Samach won Nang A Mochen Sipwe Pwapwa

Nupwen sipwe chechemeni an Kot we kokkotun pwapwa, sia tongeni kuna pwapwa ina mwo ika manau mi weires.

Sasing

Kraist ren semirit

Me mwen ach uputiw won ei fonufan, kich meinisin sia nom ren Samach won Nang non Ngun. A fori eu kokkot an epwe anisi Noun semirit ar repwe kaeo me mamarita. Pokiten An ei kokot, sia tongeni winiti usun I me tufichin ani ewe manau ese much. Ei kokkot a tufich pokiten Noun Kot we Anaemon, Jises Kraist, a feito ngeni fonufan epwe riaffou fan iten ach tipis, ew fangono sia eitangeni Achasefan.

An Samach won Nang we kokkot iei ewe kokkotun

pwapwa (nengeni Alma 42:8),
manau ese much (nengeni Moses 6:62),
ngaseno (nengeni Jacob 6:8), ika
umoumoch (nengeni Alma 42:15).

Usun ekkei me ekkoch pukefel ra pwari, Samach won Nang a mochen sipwe winiti usun chok I, niwiniti I, me ennetin pwapwa (nengeni Moses 1:39).

Sia Feito won Fonufan ach sipwe Kaeo me Mamarita

Kot a tinikicheto won fonufan, ikewe ie sipwe angei aionach ie (nengeni Genesis 1:26–27). A auchea epwe wor aionach pwe epwe anisi kich ach sipwe kuna me mefi ei manau.

Kot a sinei pwe sisapw mefi pwapwa iteitan fansoun. Sipwe mefi netipengaw, metek, me pwan mano. Nge pokiten sossotun manauach, Samach won Nang a anisi kich ach sipwe kaeo me mamarita.

Kot a pwa ngeni kich pungun finata, ewe tufichin finata met mi pung me ngaw. A mut ngeni kich ach sipwe pusin finata met sia ekieki me fori. A ngeni kich pukefel me soufos mi manau pwe repwe anisi kich ne kaeo ach sipwe fori mi pung (nengeni Abraham 3:25).

Sasing

iran manau

Achocho ngeni ach Sipwe Usun Jises Kraist

Kot ese tinikicheto ngeni fonufan nge esapw pwan ngeni kich eu nenien appiru sipwe fori (nengeni John 13:15). A tinatiw Noun we Anamon, Jises Kraist, pwe epwe pwar ngeni kich ewe aan. Ren ach sipwe kaeo ifa usun sipwe tapweno Mwirin, sia tongeni aneani ekkewe pukefel ach sipwe kaeo usun I me met A fori nupwen A nom won fonufan. Sia pwan tongeni fori ukukun ach tongeni ach sipwe usun Kraist ren ach aneasosich Kot me tongei ekkoch.

Nupwen sia fori met mi mwan, sia tongeni tingorun omusomus me arap ngeni ewe manamanen ewe Achasefan an Jises Kraist an epwe anisikich ne ekkesiwin. Sia tongeni pwapwa nupwen sia achocho iteitan ran ach sipwe winiti usun I.

Mano esapw ina Muchun

Nupwen sia mano, ngunuch a no ngeni ewe nenien ngun. Ikewe sipwe sopweno ach kaeo nupwen sipwe moneta ngeni ewe Manausefan.

Non ewe fansoun Manausefan, aionach me ngunuch repwe chusefan fengen. Aionach epwe unusoch, me sisapw tongeni chiwen mano ika semwen (nengeni Alma 11:44-45). Usun chok Jises Kraist a mano me manausefan, kich meinisin sia tongeni manau sefan.

Nupwen Kot epwe apungu kich, I epwe ekieki usun ach foffor me ach mochen. Ika pwe sia achocho ne aponueta ekkewe annuk me ach kewe pwon sia fori ngeni Samach won Nang, iwe sia tongeni nom sefan Ren.

Manau ren Kot me Ach Famini non Nang

Non ewe muun celestial, sia nom ren Kot me Jises Kraist. Sipwe pwan tongeni nom ikewe ren ach famini fefeino ika sia riri ngenir. Sipwe kuna kinamwe, pwapwa, me asoso (nengeni Mosaia 2:41).

Manauach won fonufan epwe weires fan ekkoch, nge ika sia tapweno mwirin Jises Kraist, sia tongeni kuna pwapwa non ei manau me pwapwa ese much non en manau mwirin ei manau.

Met Kewe Pukefel ra Apasa usun ewe Kokkoten Pwapwa?

Napanapen ach manaueni manauach ammen auchea. Kot epwe apungu kich me niffang ngeni kich anongonong won ach ekiek me foffor (nengeni Alma 41:3).

Setan ewe a oput ach sipwe pwapwa. A sotuni kich ach sipwe aea ngawei manauach won fonufan me fori tipis. A mochen sipwe netipengaw usun chok i (nengeni 2 Nephi 2:27).

Nupwen sipwe nuku non An Kot kokkot ngeni kich, sia tongeni ani kinamwe ina mwo ika sia kuna sosot. Sia tongeni nengen fichi ach sipwe nom ren Kot feinfeino (nengeni Doctrine and Covenants 59:23).

© 2021 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/19. Kapungunon chiakun: 6/19. Chiakun Monthly Liahona Message, July 2021. Chuukese. 17471 901

Meinisin chunga seni J. Kirk Richards