“Kapokon Lap: Mihting en Mwomwohdiso en Sampah Pwon,” Liahona Septempe 2021
Padahk en Sounpwong kan en Liahona, Septempe 2021
Kapokon Lap: Mihting en Mwomwohdiso en Sampah Pwon
Kitail kin karonge soukohp kan oh sounkaweid teikan en Mwomwohdiso ni ansoun kapokon lap. Irail kin padahkihong kitail dahme Koht ketin kupwurki kitail en rong.
Ni Epreil oh Oaktohpe koaros, Mwomwohdiso wet kin wia kahng en mihting kei me adaneki kapokon lap. Sounkaweid kan kin padahngki oh kadehde duwen Sises Krais oh Sapwellime rongamwahuo. Kapokon lap kin wiawi nan Kahnihmw en Salt Lake, Utah, oh kin kohda nan wehwe ong sampah pwon ni lokaia tohtohsang meh 80. Towe kan koaros oh aramas koaros me inengieng kin lukehng en rong padahk kan.
Keieun Kapokon kan en Mwomwohdiso
Mwomwohdiso wet tepin kokouda nan mihting ehu me wiawi ni Epreil 6, 1830 (tehk Doctrine and Covenants 20). Keieun kapokon lap wiawi ni Suhn 9, 1830. Sangete anouso, kapokon lap akan kin wiewiawi pahn kaweid en Presiden en Mwomwohdisou wasa me toweh kan kak pokon pene ie. Nan 1840 kan, sounkaweid kan tepida wia kapokon lap pak riau nan ehu pahr.
Mwomwen en Kapokon Lap kan ah Kin Kokouda Rahn wet
Presidensi Keieu, Pwihn en Wahnpoaron Ehk-Riemenko, oh sounkaweid teikan en Mwomwohdiso kin padahk nan kapokon lap. Pwihn en Koul en Tabernacle nan Temple Square oh pwihn en koul teikan en Mwomwohdiso kin koul. Tiepene limau kin wiawi nan ehuehu kapokon lap: meh siluh ni Rahnkaunop oh riau ni Rahn Sarawi. Nan Epreil, kesiluhn tiepene ni Rahnkaunop kin wiawi ong tohn pwihn kan en Prihsduhd en Aron oh Melkisedek. Nan Oaktohpe, e kin wiawi ong tohn pwihn kan en Sawas en Lih oh Peinakapw akan.
Padahk kan en Sounkaweid kan
Nan irair en sounpwong kan mwohn ehu kapokon lap, sounkaweid en Mwomwohdiso kan kin kapakapki dahme irail pahn padahngki. Kauno kin kamarainih irail pwehn ese dahme irail anahne nda. Irail kin padahngki me mehlel kan en rongamwahuo oh luke kitail en kolokol kosonned akan en Koht. Irail pil kin kadehde duwen Sises Krais oh kangoangei kitail en idawehn Ih.
Esehla sang nan Kapokon Lap
Mwohn kapokon lap, kitail kak kapakap pwehn karonge dahme Kauno ketin kupwurki kitail en esehla. Ni atail kin karonge padahk kan, Ngehno pahn padahkihong kitail dahme kitail anahne esehla. Mwurin kapokon lap, padahk kan kin kasansalda pohn ChurchofJesusChrist.org, nan Gospel Library app, oh nan Liahona. Kitail kak doandoaropwe padahk pwukat pwehn esehla laud duwen Sises Krais oh Sapwellime rongamwahuo.
Sang Pwuhk Sarawi kan
Sises Krais padahngki me kitail anahne kalapw tuhpene (tehk 3 Nephi 18:22).
Ansou me tohn Mwomwohdiso kin kaudekpene, Kauno pahn kin ketin ieiang irail (tehk Madiu 18:20).
Kauno kaparki tohn Mwomwohdiso kan en kin ”padahki oh sewese emenemen” (Doctrine and Covenants 43:8).
Ni en tohn Mwomwohdiso kan arail kin pwoson Krais, Sapwellime Ngehno pahn ketin ieiang irail ni arail kin tuhpene (tehk Doctrine and Covenants 44:2).
© 2021 sang Intellectual Reserve, Inc. Kolokol pwuhng koaros. Ntingda nan USA. Kamanaman ong ni lokaiahn Wai: 6/19. Kamanaman ong kawehwe: 6/19. Kawehwehpen Padahk en Sounpwong kan en Liahona, Septempe 2021. Mahsen.17473 885