Monalivaliva Ga: iTabagone Qase Cake

Caka na Cakacaka Tabu nida Vakatikitikitaki Tu

Mai vei Kaith Ashley Moran

Ni ra sogo na valetabu, e rawa ni da tosoya tiko na veivuke ena cakacaka tabu mai vale.

iVakatakilakila

Vakaraica na tebeleti na goneyalewa

E vakaitikotiko o dauvolaivola mai Manila e na yatu Filipaini.

Au a sega ni namaka meu rogoca na veimalanivosa me vaka eratou a wasea na Mataveiliutaki Taumada ena vula sa oti: “Ni oti na kena vakasamataki vakamalua ena masumasu kei na gagadre me da lewenivanua nuitaki e vuravura taucoko, keitou sa lewa kina me sa vakacegui tu mada na cakacaka kece sara ni valetabu.”¹

E rairai me vakataki au, ko sa vakananuma tiko beka mo na sotava vakacava na veika dredre ni gauna oqo ni sega na veivanua savasava ni vakacegu vakaoqo. Eke e Filipaini, era sa sogo na valetabu ni se bera mada ni vakayagataki e dua na vanua ni vakatikitikitaki raraba, au sa gagadre tu kina ena gauna oqo meu lesu tale ki na vale ni Turaga.

Ia au sa qai raica e dua na ka bibi niu tiko vakatikitikitaki voli. E dina ga ni ra sa sogo na katuba ni valetabu, na cakacaka ni kena vakarautaki na cakacaka vakalotu e sega. Era se tikoga ena tai kadua ni ilati na noda qase e liu ka waraki keda meda vulica na veika baleti ira. Kevaka o vakasaqara tiko na sala me sureti kina na vakanananu tabu ni veiqaravi ena valetabu ki na nomu itikotiko, oqo e vica na vakasama:

Vakasaqara na nomu vunikau ni matavuvale ena FamilySearch.org.
Tovolea na tuvatuva vakamatanivola. Bibi cake sara vakalevu ka veivakacegui mai na qito vidio!
Vakayagataka na tekinolaji mo sema vei ira na wekamu era bula tiko.
Vola na italanoa ni nomu matavuvale.

Au sa sarava na sala sa “[vagolei] kina na yalodra na noqu matavuvale, me vaka e vakamacalataki ena Malakai 4:6, ka vakabulai keitou mai na rarawa, galili, kei na lomabibi. Ia e dina ga ni sega ni vinaka me da vakatikitikitaki tu, au vakavinavinakataka na madigi meu veivuke ena cakacakataki ni valetabu e vale.

Oqo e rawa me dua na gauna bibi ena noda bula. De rairai ena vakananuma beka vei keda na matetaka levu oqo na bibi ni valetabu. E rairai eda na vakavinavinakataka kina na madigi me da sikova vakalevu cake na valetabu mai na veigauna e liu. Me vaka eratou sa tukuna na Mataveiliutaki Taumada, “Oqo e dua na veisau lekaleka walega, ka da sa vakanamata tu ki na siga ena dolavi tale kina na valetabu.”²

Au sega ni rawa ni waraka na siga sa na rawa tale kina me da qarava na cakacaka vakalotu veivakabulai ena vukudra na tubuda! Me yacova na siga ko ya, sa dua na ka na levu ni cakacaka eda rawa ni cakava tiko.

Na Veivakalougatataki ni Veivakabulai

E kaya o Elder Dale G. Renlund ena Kuoramu ni iApositolo Le Tinikarua ni “gauna eda vakaitavi kina ena tuva kawa kei na cakacaka ni valetabu nikua, eda sa kaya tiko kina ni noda na ‘veivakalougatataki’ veivakabulai era sa yalataka tu na parofita kei na iapositolo. Na lisi balavu oqo e oka kina na veivakalougatataki oqo:

Kila vakavinaka cake na iVakabula kei na Nona isoro ni veivakaduavatataki;
Vakalevutaki na veivakauqeti ni Yalo Tabu me da vakila na kaukauwa kei na veidusimaki ena noda bula;
Vakalevutaki na vakabauta, me titobu ka tudei na saumaki mai vua na iVakabula;
Vakalevutaki na kaukauwa kei na gagadre me da vuli ka veivutuni baleta ni da sa kila o cei o keda, eda lako mai vei, ka matata cake noda raica se da lako tiko ki vei;
Vakalevutaki na vakasavasavataki, vakatabui, ka vakadodonutaki na veivakayarayarataki e yaloda;
Vakalevutaka na reki ena kena vakalevutaki na kaukauwa me da vakila na loloma ni Turaga;
Vakalevutaka na veivakalougatataki ena noda matavuvale, se cava ga na ituvaki ni noda matavuvale ena gauna oqo, gauna sa oti, se gauna se bera mai se vakacava sara tu na ituvaki ca ni noda vunikau ni matavuvale;
Vakalevutaki na loloma kei na vakavinavinaka me baleti ira na tubuda kei ira na bula tiko, eda sega kina ni vakila ni da tu taudua voli;
Vakalevutaki cake na kaukauwa me da kila na veika e gadrevi me vakabulai ka yaco kina, ena veivuke ni Turaga, me da qaravi ira na tani;
Vakalevutaki na veitaqomaki mai na veitemaki kei na veivakayarayarataki kaukauwa nei vunica; kei na
Vakalevutaki na veivuke me vakavinakataki na yalo rarawa, ramusu, se yalolailai ka vakataucokotaki na mavoa“(”Tuva kawa kei na Cakacaka ni Valetabu: Veivauci kei na Veivakabulai,” Ensign se Liaona, Me 2018, 47).