Mukenji wa ku Ngondo wa Liahona Ngondo wa Kumpala 2022

Dipona Divua Tshitupa tshia Dilongolola dia Nzambi

Bua bualu bua Dipona, tuakafika ku dilua pa buloba ne tudi mua kupingana bua kusomba ne Tatu wa mu Diûlu.

Adama ne Eva mu Budimi bua Edene, kudi Robert T. Barrett

Mu Budimi bua Edene, Nzambi wakelela Adama ne Eva mukenji bua kabadi tshimuma tshia mutshi wa dimanya dia buimpa ne bubi to, Nunku wakabambila ne, nudi ne bua kudisunguila nkayenu kadi, nuvuluka bua ne ndi mutshikandika” (Mose 3:17). Satana wakatêta Eva bua adia tshimuma tshia mutshi. Wakamuambila ne, uvua ne bua kushala bu banzambi, mumanya bimpa ne bibi (Mose 4:11). Wakadia tshimuma ne wakabanyangana ne Adama. Nzambi wakabipata pambelu pa Budimi bua Edene.

Dipona

Adama ne Eva Bipatshibua mu Budimi bua Edene, kudi Gary L. Kapp, kena bua kutentudibua

Pakumbuka Adama ne Eva mu Budimi bua Edene, kabavua kabidi ku mpala wa Nzambi to. Ditapuluka ne Nzambi edi, didi dibikidibua ne lufu lua mu nyuma. Diumbuka dia mu budimi diakumvuija kabidi ne, Adama ne Eva bakalua bantu ba lufu ne nunku bavua bakumbana kufua. Nansha muvua Adama ne Eva kabayi kabidi ne Nzambi ne muvuabu ba lufu mpidiewu, bavua ne disanka pakamonabu ditanta diakenzabu (tangila Mose 5:10–11). “Adama wakapona bua ne bantu bikalaku; ne bantu badiku, bua ne bikala ne disanka.” (2 Nefi 2:25).

Tshikondu tshia Ditêtshibua

Patudi tuledibua, tudi bikala ntanta ne Nzambi, anu bu muvua Adama ne Eva bikala panyima pa Dipona. Satana udi ututêta bua tuenza masungula mabi. Matêta â adi atuanyishila bua tutêtshibua ne tusungula pankatshi pa buimpa ne bubi (tangila Alama 12:24). Musangu onsu utudi tuenza bubi ne katuyi tukudimuna mutshima, tudi tuya ntanta mula ne Tatu wa mu Diûlu. Kadi bituikala tukudimuna mutshima, tudi tusemena pabuipi ne Tatu wetu wa mu Diûlu.

Lufu lua Mubidi

Buloba buvua bufukibua buetu (tangila 1 Nefi 17:36). Dipona diakapepejela Adama ne Eva bua kutuadila bana babu mikenji ya Nzambi, bua kutuanyishila bua tulua pa buloba mu mubidi wa musunya. Mibidi yetu neifua dimua dituku, kadi nyuma yetu neitungunuka kuikala ne moyo. Mibidi yetu ne nyuma yetu nebisangishibua kabidi batudi tubika ku lufu.

Bapandisha kudi Yezu Kilisto

Dibika dia ku Lufu, kudi Harry Andersen

Kupitshila ku bukola bua bupikudi bua Yezu Kilisto, tudi mua kutamba lufu lua mubidi ne lua mu nyuma. Bumuvua Kilisto Mubika ku lufu, muntu yonsu udi muledibua pa buloba neabika ku lufu ne kuikala ne moyo kashidi. Ne bumuvua Kilisto mukenga bua mibi yetu, tudi mua kukudimuna mutshima ne kubuikidibua bua tusomba ne Tatu wa mu Diûlu kabidi.

© 2021 kudi Intellectual Reserve, Inc. All rights reserved. Mupatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Monthly Friend Message, January 2022. Tshiluba. 18295 760