“Tera te Atu n Atua?,” Riaona, Tuun 2021
Te Rongorongo man te Riaona ae Katoa Namwakaina, Tuun 2021
Tera te Atu n Atua?
Tamara ae i Karawa, Iesu Kristo, ao te Tamnei ae Raoiroi bon aomata aika kakaokoro ma ti teuana aia kantaninga.
Te tia mwakuri ibukin te nutibeba e titirakina te Burabeti ae Iotebwa Timiti bwa tera ae a kakoaua kaain Ana Ekaretia Iesu Kristo ibukiia Aika Itiaki ni Boong aika Kaitira. Kaekan aio, te burabeti e korea 13 koaua are ti aranna bwa Taekan te Onimaki. E taku te moan, “Ti kakoauaa te Atua, te Tama ae Akea Tokina, Natina, Iesu Kristo, ao te Tamnei ae Raoiroi” (Taekan te Onimaki 1:1). Aomata aika teniman aikai bon kaain te Atu n Atua.
Te Atua, te Tama ae Akea Tokina
Rabwatan te Atua e aki mamate ao iai irikona ao riina. Bon Ngaia Taman tamneira. E kororaoi ana tangira ibukiia natina ni kabane. E kororaoi te Atua, iai mwaakana iaon bwaai nako, ao e atai bwaai ni kabane. E motiraoi, nanoanga, man akoia. Ti maeka bwa tamnei imwain ae ti bungiaki. E kanakomaira nakon te aonaba bwa ti na reirei ao n rikirake. Nanon te Atua ae korakora bwa Natina n tatabemaniia a na okiria ni maeka ma Ngaia imwin matera. E reirei te Atua bwa ti riai n ira Iesu Kristo ibukin okira nakon Tamara are i Karawa.
E tataekina te Euangkerio Iesu n te Aba n Tamnei, iroun Robert T. Barrett
Iesu Kristo
Rabwatan naba Iesu Kristo e aki mamate ao iai irikona ao riina. Boni Ngaia ana karimoa ni mwaane te Atua. Imwain ae ti bungiaki, E rineaki iroun te Atua bwa e na riki bwa ara Tia Kamaiu. Are nanona bwa e roko Iesu nakon te aonaba bwa e na riki bwa te banna ni katooto nakoira, reirei Ana Euangkerio, kabooa ara bure, ao kamaiura man te mate. Mairoun Iesu Kristo, e kona ni kabwaraaki ara bure ngkana ti rairinanora. E rawaawata naba Iesu Kristo ni baika mwaiti ngaia are mai iai E kona n oota n ara kangaanga ao ni buokiira. E mate Iesu Kristo ao e manga maiu kaua, aio are e angania aomata ni bane te kona ni manga maiu.
Tamnei iroun Getty Images
Te Tamnei ae Raoiroi
Te Tamnei ae Raoiroi bon kaain te Atu n Atua are bon akea rabwatana. Bon te tamnei Ngaia. E kona te Tamnei ae Raoiroi n reitaki ma tamneira. E kakoaua bwa bon iai te Atua ao bwa Iesu Kristo bon ara Tia Kamaiu. E mwakuri te Tamnei ae Raoiroi bwa ana tia uarongorongo te Atua n anganira namakinan te tangira, kairi, ke te rau. N te tai are ti bwabetitoaki man kamatoaki, ti karekea ana bwai n tituaraoi ae te Tamnei ae Raoiroi. Imwin ara bwabetito, e kona te Tamnei ae Raoiroi n tiku iroura ngkana ti kawakin ana tua nako te Atua.
Moani Kaotioti, iroun Walter Rane
Ana Moan Kaotioti Iotebwa Timiti
N te tai teuana ma teuana a tia n aki oota aomata n te Atu n Atua. A bobuka n iango aomata bwa antai te Atua, Iesu Kristo, ao te Tamnei ae Raoiroi. Aio teuana bukina ngkai e rangi ni kakaawaki ana Moani Kaotioti Iotebwa Timiti. E noria bwa Tamara are i Karawa ao Iesu Kristo iai rabwataia ao bon aomata aika kaokoro.
Kakauongo, iroun Michael Jarvis Nelson
A kaokoro ma a Bonnano
Koroboki aika a tabu ao burabeti aika maiu a reireinira bwa te Atua, Iesu Kristo, ao te Tamnei ae Raoiroi bon aomata aika okoro ma ti teuana aia kantaninga: te aki mamate ao te maiu ae akea tokina ibukira (tara Mote 1:39). N ai aroia kaain te tiim ae tii teuana, A inanoi ni mwakuri n buokiira ni katoa bong. Ti kona n namakina te kaaniaki nakoia ngkana ti rairinanora ao n rinea te eti.
Kibu iaon te Atu n Atua
-
Tamara are i Karawa ao Iesu Kristo bon ti teuana aia kaantaninga (tara Ioane 10:30).
-
E taetae Tamara are i Karawa nakon Natina (tara Mataio 3:16–17).
-
E taetae Iesu Kristo nakon Tamana (tara Ioane 11:41).
-
E tataro Iesu Kristo bwa ti na nano teuana n taai rake aikai (tara Ioane 17:11).
-
Iotebwa Timiti e nora Tamara are i Karawa ao Iesu Kristo (tara Iotebwa Timiti—History 1:17).
-
E reireinira te Tamnei ae Raoiroi bwa Iesu Kristo bon ara Tia Kamaiu (tara Ioane 15:26).
© 2021 iroun Intellectual Reserve, Inc. A bane n tauaki mwiin taian kariaia ibukin katootongana. Boreetiaki i USA. Kariaiakaki n te Ingiriti: 6/19. Kariaiakaki rairana: 6/19. Rairan te Monthly Liahona Message, June 2021. Kiribati. 17470 859