“Dahkoat Godhead?,” Liahona, Suhn 2021
Padahk en Sounpwong kan en Liahona, Suhn 2021
Dahkoat Godhead?
Sahm Nanleng, Sises Krais, oh Ngehn Sarawi wia kahlap tohrohr silu me sapwellimaneki kahrepe ehu te.
Oaritik pen Kasansal keieu, sang Jon McNaughton
Emen sounwiarohng ahpw peidek rehn Soukohp Joseph Smith dahme tohn Mwomwohdiso en Sises Krais en Souleng en Imwin Rahn-akan kin kamehlele. Pwehn sapeng, Soukohpo ntingiedi ire 13 me kitail kahdaneki Irehn Pwoson kan. Keieun ireo koasoia, “Kitail kamehlele Koht, Sahm Soutuko, oh Sapwellime Ieros, Sises Krais, oh Ngehn Sarawi” Irehn Pwoson kan 1:1. Irail pwukat me wiahda dahme kitail kin nda Godhead.
Koht, Sahm Soutuko
Koht sapwellimaniki kahlap iasada ehu me kolokol uduk oh tih. Iei Ih me wia Pahpahn ngenitail kan. E ketin poakohng Sapwellime serihkan ni unsek. Koht me ketin unsek, sapwellimaneki manaman koaros, oh mwahngi mehkoaros. E me ketin inen, mahk, oh kalahngan. Kitail wia ngehn kei rehn Koht mwohn atail ipwidi. E ketin kadarkitaildo sampa pwehn esehla oh keirda. Inondehn kupwuren Koht ong emenemen Sapwellime serihkan iei en pwurala oh kousonla Reh mwurin atail mehla. Koht ketin padahkihong kitail me kitail anahne idawehn Sises Krais pwehn pwurala pahn silahngin Koht.
Krais Kapkapahrek nan Sapwen Ngehn, sang Robert T. Barrett
Sises Krais
Sises Krais pil ketin sapwellimaneki kahlap ehu me iasada kolokol uduk oh tih. Iei Ih Sapwellimen Koht Iehros. Mwohn atail ipwidi, Koht ketin piladahr en wia atail Sounkomour. Met wehwehki me Sises ketdo sampa pwehn wia ehu atail mehn kahlmengi, padahngki Sapwellime rongamwahuo, tomwiki dipatail kan, oh kapitkitail sang mehla. Pwehki Sises Krais, kitail kin ale mahkpen diapatail kan ni atail kin koluhla. Sises Krais pil ketin lokolongki soahng tohto pwe En kak mwahngi oh sewesei kitail. Sises Krais ketin pwoula oh pwurehng ieiasda, kahrehda kitail koaros kak pwurehng mourda.
Kilel kan sang Getty Images
Ngehn Sarawio
Ngehn Sarawio iei emen tohn Godhead me sohte sapwellimaneki ehu kahlap. E wia ngehn ehu. Ngehn Sarawio kin kak sasair palingenitail kan. E kin ketin kadehdeiong kitail me Koht ketin ieias oh me Sises Krais iei atail Sounkomour. Ngehn Sarawio wia sapwellimen Koht meninkedehr me kin ketikihong kitail pepehm en limpoak, kaweid, de kansenamwahu. Ni atail kin pepdaisla oh katengetengedi, kitail kin ale kisakis en Ngehn Sarawi. Mwurin atail pepdais, Ngehn Sarawio kin kak ketiket rehtail ansou koaros ni atail kin kolokol kosonned akan en Koht.
Kasansal Keieu, sang Walter Rane
En Joseph Smith Kasansal Keieuo
Mwurin ansou iou aramas akan solahr wehwehki duwen Godhead. Aramas akan solahr pwungki dahme Koht, Sises Krais, oh Ngehn Sarawio kin duwe. Iei met ehu kahrepen me Kasansal Keieuo me Joseph Smith kilango kesempwalki. Ohlo kilang me mie kahlepen Sahm Nanleng oh Sises Krais oh ira ketin wia kahlap tohrohr riau.
Rongorong, sang Michael Jarvis Nelson
Tohrohr ahpw Ehupene
Irehn pwuhk sarawi kan oh soukohp en mwehi wet padahkihong kitail me Koht, Sises Krais, oh Ngehn Sarawi wia kahlap tohrohr kei ong kahrepe ehu te: atail mour sohte mehla oh mour soutuk (tehk Moses 1:39). Duwehte tohn ehute pwihn, Irail kin doadoahkpene pwehn sewesei kitail rahn koaros. Kitail kak karani Irail ni atail kin koluhkihla dipatail kan oh pilada wia me pwung.
Irehn pwuhk sarawi kan me pid Godhead
-
Sahm Nanleng oh Sises Krais kin wia ehu ni kahrepe (tehk Sohn 10:30).
-
Sahm Nanleng mahnseniong Sapwellime Ieroso (tehk Madiiu 3:16-17).
-
Sises Krais mahseniong Semeo (tehk Sohn 11:41).
-
Sises Krais ketin loulouki kitail en wiahla ehu ehu rahn (tehk Sohn 17:11).
-
Joseph Smith kilangada Sahm Nanleng oh Sises Krais (tehk Joseph Smith--History 1:17).
-
Ngehn Sarawio kadehde me Sises Krais iei atail Sounkomour (tehk Sohn 15:26).
© 2021 by Intellectual Reserve, Inc. Kolokol pwuhng koaros. Ntingda nan USA. Kamanaman ong ni lokaiahn Wai: 6/19. Kamanaman ong kawehwe: 6/19. Kawehwehpen Padahk en Sounpwong kan en Liahona, Suhn 2021.. Mahsen.17470 885.