Rongorongon te Ekaretia
Kaboouan Taian Titiraki ibukin te Beeba ni Kariaia ao Tabeua Rongorongon te Tembora
Kaboouan taian titiraki n te intawiu ibukin te rekomente nakon te tembora a karaoaki iroun Beretitenti Russell M. Nelson n tain te maungatabu ni kabuta n Okitobwa 2019 (taraa iteraniba 121). Taian kainibaire ibukin te tembora a teimatoa n tiku n aroia, ma tabeua titiraki a manga kaetaki taekaia bwa aonga ni mataata raoi. Taan kairiiri aika a nakoraoi a riai ni karekea te reta mairouia te Moan Beretitentii ae bonginaki n Okitobwa 6, 2019, are e raonaki ma titiraki aika a kaboouaki.
Beretitenti Nelson e katanoatai naba baire ibukin waniua tembora aika a boou (taraa iteraniba 79). Tembora aika a boou a mena i Freetown, Sierra Leone; Port Moresby, Papua New Guinea; Bentonville, Arkansas, USA; Bacolod, Philippines; McAllen, Texas, USA; Cobán, Guatemala; ao Orem ao Taylorsville, Utah, USA.
Man te maungatabu ni kabuta n Eberi 2019, a katabuaki taian tembora i Kinshasha, Democratic Republic of the Congo; Lisbon, Portugal; Port-au-Prince, Haiti; ao Fortaleza, Brazil; ao ni manga katabuaki i Oakland, California, USA; Memphis, Tennessee, USA; Frankfurt, Germany; Oklahoma City, Oklahoma, USA; ao Raleigh, North Carolina, USA.
E katabwenaaki aontano ibukin taian tembora i Yigo, Guam; Praia, Cabo Verde; San Juan, Puerto Rico; Lima, Peru (Los Olivos); ao Belém, Brazil, ao a rineaki taabo ibukin taian tembora i Auckland, New Zealand, ao Layton ao Saratoga Springs, Utah, USA.
Babaire ake a karaoaki a uki nako ibukin onobwaian te Salt Lake Tembora, are e na in n Ritembwa ao ni manga moan kaukaki n 2024, ao te St. George Utah Tembora, are e na in n Nobembwa 2019 ao ni manga moan kaukaki n 2022.