“Jeneral Konfrens: Wan Wol Jos Miting,” Liahona, Septemba/Oktoba 2021
Ol Besik blong Gospel
Jeneral Konfrens: Wan Wol Jos Miting
Yumi lisin long ol profet mo ol narafala lida blong Jos long taem blong konfrens. Oli tijim yumi wanem God i wantem yumi blong harem.
Evri Epril mo Oktoba, Jos i stap holem ol miting we oli folfolem olgeta we oli singaotem jeneral konfrens. Ol lida oli tijim mo testifae abaot Jisas Kraes mo gospel blong Hem. Jeneral konfrens i stap hapen long Sol Lek Siti, Yuta, YSA, mo oli brodkastem truaot long wol, long ova 90 lanwis. Evri memba mo eni narafala pipol we oli intres long hem, oli invaetem olgeta blong lisin long ol toktok.
Ol Fasfala Konfrens blong Jos
Ofisol oganaesesen blong Jos i tekem ples long taem blong wan miting long 6 Epril, 1830 (luk long Doktrin mo Ol Kavenan 20). Fas jeneral konfrens i bin tekem ples long namba 9 Jun, 1830. Afta long taem ia, ol jeneral konfrens oli stap tekem ples anda long daereksen blong Presiden blong Jos, long weaples ol memba oli save kam tugeta long hem. Long 1840, ol lida oli stat blong holem konfrens tu taem long wan yia.
Olsem Wanem Oli Oganaesem Ol Konfrens Tedei
Fas Presidensi, Kworom blong Olgeta Twelef Aposol mo ol narafala lida blong Jos, oli stap toktok long taem blong jeneral konfrens. Tabenakol Kwaea long Tempol Skwea mo ol narafala kwaea blong Jos, oli stap givim miusik. Wanwan konfrens i gat faef sesen: tri long Satedei mo tu long Sandei.
Ol Tijing blong Ol Lida
Long ol manis bifo long konfrens, ol lida blong Jos oli prea abaot wanem blong tijim. Lod i givim insperesen long olgeta blong save wanem blong oli talem. Oli tijim ol trutok blong gospel mo invaetem yumi blong obei ol komanmen blong God. Oli testifae tu abaot Jisas Kraes mo leftemap tingting blong yumi blong folem Hem.
Lanem Samting Aot long Konfrens
Bifo jeneral konfrens, yumi save prea blong harem wanem Lod i wantem yumi blong lanem. Taem yumi lisin long ol toktok, Spirit bae i tijim yumi wanem we yumi nidim blong save. Afta long konfrens, ol toktok oli kamaot long ChurchofJesusChrist.org, long Gospel Laebri ap, mo long Liahona. Yumi save stadi wetem fulap prea long ol toktok blong lanem moa abaot Jisas Kraes mo gospel blong Hem.
I Kam long Ol Skripja
Jisas Kraes i tijim se yumi mas kam tugeta oltaem (luk long 3 Nifae 18:22).
Taem ol memba oli wosip tugeta, Lod bae i stap wetem olgeta (luk long Matiu 18:20).
Lod i givim komanmen long ol memba blong ”[oli] mas tijim mo mekem wanwan long [olgeta] i kam antap,” (Doktrin mo Ol Kavenan 43:8).
Taem ol memba blong Jos oli fetful mo eksasaesem fet long Kraes, Spirit blong Hem bae i stap wetem olgeta taem oli kam tugeta (luk long Doktrin mo Ol Kavenan 44:2).