Mānava ia ’oe i roto i teie ve’a
Te mau ha’amatara’a ’e te Faufa’a Tahito
Te Mesia ’e te poietera’a, nā Robert T. Barrett
’O te ha’amatara’a nō te hō’ē matahiti ’āpī, e au ē, e taime tano mau nō te feruri i te mau ha’amatara’a.
I teie matahiti, e arata’i te Faufa’a Tahito ’e te Poe Tao’a Rahi ia tātou i roto i te hō’ē tere māta’ita’i i te tahi o te mau ha’amatara’a faufa’a roa a’e ’e te fa’ahiahia tei ’itehia e te ta’ata nei.
E roa’a ia tātou ’ia ’ite maita’i a’e ia Iesu Mesia, tei vai na i pīha’i iho i te Metua « i te mātāmua ra » (Aberahama 4:1). E nehenehe tātou e tai’o nō ni’a i te poietera’ahia te ao nei ’e te ha’amatara’a o te orara’a tāhuti nei. E nehenehe tā tātou e ha’api’i mai nō ni’a i te mau ha’amatara’a, nō te tātarahapara’a, te mau ’utuāfare, te mau fa’auera’a ’e te ha’amorira’a hiero i ni’a i te fenua nei. E nehenehe tātou e tuatāpapa i te ha’amatara’a nō te mau fafaura’a mo’a ’o tē tāmau noa nei i te arata’i i tō tātou orara’a i teie mahana.
’E mai te mea ē, ’aita ā tātou i au i te Faufa’a Tahito, e nehenehe teie mahana e riro ’ei ha’amatara’a nō te hō’ē pu’e tau tuatāpapara’a ’āpī ’e te mā’imira’a. I te ’api 20, tē fa’a’ite ra vau i te tahi mau parau mau tei tauturu iā’u ’ia ’ana’anatae rahi atu ā i teie buka pāpa’ira’a mo’a ’e ’ia hi’o i tāna mau ha’api’ira’a ma te ito fa’a’āpī ’e te ’ōpuara’a. I te ’api 26, tē fa’ata’a nei te peresideni Mark L. Pace, peresideni rahi nō te Ha’api’ira’a Sābati, i te mau ha’amaita’ira’a pūai tā tātou e fāri’i mai te mea e hina’aro tātou ’ia tai’o « ma te pāpū ’e nā roto i te pure ».
Nā ni’a roa atu, e ha’amana’o na tātou ē, e noa’a te mau ha’amatara’a ’āpī i te roara’a o te orara’a maoti ia Iesu Mesia. I roto i te parau pāpa’i a Elder Quentin L. Cook i te ’api 6, tē fa’a’ite pāpū nei ’oia ē, « e ’ore roa te mau mea ato’a e mo’ehia » nō te mea tē tīa’i nei tō tātou Fa’aora ia tātou ma tē rima ’īriti. Nā roto i tōna aroha, e nehenehe tā tātou e tamau noa i teie tere pae vārua, tei ha’amata e tō tātou mau tupuna i tahito ra, e rave rahi mau matahiti i teienei.
Tē ti’aturi nei au ē, ’ua ’ī teie matahiti i te mau ha’amatara’a fa’ahiahia nō tātou tāta’itahi !
Marissa Widdison
Tauturu pāpa’i ve’a fa’atere rahi, Fa’anahora’a Gospel Living
« ’O vau te matameha’i ’e te hope’a ra, te Atua Mana Hope, nā roto i tā’u ra Fānau Tahi, i hāmani ai au i teie mau mea, ’oia ïa, i te mātāmua ra i hāmani ai au i te ra’i, ’e te fenua tā ’oe e ti’a na. »
Hōho’a nō Adobe Stock mai