Savali Faaleautaitai i le Eria
O Uo
I le taimi na ou Epikopo ai, sa talosagaina ai a’u e se uso lelei ou te alu atu i lona fale. Ina ua ou taunuu, sa ou maua atu o ia o matua’i faanoanoa lava. O le mafuaaga o lona mafatia o lana taavale ua leaga. Ua pe le afi a o toe taliu mai lo latou aiga mai se konafesi faalesiteki. I se matau atu i ai, e foliga mai o se mea laitiiti, ae i lena taimi o se faafitauli tele—o le ‘aputi faafaataoto ua gau ai le tua o le kamela. Sa ia le malamalama pe ua tupu i se a lenei mea ia te ia, ae o la sa ia taumafai malosi e faia mea tonu uma. I si ana tupe maua utiuti, sa le mafai ona ia iloa pe o le a faapefea ona lipea le taavale pe ola foi e aunoa ma le taavale.
Na ou manatua tulaga mafatia i tusitusiga paia. Sa ou manatua le augani faatauanau a Iosefa Samita mai le Falepuipui o Liperate:
“Le Atua e, o fea o i ai oe? . . .
“O le a le umi e taofi ai lou aao?”1
Ma sa tali mai le Alii:
“Lo’u Atalii e, ia filemu lou agaga; . . . o ou tiga ma ou puapuaga o le a na o sina minute laitiiti;
“O lo o tutu au uo i ou tafatafa . . .
“E lei avea lava oe e pei o Iopu”.2
O Iopu o se alii amiotonu na lofituina i le anoanoai o puapuaga na afua ai ona ia tomanatu pe na tatau ona fanau mai o ia.
Sa ma talanoa ma lenei uso faamaoni e uiga ia Iosefa ma Iopu ma tonu ai e lei tuulafoaiina o ia e ana uo. Sa ou fesili ia te ia po o ai ana uo. Sa ia ta’u mai ni nai uo ma o i latou uma o lana Korama Perisitua. Sa ou fautuaina e mafai ona latou fesoasoani ma sa tonu ai loa o le a ia talosagaina i latou. Ioe, sa naunau ana uo ma sa fiafia e fesoasoani. Sa latou iloa le mea e maua ai se afi e toe sui ai, iloa le faapipiiia o le afi e sui ai, ona latou saosao lea e aunoa ma le tapisa, o le tupe sa moomia. Sa foia le faafitauli.
Sa toe suia le lotovaivai ma le faanoanoa i le fo’iaina ma le faamoemoe.
Sa fesili Elder Marvin J. Ashton, “O le a se uo?” Ona ia fai mai lea:
“Sa fai mai se tasi ‘O se uo o se tagata e loto naunau e talia a’u i lo’u tulaga o i ai.’ O le taliaina o lenei faauigaga e tasi o le upu, se’i ou fautua vave atu e faapea e itiiti teisi ifo lava i tatou nai lo se uo moni pe afai tatou te tuua se tagata i le tulaga e tasi tatou te maua ai o ia.”3
Afai tatou te mafaufau i se uo e mafai ona faia ia tatou suia mo le lelei sili atu, o le a oo ina tatou iloa o le uo atoatoa o le Faaola. Na Ia fetalai, “E le sili lava le alofa o se tasi i lenei alofa, ia tuuina atu e se tasi lona ola e sui ai ana uo.
“O a’u uo outou.”4
Sa faasino e le Faaola ia te ia lava o se uo i le tele o taimi. Mo se faataitaiga, i le Perofeta o Iosefa Samita:
“O le a ou ta’ua outou o ni uo, ona o outou o a’u uo.”5
Manatunatu pe o a lagona o Iosefa ina ua faalani atu o se ‘uo’. Ou te iloa o’u lagona pe a faitaulia au e se tasi o se uo taua. Mata e i ai se isi upu faaviivii e sili atu? Pe e manatu i lenei faamatalaga o le sootaga, toe mafaufau ia Iosefa Samita ma lona uso o Ailama, a o feagai ma le tagatavaleina i le Falepuipui o Karefasi. I le tulata ai i le taunuuga pagatia, sa faamafanafanaina i la’ua ina ua ofo atu e le toalua o a la uo—o Ioane Teila ma Uiliata Risati latou te faatasi i le falepuipui. Sa usuina e Ioane Teila le, “Se Tagata Mativa Faanoanoa”. Se taimi ina a ootia ina ua usuina nei upu:
Sa falepuipui o ia, faasala e fasiotia
. . . Sa tofotofo lo’u faamaoni o se uo,
Sa fesili mai pe ou te oti mo ia.6
E mafai ona tatou talisapaia atili la tatou Uo Atoatoa e ala ia tatou uo uma o e faasino atua i tatou i Lona itu. O Peresitene Russell M. Nelson o se uo o se e valaaulia pea lava ma le alofa i tatou ina ia suia, ia faamuamua le Atua i o tatou olaga ma ia “Faalogo ia te Ia”.
Na fautuaina mai e Elder Richard G. Scott le uo lenei:
“Ou te ofo atu ia te oe le Tusi a Mamona, o se uo pele na tuuina mai e se Faaola alofa . . . i le va o ona faavaa o le a e maua ai le faauoga . . . a Nifae, Iakopo, Enosa, Peniamina, Alema, Amona, Helamana, Mamona, Moronae ma le anoanoai o isi . . .
“O i latou uma . . . o le a siitia lau vaaiga i le Uo Atoatoa—lo tatou Faaola ma le Togiola, o Iesu Keriso.”7
E faapefea ona fuaina i tatou o ni uo?
Sa faamatala e Elder Marlin K. Jensen sona aafiaga o se Epikopo, na faavasega ai ni atugaluga moni na tauivi ma se tagata o le uarota.
“Sa faia se ma talanoaga faamaoni e uiga i le tauiviga sa feagai ma ia. Ina ua iloa ni avanoa eseese e mafai ai . . . sa lei foliga manaia se mea o na mea ia te ia, ma sa ou fesili atu ia te ia ma se leo ua faalefiafia . . . na o le mea lava e mafai ona fesoasoani ai ia te ia. . . .
“‘Ia, epikopo,’ na ia fai mai ai, ‘po o le a lava le mea e te fai, faamolemole aua nei tofi maia se uo ia te a’u.’
“Sa ou a’oa’oina se lesona tele i lena aso. E leai se tasi e manao e avea o se ‘galuega faatino’; tatou te mananao uma lava e alofa fua mai. Ma afai e tatau ona i ai ni a tatou uo, tatou te mananao ia i latou ia faamaoni ma loto naunau, ae le ‘tofia’. . . .
“E faigofie lava la’u savali i le aso; afai tatou te mananao moni e avea o ni meafaigaluega i aao o lo tatou Tama Faalelagi . . . e manaomia ona tau lava o i tatou o se uo.”8
I lenei vaitau, ou te mautinoa ua mafai ona outou vaai i le mea ua ta’ua nei o le “auaunaga” i lona ituaiga “maualuga ma le paia”—ua na o se uo moni lava, o se e siitiaina ma faasino atu a latou uo i le Uo Atoatoa.
Pe a tatou ofoina atu i tatou lava o ni uo faamaoni ma le moni, ua tatou auai i le faatinoina o le galuega a le Atua.