Ua Na’o Tusiga Faatekinolosi: Autalavou Matutua
O Lesona e Fa o le Malamalama mo Taimi Pogisa
E ui ina faafofoli mai le faama’i oti e pei o se ao pogisa i luga o le lalolagi, ae o loo i ai lava ni auala e aumaia ai le malamalama i totonu.
E alala le tusitala i Voronezh Oblast, Rusia.
A o ou faasavaliina la’u taifau talu ai nei, sa ou matauina ao uliuli o ati mai ai ave o le lasusulu. Sa faamanatu mai ai ia te au le faama’i oti o loo i ai nei. E ui ina foliga mai e pogisa ma faanoanoa ia tulaga e pei o le ao, ae o le alofa o le Alii mo i tatou e sili atu ona malosi, e pei o le la.
Fai mai se faaupuga masani faaPeretania masani “e tofu lava le ao ma se fā’alo siliva,” o lona uiga e mafai e faigata uma ona aoaoina i tatou i se mea e aoga. A o ou mafaufau e uiga i le mea na fesoasoani e faatoafilemu ai a’u i nai masina ua tuanai atu ma le mea sa le’i matua fesoasoani mai, sa ou iloa ai e fa ni upumoni taua ou te lagona o le a faaauau pea ona faamanuiaina ai lo’u olaga pe a mavae atu lenei mala.
1. E i ai le Saogalemu i le Mulimuli i le Perofeta.
O faamatalaga o faasalalauga faaleagafesootai e uiga i le iuga o le lalolagi ma le pepelo o talafou e uiga i auala fatufatuai e faatamaia ai le vairasi ou te lei maua ai se lagona lelei e uiga i le olaga. E tusa lava pe o nei savali sa faamoemoe e fesoasoani ai i tagata ia nonofo saogalemu ma le soifua manuia, sa atili ai ona ou lagonaina le fefe nai lo le mea ua ou i ai. Mo se faataitaiga, ina ua mavae le vaaia o le tala lona ono e uiga i ni faamanogi meaai e ono mafai ona faaumatia le koronavairasi, ou te manatua le mafatia pe na lava ni a matou sapalai o faamanogi meaai i le kapoti, e faaopoopo i le mafaufau pe ua faamalumalu mai lo’u oti.
I le konafesi aoao i ni nai tausaga ua mavae, sa valaaulia ai i tatou e Peresitene Russell M. Nelson ina ia auai i se anapogi e 10 aso mai soo se ala o faasalalauga na aumai ai ni mafaufauga le lelei ma le eleelea i le mafaufau.1 O lana fautuaga na foliga mai o se lapataiga ia te au, o lea sa ou le toe faaaogaina ai nisi o polokalama o ala o faasalalauga faaagafesootai lea na uma ai le tele o o’u taimi avanoa. Sa amata ona ou fiafia ma tau le popole ai.
O lea la ua ou iloa e manaomia lo’u toe lafoaiina o o’u mausa faatafa’ilagi. Ou te toe tepa i tua ma le maofa ma le ofo: Pe na silafia e Peresitene Nelson i lena taimi, o ala o faasalalauga faaleagafesootai e mafai ona avea ma puna o le faanoanoa ma le le fiafia i le aso, i lenei taimi o le mala pagatia? E moni lava e i ai le saogalemu i le mulimuli i le perofeta. O upu a o tatou taitai o le Ekalesia e pei lava o se ave e tasi o le la, lea e ati atu i le fememea’i ma faamalamalama ai se ala i le filemu.
2. O Le Saunia e Faafeto’aia le Fefe
O se isi mea ou te lagona ai le le to’afimalie, o le faalogo atu i tagata o e, faapei o ona po o Noa, o taufaifai i isi i a latou tapenapenaga ma le mata’alia. Ou te manatu e i ai nisi tagata ua atiina ae ni uiga faaalia faatamala e uiga i le lumanai. O i latou o e e atamamai moni e mulimuli i fautuaga a perofeta ma taumafai ma le faaeteete ina ia ola tutoatasi.
Mo le tele o tausaga, na aoaoina i tatou e taitai o le Ekalesia ina ia saoloto mai aitalafu, ia maua se aoaoga e saunia lelei ai mo i matou lava faapea ma isi, ina ia i ai ni meaai ma ni vai e teuina, ma teu se tupe pe a mafai. Ou te iloa e eseese tulaga uma, ma o nisi atunuu e le faatagaina ai tagatanuu e teu meaai po o isi sapalai faaletino. Ae e ui lava i na ituaiga o sa, e foliga mai e mafai e i tatou taitoatasi ona faailoa mai se mea e mafai ona tatou faia ina ia sili atu ai ona saunia mo le lumanai.
Ou te lagona le saogalemu pe a ou taumafai e usitai ma mafai ona ou faalatalata atu i le Alii ma le talitonuga mautinoa pe a ou ole atu mo se fesoasoani. O lenei tapenapenaga e faapei o se isi ave o le la, e faavāvā mai i le fefe ma faaagiagia mai ai le faamoemoe.
3. O Uiga Faaalia e Faia ai se Eseesega
O lenei faama’i oti ua atili ai ona ou faafetai atu i tagata o e ua faamalosiauina au i savali faagaeetia, malamalamaaga faaleagaga, ma ni uiga malie lelei. O na uo pele e faamatagofieina e le aunoa lo’u aso. Latou te faamanatu mai ia te au e mafai ona tatou filifili pe faapefea ona tatou tali atu i soo se mea o loo tupu i lo tatou siomaga.
Sa ou taumafai e mulimuli i lenei faataitaiga ina ua taofia sauniga lotu a le Ekalesia. Nai lo lo’u gauai i fesili e tosoa’iina ai a’u i o’u tulivae e uiga i le “pe aisea” ma le “pe faapefea,” sa ou filifili e taulai atu i itu lelei o le aoaoina o le talalelei e taulai i le aiga. Ua mafai nei ona ou iloa, o le faafaileleina ma le loto o se uiga faaalia lelei, e ui lava ina faigata i le tele o taimi, na fesoasoani lea ia te au e tumau ai atili faaleagaga nai lo le mea na semanu ou te oo i ai pe a na ou tuu e malo le oona matuitui. E pei o se ave lona tolu o le lasusulu, e mafai e se uiga lelei ona motusia le masalosalo ma toe faafouina o tatou agaga.
4. O Le Agaga Paia o se Paga Mamana
I se tasi aso a o ou lagonaina le faanoanoa ma le tuuatoatasi, sa tonu ia te au e faalogo i le alaata o le Aufaipese a le Tapeneko i luga o le initoneti. E fesoasoani e le aunoa ia musika ia te au e lagona ai le tosinaga a le Agaga Paia. Sa i ai se talanoaga tuusao i le alaata, ma sa malie le vaai atu i tagata o faaalia lo latou alolofa ma le agaga faafetai mai le salafa o le lalolagi! Sa ou lagona le soofaatasi atu ma i latou. A o faatoamalieina e le Agaga Paia lo’u loto tiga, sa amata ona ou fiafia ma toafilemu.
Ua tele taimi ou te vaaia ai, afai ou te taumafai e valaaulia le Agaga Paia i lo’u olaga, o le a fesoasoani mai o Ia ia te au i soo se mea ou te manaomia. O ia o se paaga mamana o le e naunau e aumai ia i tatou ia meaalofa o le filemu, mafanafana, ma le malamalama. E pei o se ave o le lasusulu, e mafai ona ia tafiese le le fiafia ma faaali mai le mea moni.
Saili le Lasusulu
E malosi atu le Alii nai lo soo se puapuaga. E pei ona fai mai le fuaiupu lona lua o le viiga 49:
O Iesu lo’u sulu; e tulai mai ao fita,
O le faatuatua, e malosi atu nai lo le vaai, e vaavaai ae ai i luga i le lagi
O le mea e nofotupu ai Iesu e faavavau i le mamalu.
E mafai faapefea ona ou tumau i le pogisa?2
Maimau pe ana mafai ona tatou savavali faatasi i le aso. E mafai ona tatou tepa ae i luga i le lagi, mitiia i le lasusulu, ma talatalanoa e uiga i upumoni e faafiafiaina ai o tatou olaga. Ou te mautinoa maoae ni ou manatu lelei mo le faasoaina atu o lena malamalama i isi. Atonu e mafai ona e vaai faalemafaufau i se savaliga faapea i le isi taimi o le a ufitia ai e ni afa faalelagona le tafailagi. O loo faatasi le Alii ma i tatou, ma e le tatau ona tatou fefefe.