“Tej Hauj Lwm hauv lub Tuam Tsev,” Phau Liyahaunas, Kaum Hli Ntuj 2021
Zaj Lus hauv Liyahaunas Txhua Hli, Kaum Hli Ntuj 2021
Tej Hauj Lwm hauv lub Tuam Tsev
Lub tuam tsev yog tus Tswv lub tsev. Peb txais tau tej kab ke thiab khi lus nrog Nws hauv lub tuam tsev. Peb ua tau cov kab ke hauv lub tuam tsev rau peb cov poj koob yawm txwv.
Daim Duab txog lub Tuam Tsev nyob Barranquilla Columbia los ntawm Bruno Lima
Nyob hauv txhua caij nyoog, tus Tswv tau txib Nws cov neeg kom lawv ua cov tuam tsev. Cov tuam tsev yog tej qhov chaw uas peb hnov tau Vajtsev txoj kev hlub, txais tau tej kab ke, thiab khi lus nrog Nws. Lub Koom Txoos ua tuam tsev nyob thoob plaws lub ntiaj teb kom tib neeg ntxiv thiaj li txais tau cov koob hmoov.
Daim duab txog ib tug poj niam hauv ntej lub Tuam Tsev Oquirrh Mountain Utah los ntawm Nexeo thiab Matthew Reier
Vaj Txiaj Ntsim
Cov mej zeej uas coj lub neej ncaj ncees mus tim lub tuam tsev mus txais tej kab ke thiab khi lus, los cog lus, nrog Vajtswv. Ib txoj kab ke peb txais hauv lub tuam tsev yog qhov vaj txiaj ntsim. Lo lus vaj txiaj ntsim txhais tias “ib lub khoom plig.” Lub tuam tsev qhov vaj txiaj ntsim yog ib lub khoom plig los ntawm Vajtswv. Txoj kab ke no pab peb kawm txog Leej Txiv Saum Ntuj Ceeb Tsheej txoj hau kev rau peb txoj kev cawm seej, thiab peb ua kev khi lus kom coj raws li Vajtswv cov lus txib. Yog tias peb muaj kev ntseeg raws li tej kev khi lus peb ua, Vajtswv yuav foom koob hmoov rau peb.
Daim duab txog ib khub niam txiv taug kev ze lub Tuam Tsev Manila Philippines los ntawm Cristina Smith
Tej Kev Khi Tsev Neeg Ua Ke
Kev sib yuav hauv lub tuam tsev hu ua kev khi. Thaum ib khub niam txiv sib khi hauv lub tuam tsev thiab nkawd ua raws li nkawd tej kev khi lus, nkawd yuav sib yuav nyob mus ib txhis. Yog tias nkawd muaj me nyuam, cov me nyuam kuj yuav khi nrog nkawd. Niam txiv ua tau sib khi tom qab uas nkawd muaj me nyuam muaj lub cib fim khi nkawd cov me nyuam nrog nkawd. Yog tias lawv coj lub neej ncaj ncees, lawv yuav yog ib tsev neeg tas mus ib txhis.
Daim duab txog lub Tuam Tsev Lisbon Portugal qhov chaw ua kev cai rau dej los ntawm Leslie Nilsson
Tej Hauj Lwm hauv lub Tuam Tsev rau Tag Nrho Vajtswv coj Me Nyuam
Peb ua hauj lwm nrhiav tsev neeg zaj keeb kwm kom kawm ntxiv txog peb cov poj koob yawm txwv. Yog li ntawd peb ua hauj lwm hauv lub tuam tsev rau lawv. Peb ua tag nrho cov kab ke uas cov muaj sia xav tau: ua kev cai raus dej, ua kev pom zoo, txais lub pov thawj hwj (rau txiv neej), vaj txiaj ntsim, thiab kev sib khi. Yog li ntawd lawv xaiv tau seb lawv puas xav txais cov kab ke. Li no, tag nrho Vajtswv cov me nyuam zoo siab txais tej koob hmoov los ntawm txoj moo zoo.
Daim duab txog ib tsev neeg nyob hauv ntej lub Tuam Tsev Philadelphia Pennsylvania los ntawm Cody Bell
Tej Koob Hmoov Los ntawm tej Hauj Lwm hauv lub Tuam Tsev
Yog peb ua raws li tej kev khi lus uas peb ua hauv lub tuam tsev, Vajtswv yuav foom koob hmoov rau peb, tiv thaiv peb, thiab txhawb peb lub dag zog. Peb yuav muaj lub hwj chim los ntawm lub pov thawj hwj nrog peb. Peb tsev neeg yuav nyob ua ke tas mus li.
Lub tuam tsev yog ib qho chaw rau kev kaj siab lug thiab ib qhov chaw rau peb txais kev tshwm sim. Thaum peb ua hauj lwm hauv lub tuam tsev, peb txais tau kev qhia los ntawm sab ntsuj plig thiab paub txog Vajtswv txoj kev hlub.
© 2021 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly Liahona Message, October 2021. Hmong. 17474 295