“Priesthood eo ej Kajoor an Anij,” Liaona, O̧kwōj 2021
Kajjojo Allōn̄ Liaona Ennaan, O̧kwōj 2021
Priesthood eo ej Kajoor an Anij
Anij ej kōjeraam̧m̧an kōj jān kajoor eo an priesthood. Kōjeraam̧m̧an ko rej peļļo̧k n̄an aolep.
Priesthood ej kajoor eo an Anij. E ej kōjerbal kajoor in n̄an kōjeraam̧m̧an aolep ro ajri ro Nejin im n̄an jipan̄ er jepļaakļo̧k im mour Ippān. Anij ekar letok priesthood in n̄an ro ajri ro Nejin ioon laļ in. Kōn kajoor in, ritōl ro an priesthood remaron̄ tōl Kabun̄ in, im rikabwijer priesthood ro remaron̄ kōm̧m̧ani kain̄i ko rekwojarjar, āinwōt peptaij, me ejipan̄ kōj epakeļo̧k Anij. Aolep em̧m̧aan im kōrā ro rerreeo n̄an būki kain̄i ko an priesthood im kōjparok bujen ko ( kallim̧ur ko rekwojarjar) remaron̄ bōk kajoor eo an Anij.
Kajoor eo an Priesthood Kar Leļo̧k n̄an Josep Smith
Ke Jisōs Kraist ekar pād ioon laļ in, E ekar tōl Kabun̄ eo An kōn kajoor eo an priesthood. E ekar bar leļo̧k kajoor in n̄an Rijilōk ro An. Ilo bukwi iiō ko ālkin aer kar mej, elōn̄ membōr ro rekar eļļo̧k jān Kabun̄ in. Raar kabōd jim̧we eo an gospel in im wāween an kar Kabun̄ in kar jerbal. Priesthood eo an Anij ekar jab pād ioon laļ in. Ilo 1829, Jisōs ekar jilkintok Jon Ripeptaij im Rijilōk Piter, Jemes, im Jon n̄an leļo̧k priesthood eo n̄an Josep Smith. Kabun̄ eo an Jisōs Kraist im Armej ro Rekwojarjar ilo Raan Ko Āliktata ej kabun̄ eo de eo ioon laļ in kōn mālim in jān Anij.
The Voice of Peter, James, and John, jān Linda Curley Christensen im Michael T. Malmby Linda Curley Christensen and Michael T. Malm
Kii ko an Priesthood
Kii ko an priesthood rej mālim eo n̄an tōl im kōjerbal priesthood eo, āinwōt leļo̧k mālim n̄an kōm̧m̧ani kain̄i ko. Jisōs Kraist ej kabwijer aolep kii ko an priesthood eo. Būreejtōn eo an Kabun̄ in ej armej eo wōt ioon laļ in emaron̄ kōjerbal priesthood kii ko n̄an tōl aolepān Kabun̄ in. Ium̧win tōl eo an, ro jet remaron̄ kōjerbal kii ko rekkar n̄an kōm̧m̧ane jerbal eo an Anij. Ritōl ro āinwōt bisop ro im stake būreejtōn ro rej kōjerbal priesthood kii ko n̄an tōl jerbal ko aer ilo ward ko im stake ko. Kōnke kūr ko n̄an jerbal rej itok jān ritōl ro kōn priesthood kii ko, em̧m̧aan ro im kōrā ro me rej jerbal ilo kūr ko rej kōjerbal mālim eo an priesthood ilo aer kōm̧m̧ani eddo ko aer.
Melkisedek Priesthood im Priesthood eo an Aron
Priesthood eo ej ajej ilo ruo m̧ōttan ko: Melkisedek Priesthood im Priesthood eo an Aaron. Kōn Melkisedek Priesthood eo, ritōl ro an Kabun̄ in rej tōl aolep jerbal in jetōb ko an Kabun̄ in, āinwōt jerbal in mijenede im tampeļ. Jerbal ko an Priesthood eo an Aron rej jerbal ium̧win mālim eo an Melkisedek Priesthood. Ej jerbal n̄an kōm̧m̧ani kain̄i ko āinwōt peptaij im kwojkwoj eo.
Kōjeraam̧m̧an ko an Priesthood
Kōn bujen ko im kain̄i ko, Anij ej kōm̧m̧an bwe kōjeraam̧m̧an ko an priesthood ren pello̧k n̄an aolep ro nejin Anij. Kōjeraam̧m̧an kein ekoba peptaij, menin letok eo an Jetōb Kwojarjar, kwojkwoj eo, im kain̄i ko an tampeļ. Em̧m̧aan ro im kōrā ro me em̧ōj aer bōk menin letok kwojarjar eo ilo tampeļ eo rej bōk juon menin letok in kajoor eo an priesthood eo an Anij kōn bujen ko aer. Jemaron̄ barāinwōt bōk kōjeraam̧m̧an ko an priesthood eo in kōmour, kaenōm̧m̧an, im tōl.
Ta eo Jeje ko Rekwojarjar rej Ba kōn Priesthood eo?
Priesthood eo eaar baj pād wōt ilo tōre ko etto im ej bar pād ilo tōre in kiiō (lale Moses 6:7).
Priesthood kii ko rej lukkuun jipan̄ bwe jen kadedeļo̧k jerbal in an Irooj ilo wāween eo ekkar (lale Katak im Bujen Ko 42:11).
Em̧m̧aan ro rej kabwijer priesthood eo remaron̄ kōjerbale “ioon wōt pedped ko an wānōk” (Katak im Bujen Ko 121:36).
Jet iaan eddo ko an ro rej kabwijer priesthood eo rej kōmeļeļeiki ilo Katak im Bujen Ko 20:38–67.
© 2021 jān Intellectual Reserve, Inc. Aolep jim̧we ko rej pād ie. Kar būriin ilo USA. Kōmālim ilo kajin English: 6/19. Kōmālim an ukook: 6/19. Ukook eo an Monthly Liahona Message, August 2021. Marshallese. 17472 874