“Doadoahk en Tehnpas Sarawi,” Liahona, Oaktohpe 2021
Padahk en Ehu Ehu Sounpwong Liahona, Iren Padahk, Oaktohpe 2021
Doadoahk en Tehnpas Sarawi
Tehnpas sarawi kan wia tehnpas en Kauno. Kitail kak alehdi tiahk sarawi kan oh wiahda inou sarawih kan Reh nan tehnpas sarawi kan. Kitail pil kak wia tiahk sarawi kan ong kadaudoketail kan nan tehnpas sarawi.
Kilel en Tehnpas Sarawi en Barranquilla Colombia sang Bruno Lima
Sang mahs kohdo, Kauno ketin ruwesehkier Sapwellime aramas akan en kawada tehnpas sarawi kan. Tehnpas sarawih kan wia wasah kei me inenen sarawi wasa me kitail kak kehn Sapwellimen Koht limpoak. alehdi tiahk sarawihkan, oh wiahda atail inou kan ong Ih. Mwomwohdiso wet kin kawada tehnpas sarawi kan nan sampah pwe aramas tohtoh en kak ale kapai pwukat.
Kilel en lih emen me mih mwohn Tehnpas Sarawi en Oquirrh Mountain Utah sang Nexeo oh Matthew Reier
Endaumeno
Toweh kan en Mwomwohdiso me kin momourki me pwung oh mehlel kin kohla ni tehnpas sarawi pwehn ale tiahk sarawih kan oh wiahda inou sarawih kan, oh inou kan, rehn Koht. Ehu tiahk sarawi me kitail kin alehdi nan tehnpas sarawio iei endaumen. Lepin lokaia endaumen wehwehki ”kisakis ehu.” Endaumen me kin waiwi nan tehnpas sarawio iei kisakis ehu sang Koht. Nan tiahk sarawi wet kitail kin kasukuhlki duwen Sapwellimen Samatail Nanleng pilahn en komour ong kitail, oh kitail wiahda inou sarawih kan en kolokol Sapwellimen Koht kosonned akan. Ma kitail pahn loaloapwoat ong inou sarawih kan me kitail wiahda, Koht pahn ketin kapai kitailda.
Kilele en pwopwoud ehu alialu sang ni Tehnpas Sarawi en Manila Philippines sang Cristina Smith
Katengtengpenehn Peneinei kan
Kapwopwoud nan tehnpas sarawi pil kin kadaneki katengtengpene. Ni ansou me pwopwoud ehu kin katengtengpene nan tehnpas sarawi oh kolokol arail inou sarawih kan, ira pahn pwopwoud kohkohlahte. Ma mie neira serih kan, serih kau pahn pil katengtengehng ira. Pahpa oh nohno me katengtengpene mwurin ah miehier neira serih kan, serih kan pil kak katengtengehng ira. Ma irail pahn momourki mehlel oh pwung, irail pahn wia peneinei kohkohlahte.
Kilel en wasahn pepdais nan Tehnpas Sarawi en Lisbon Portugal sang Leslie Nilsson
Doadoahk en Tehnpas Sarawi ong Sapwellmen Koht Serih kan Koaros
Kitail kin wia doadoahk en ropirop en kadaudek en peneinei pwe kitail en kak esehla duwen kadaudoketail kan. Kitail eri mwuri wia doadoahk en tehnpas sarawi ong irail. Kitail kin wia tiahk sarawih kan koaros ong irail nin duwen me momour emen kin anahne: pepdais, kasarawialahn alehda Ngehn Sarawi, alehda prishduhd (ong ohl akan), endaumen, oh katengtengpene. Irail ahpw pahn uhd pilada ma irail pahn kupwuriki alehda tiahk sarawih pwukat. Ni wiepe wet, Sapwellimen Koht serih kan koaros pahn iang perepereniki kapai kan en rongamwahuo.
Kilel en peneinei ehu ni mwohn Tehnpas Sarawi en Philadelphia Pennsylvania sang Cody Bell
Kapai kan en Doadoahk en Tehnpas Sarawi
Ma kitail pahn kolokol inou sarawih kan me kitail wiahda nan tehnpas sarawi, kitail pahn kapaida, silasildi, oh kehlail. Kitail pahn ahniki manaman en prihsduhd rehtail. Atail peneinei kan pahn mihmipene kohkohlahte.
Tehnpas sarawi pil wia wasa ehu me meleilei oh wasahn kaudiahl. Ni atail kin wia doadoahk en nan tehnpas sarawi, kitail kak alehdi kaweid en ngehno oh kehn limpoak en Koht.
© 2021 sang Intellectual Reserve, Inc. Kolokol pwuhng koaros. Ntingda nan USA. Kamanaman ong ni lokaiahn Wai: 6/19. Kamanaman ong kawehwe: 6/19. Kawehwehpen Padahk en Sounpwong kan en Liahona, Oakotohpe 2021. Pohnpei 17467 885.