Itulau i le lotoifale
Talai Pea le Talalelei. Faaaoga Upu pe a Manaomia.
O Tamana o le motu e sili ona laitiiti o Kiripati, ua ta’ua nei o le Ripapelika o Kiripati. E na o le 4 maila le umi i le 0.5 maila le lautele (6.4 x 0.8 km) ma o se aiga i le itiiti ifo ma le 1000 tagata.
I le sili atu ma se seneturi talu ai, na auina atu ai e faifeautalai Samoa le lotu Porotesano i Tamana. Ina ia faamamaluina nei faifeautalai, na osi ai e tagata o Tamana se feagaiga e ala i le fausiaina o se maa faamanatu. Na latou tauto o le a latou faatinoina tau lava o le tasi le faatuatuaga: o le Kiribati Protestant Church, po o le KPC.
E oo mai lava i lenei aso, o loo faamamaluina pea e Tamana lena feagaiga, e teenaina faifeautalai mai isi lotu ma ua lipotia mai le fetogiina i maa o soo se tasi e taumafai e alu ese mai le latou lotu. I le aso 18 o Oketopa 2020, o le a faamanatuina ai e Tamana le 150 o tausaga o le lototasi o le KPC.
Na mauaina lenei talafaasolopito, ma ina ua valaaulia Elder ma Sister Brock—o ni faifeautalai o galuega alofa mai le Ekalesia a Iesu Keriso o le Au Paia o Aso e Gata Ai—i Tamana, na la fiafia ma faaeteete i le taimi lava lea. Ae faapefea pe afai e moni nei tala? I le avea ai ma ni tagata o se faatuatuaga ese, pe o le a la feagai foi ma na faaiuga? Pe o se tulaga atamai le taliaina o le valaauga?
Na amata le fiafia o Elder ma Sister Brock i Tamana i aso o le popofou o le la misiona i Ripapelika o Kiripati. Ao iloiloina galuega faatino o le uelefea, na tau ai Sister Brock i se talosaga mo le 12 tane vai ia faatuina i Tamana.
Na ia iloaina o lenei motu e sili ona vavamamao tagata o Kiripati na galulue malosi e suia fale ato lau o le 12 falelotu o nuu i ni faleapa. O se tasi o mea e lelei ai faleapa o le mafai lea ona maua ai le vaitimu ma aoina ai, lea na manaomia ai e Tamana le 12 tane vai. “Ona maua [ai lea] e tagata o le nuu ni vai mama,” o le tala lea a Sister Brock, “ona le toe popole ai lea i vaimasima e ulu mai i totonu o a latou vaieli. E foliga mai o le galuega faatino tonu lava lea.”
Na imeli atu Sister Brock i le Sui o Kiripati i le Palemene mai Tamana e fesili pe o loo manaomia pea ni tane vai, ma ia faatulaga se fonotaga. Na vave lava ona tali mai le Sui o le Palemene o Tekeeua Tarati.
Na faamatala atu e Tekeeua i se taumafataga o le aoauli i le au Brocks le talafaasolopito faalelotu o Tamana. O ia lava o se tagata faamaoni o Le Ekalesia a Iesu Keriso o le Au Paia o Aso e Gata Ai, na faamatala ai e Tekeeua lona ola a’e i talafatai o Tamana ma na faasoa atu le faigata tele mo ia ona avea ma sui o le Palemene mo le motu ona o le ‘ese o lana lotu.
Ae na foliga mai na faamalūlūina loto o tagata Tamana. I le amataga o le 2019, na faaleagaina le motu e se afa matautia. “I le avea ai ma se lotu, na matou ofoina atu se fesoasoani o faalavelave faafuasei,” na fai mai ai Sister Brock. I le mavae ai o se uluai teena ona o tulaga faalelotu, na iu ina taliaina le fesoasoani, ma na vave lava ona auina atu e le Ekalesia se vaa oloa e tumu i sapalai. Na maua e le Ekalesia se tusi o le agaga faafetai mo tagata o Tamana.
Ae lei malaga atu Elder ma Sister Brock i Tamana, na taitaia e Tekeeua se faagasologa o fonotaga faatasi ma taitai o le motu i le lotoifale. Na ia faamatala atu ia i latou o le au Brocks e le o ni faifeautalai faamisiona, ma pau le mea na la manaomia o le fausiaina o se sootaga ma Tamana ina ia mafai ona la amata le galuega o le faatuina o tane vaitimu. “Na fefautuaai faatasi taitai o le motu ma fesili atu i nuu pe o le a latou lagolagoina sea ituaiga o asiasiga,” na fai mai ai Sister Brock. “O le mea na ofo ai, na autasi le palota: ‘E mafai ona latou o mai.’”
Na i ai pea sina popolega, ae na teuina e le au Brocks ni nofoa faataavalevale se 2, ni seti o tootoo se 2 ma isi sapalai o vailaau ma pu’e atu le la vaalele e 2 itula i Tamana. “Na ma malilie e aua le faia a ma pine faafaifeautalai,” o le tala lea a Sister Brock. Nai lo lena, na ia ulaina se fatu laupapa na ia faia i se tolauapiga a teine ao auauna atu o se Peresitene o Tamaitai Talavou o le Siteki i le aiga i Atlanta, Georgia. “Na ou iloaina afai latou te vaai i le pine o le fatu i lou ofu, o le a latou uluai iloa ai o le ‘alofa’ lo matou naunautaiga.”
O le iuga, na faateleina le alofa i itu uma e lua. Ina ua la taunuu, na faafeiloaia i laua ma le agaalofa i le malaevaalele i ni ula, niu malulu ma faapotopotoga na aofia ai le faifeau o le lotoifale, le taitai toeaina o le latou lotu, le fautua o le lotu, tagata o le nuu ma le pulenuu foi. I le aluga o le isi vaiaso, na feiloai soo le au Brocks ma tagata o le lotu i le lotoifale—i le faaaumea, faafiafiaga, taumafataga, ma tapuaiga faatasi ma i latou. Ina ua iu ina la tuua Tamana, sa pei ua tuua se aiga.
I le avea ai ma faifeautalai o galuega alofa, na soifua Elder ma Sister Brock i le fautuaga a Saint Francis o Assisi: “Talai pea le talalelei. Faaaoga upu pe a manaomia.”
Ua manatu Sister Brock o gaoioiga o le auauna atu, alofa, agalelei ma le lototasi o ni foliga mamana ia o le faatuatua o se tasi. “O le a ma faafetai pea lava i le Sui Palemene o Tekeeua Tarati mo le valaauliaina o i maua i Tamana e feiloai atu i ni tagata e faapea ona amio faaKeriso,” ua ia saunoa ai. “Ou te tatalo ia avea lo matou manao ia maua ni vai mamā mo o latou nuu o se auala laupapa i se faaaumea faaauau pea faaKerisiano.”