Autalavou Matutua
O le Aoaoina e Lagona le Alofa o le Atua mo A’u
Sa ou iloa e alofa le Atua i Ana fanau uma, ae mo se mafuaaga na ou lagona ai le pei o au o le tuusaunoaga.
Ata mai le Getty Images, faatinoina e tagata faataitai
O lo‘u tausaga muamua i le iunivesite, sa ou nofo ai i le Aualofa ae faasoa mai e se tasi se aafiaga lea sa ia lagona ai le uunaiga e tusi i lalo ona manatu pe o a ni lagona o le Atua e uiga ia te ia.
Sa faate’ia ai a’u i lenei mea.
Ina ua ou taunuu i le fale, sa ou lagona le uunaiga e faia le mea lava lea e tasi. Ae ina ua mavae le 10 minute o le nofo ai iina e aunoa ma se mea na tusia i lalo, sa matuai ou tagi lava. Sa ou lagona le pei o au o se tagata pepelo. O le tele o la‘u molimau sa faavae i le Atua ma Lona alofa atoatoa mo i tatou. Ae peitai sa le mafai ona ou tusia i lalo se mea.
Sa ou iloa e alofa le Atua i Ana fanau uma, ae mo se mafuaaga na ou lagona ai le pei o au o le tuusaunoaga.
E faapefea ona tupu lena mea?
Feagai ma O‘u Le Mautonu
Ina ua amata ona ou auai i togafitiga i le tausaga na sosoo ai, sa mafai ona amata ona ou galue i ou mafaufauga. Sa ta‘u mai e la’u foma‘i e faapea, sa i ai so’u uiga o le avea ma se ituaiga o tagata e tele uiga lelei ma e leai se avanoa e tuua i se mea e faaletonu. Sa ou talitonu a le ia ou atoatoa i le tausiga o poloaiga pe sa le lava lava lo’u malosi. Ma sa ou iloaina sa ou filifilia lena mea ona sa le mafai ona ou lagonaina le Atua i lou olaga, e lei i ai o Ia. Ae o le toe tepa i tua i lou olaga, sa ou iloa ai e le moni lena mea. Ma o lea na ou iloa ai o le faafitauli o a‘u, ae le o le Atua.
Talu mai lava lo‘u laitiiti, sa ou togitogia i lo’u mafaufau lenei manatu e faapea afai ou te le atoatoa, o le a le lava lava lo‘u lelei. Ioe, ona e leai se tasi e atoatoa, sa ou aau ai i se sami o le le mautonu. Sa ou le toafimalie i le manatu faapea e mafai ona ou aoga i se mea. Ona o lenei mea sa ou lagonaina ai i taimi uma e pei e lei i ai ni ou gafatia talafeagai ma e lei alagatatau ai le alofa o se tasi—e aofia ai ma le Atua.
Mo sina taimi, sa ou taumafai ai e faafetauia lo‘u tuuatoatasi ma lagona o le le atoatoa e ala i le taumafai ia avea ma mea uma. Sa ou faapisi au lava i gaoioiga uma sa mafai ona ou maua e aveese ai lo‘u mafaufau mai faafitauli moni i lo’u olaga. Ma sa ou faaaluina le tele o le taimi e mafaufau ai i manaoga o isi o se auala e aloese ai mai le taulai atu i o’u lava manaoga. Sa ou faiaoga, taalo tenisi, tao meaai suamalie mo a‘u uo uma ma tuaoi, ma avea ma se fesoasoani faafaiaoga. Sa ou faigaluega faavaitaimi, ave le tele o vasega, ma sa avea ma peresitene o le tele o kalapu ma vaega i le lotoa.
Ia i latou o loo tilotilo mai fafo, o au o le teine sa taulimaina lelei mea uma. O le mea sa le mafai ona latou vaaia o totonu, sa ou matua saili mo se mea ina ia ou maua ai se lagona o le lelei tauaogaina. Ae o le taumafai pea lava pea e faia nisi mea se tele na o le pau le mea na aumaia aio le fenumiai faaopoopo i lou olaga i le po o ai au ma le tagata sa ou manao e avea ai au.
I le taufaaiuiuga o lo‘u tausaga muamua, sa ou iloa ai le leaga tele o lo’u pipili ona o o‘u lagona o le le agavaa. Sa ou faatagaina au lava ia matua lofituina i le le mautonu o lea na ou faafitia ai au lava i mea ofoofogia uma na ofoina mai e le olaga ma na amata ona ou le manatu i lo‘u lava olaga.
Sa ou toe laa i tua ma mafaufau pe aisea, e ui lava i le tele o mea na ou faia, ae sa ou le lagonaina lava se mea. O lenei mea na auina atu ai au i se atuatuvalega pogisa. O le a lau mea e fai pe a e lagona le tuulafoaiina atoatoa e le Atua?
I le naunau ai e agai i luma ae lagona le gaogao a o ou mafaufau po o a ni lagona moni o le Atua e uiga ia te au, sa ou iloaina ai e i ai se mea i totonu o au e manaomia ona suia. O lenei iloaina na amata ai ona ou i ai i luga o le ala i le lagonaina o le alofa o le Atua mo au.
Saili ia Lagona le Alofa o le Atua
I le taimi muamua, ou te lei iloa pe faapefea ona amata; o lena galuega lava ia sa lagona le taufaafefe. Ae i le aluga o le tausaga na sosoo ai, sa ou faalagolago i le Alii ma Lona agalelei e le iu ina ou oo atu ai i aso taitasi. Sa ou maua le tele o le malosi ma le filemu o le mafaufau i le faitauina o savali a perofeta, mafaufau loloto i feagaiga o le malumalu sa ou osia, ma faataatia ese e oo lava i le na o le 10 minute i po taitasi e faitau tusitusiga paia, ma talanoa ma le Tama Faalelagi i le tatalo i le aso atoa.
A o ou faia nei mea, sa amata ona ou vaaia Lona aao i lo‘u olaga. Ou te lei iloa po o ai au po o le a foi le ala i le olaga e filifili ai. Ou te lei iloa po o le a le ala e mafai ona ou maua ai se lagona lelei. Ae sa vave ona ou iloaina o le mea sa ou matuai manaomia o le iloa lea po o ai au i le Atua.
Ua ou i ai nei i la‘u semesa mulimuli i le iunivesite. Faatasi ai ma atugaluga uma o le avea ma se tagata aoga, tagata faigaluega, afafine, tuafafine, ma se uo, ua ou iloa ai o le iloaina o lo‘u taua ma le malamalama i lagona o le Atua e uiga ia te a’u e taua tele i lo‘u manuia i mea uma ou te faia.
O loo i ai pea le tele o mea e le mailoa e uiga i lo‘u lumanai, ma e le afaina lena mea.
Mo au, o le iloaina e le faapea e tatau ona ou atoatoa i le taimi nei ua fesoasoani e faaatoatoa ai au i aso taitasi. Ou te iloa e silafia au e le Atua. Ou te iloa foi e tusa lava pe le mafai ona ou lagonaina Lona alofa, o loo galue pea ma le onosai o Ia faatasi ma au.
I nai tausaga ua mavae atu o lenei tauiviga, na fesoasoani mai ai le Atua ia te au ia iloa uiga auaumama ma taleni ia te au lava ia semanu ou te le iloaina muamua lava. O le mea e sili ona taua, i le taimi tatau, e ala i faaaliga faaletagata lava ia ma taumafaiga i aso taitasi ia malamalama i le finagalo o le Atua mo au, ua ou aoao ai i Ona lagona e uiga ia te au. Ua mafai ona ou utuvai mai i le mana o le Faaola ma faamanuiaga o Lana Togiola i lou olaga. Ua fesoasoani lenei mea ia te au e lagona ai le alofa o le Atua ma iloa ai o au o Lona afafine faapelepele.
I le faitauina o savali a perofeta, sa ootia lava au ina ua ou faitauina upu nei mai ia Peresitene Russell M. Nelson: “E oo mai lagona o le taua pe a mulimuli se tamaitai i le faataitaiga a le Matai. O lona lagona o le taua e le iu e sau mai lona lava naunau faaKeriso e aapa atu ma le alofa, e pei ona Ia faia.”
Sa ia ta‘ua foi, “O le faatauaina e [se tamaitai] o le tagata lava ia e maua e ala i le amiotonu o le tagata lava ia ma se sootaga vavalalata ma le Atua.”1 Mai lenei mea, ua ou malamalama ai o le tagata ua avea ai au e sili atu nai lo le tuufaatasiga o mea ou te faia pe tautala atu ai. O au o se tagata e faavavau ma se valaauga tulaga ese e taitai ma le alofa ma le agaalofa, e pei lava ona faia e le Faaola. Ma o lena malamalama e sili atu nai lo soo se mea e ono taumafai lo‘u atuatuvale e ta’u mai ia te a‘u.
Aga’i i Luma
E oo lava i le taimi nei, ou te iloa lava o nisi taimi e galo ai ia te au lagona o le alofa o le Atua ma pe o a olioliga tumau o loo i ai i taimi aupito itiiti ma sili ona masani ai o le olaga. Ae o le vavega o le Togiola a Keriso e le gata mo le salamo; O Lona alofa tunoa e mafai ai foi ona tatou ola i aso taitasi ma alolofa ia i tatou lava. E tele ina galo ia te au lena mea moni, ae e moni lava.
E leai se solaaga faapea tatou te oo atu i le natura o le tagata ma o nei taimi o le manino ma musumusuga paia atonu e le o taimi uma e lagona ai le moni tele. Ina ia fesoasoani ia i tatou, e mafai ona tatou tusia i lalo ma toe tepa i tua i taimi na tatou lagonaina ai le alofa o le Atua. E mafai ona tatou taumafai pea e saili ni auala e lagona ai lena alofa. O a tatou tapuaiga i aso taitasi ma taumafaiga faifai pea ina ia faalolotoina lo tatou paia faaletagata lava ia, o le a le gata ina faamalosia ai lo tatou sootaga ma lo tatou Tama Faalelagi ae e faateleina ai foi lo tatou fiafia patino ma le taua o le tagata lava ia. E mafai e Keriso ona faalautele nei taumafaiga e fesoasoani ia i tatou ia avea ma tagata e finagalo lo tatou Tama oi le Lagi ia avea ai i tatou.
Ua ou naunau e taumafai pea aua e i ai lo‘u faamoemoe ia Keriso. Ou te iloa o le a faaauau pea ona faasolo ina lelei le olaga ma o le a ou tuputupu ae pe a ou faalagolago ia te Ia. O le taimi lava na ou iloa ai le le iu o le alofa o le Atua mo au, sa mafai ona ou maua le malosi sili atu i aso taitasi e tulei ai i tua le lotonutimomoia ma faatoilaloina ou lagona o le le atoatoa ma lo‘u manaomia o le atoatoa.
A oo ina ou toe pau atu i o’u tulaga le mautonu, ou te manatua e manatu le Atua ou te uigamalie, agalelei, loto foai, ma aulelei. O le mea sili lava, ou te manatua e silasila mai o Ia ia te au o taumafai.
Na folafola mai Peresitene Thomas S. Monson (1927–2018) e faapea: “Ua i ai le alofa o le Atua iina mo outou e tusa lava pe ua outou lagona lo outou manaomia pe leai foi se [alofa]. E i ai lava iina i taimi uma.”2 Ou te matua faafetai lava mo lenei upumoni. I a tatou tauiviga loloto, e mafai ona tatou vaaia le mamalu o le Atua i le fesoasoani ia i tatou e agai i luma. O loo Ia faamalosiau mai pea ia i tatou i taimi uma.