idi yangata ditambula ne dijadikibua, dipeta dia Buakuidi bua Melekisedek (bua bantu baluma), ne milulu itudi tupeta mu ntempelu. Mu tshikondu tshia biakudia bia tshijila, bidimba bia Ekelezia bidi bienzulula milayi ivuabu benza kudi Nzambi (tangila Dilongesha ne Bipungidi 20:77, 79).

Bipungidi bidi Bituambuluisha bua Kusomba mu Buakana

Patudi tutambula, tudi tulaya bua kulonda Yezu Kilisto, ku muvuluka misangu yonsu, ne kulama mikenji (tangila Dilongesha ne Bipungidi 20:37). Nzambi udi utulaya ne Nyuma wa Tshijila neikala anu netu.

Padi bantu baluma bapeta buakuidi, badi balaya bua kuikala bakumbana ne bukola bua buakuidi bua Nzambi. Nzambi udi ulaya bua kubabenesha. (Tangila Dilongesha ne Bipungidi 84:33–40.)

Bimfuanyi bia Ntempelu wa Recife Brezil bia kudi James Porter

Bipungidi Bitudi Tuenza mu Ntempelu

Padi bidimba bia Ekelezia bipeta dotation yabu mu ntempelu, badi balaya bua kusomba mu buakana ne kudilambula bua lumu luimpa. Badi babalaya bukola bua kudi Nzambi (tangila Dilongesha ne Bipungidi 38:32; 109:22).

Mu disuikibua mu ntempelu, muluma ne mukaji badi baselangana bua tshiendelela ne balaya bua kuikala ne lulamatu mu bobu ne kudi Nzambi. Nzambi udi ulaya ne badi mua kupingana kudiye ne kusomba bu mêku bua kashidi. (Tangila Dilongesha ne Bipungidi 132:19–20

Tudi Bantu ba Tshipungidi

Aba badi badisanga ku Ekelezia wa Yezu Kilisto wa Bansantu ba Matuku a Ndekelu badi balua bantu ba tshipungidi. Badi kabidi bapiana mabenesha ne majitu a tshipungidi tshia Abalahama (tangila Galatia 3:27–29). Kuikala munkatshi mua bantu ba tshipungidi kudi kumvuija ne tudi tuambuluishangana mu kusemena kuetu kudi Kilisto. Bidi biumvuija kabidi ne, tudi tuenza mudimu bua kukankamika Ekelezia wa Nzambi pa buloba. Patudi tulama bipungidi bietu, tudi mua kupeta bukola ne dikankamika bia kua Nzambi.

Kupitshila ku Mifundu

Pavuabu batambuishibua, Alama ne bantu benda bakenza tshipungilu bua kuambuluisha umua ne umua ne kutumikila mikenji ya Nzambi (tangila Mosiya 18:8–11).

Panyima pa dikudimuna dia mutshima, Bena Anti-Nefi-Lehi bakenza tshipungilu bua kabambudi bingoma biabu kabidi to (tangila Alama 24:17–19).

Mukalenga wakenza tshipungidi ne Abalahama (tangila Abalahama 2:9–11).

© 2018 by Intellectual Reserve, Inc. All rights reserved. Mupatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Monthly Liahona Message, February 2022. Tshiluba. 18313 760