Pōpoaki mei he Kau Taki Fakaʻēliá
Te u Hoko Ko Hoʻo Maama
ʻOku ʻafioʻi maʻu pē ʻe he ʻEikí ʻa ʻEne kau tamaioʻeikí pea fakahoko foki mo ha ngaahi tukupā kiate kinautolu. Kuó ne fakahoko e ngaahi tukupaá ni ʻi ha ngaahi fuakava.
Naʻe fakahā ʻe he ʻEikí kia Sōsiua, “. . . ʻo hangē ko ʻeku ʻia Mōsesé, ʻe pehē pē ʻeku ʻiate koé; ʻe ʻikai te u fakatukutukuʻi koe, pe siʻaki koe. Kae kehe ke mālohi pē ʻa koe mo ke lototoʻa ʻaupito.”
Naʻe folofola ʻa e ʻEikí ki he fāmili ʻo Līhaí ʻi heʻenau fononga ko ia ki he fonua ʻo e talaʻofá, “Te u hoko foki ko hoʻomou maama ʻi he feituʻu maomaonganoá . . . te mou ʻilo nai ko au ʻoku tataki ʻa kimoutolú.”
ʻI he ʻĒlia Pasifikí ʻi he ʻahó ni, ʻoku ʻi ai haʻatau kau Līhai mo ha kau Sōsiua fakaonopooni kuo mau manatu ki he lelei ʻa e ʻEikí pea mo e ngaahi tāpuaki ʻi heʻenau moʻuí ʻi he kuohilí mo e lolotongá foki. ʻOku pehē foki ko e “manatú ko ha fakaʻilonga ia ʻo e houngaʻia”. Kuo mau ʻoatu ha fakaafe ki he ngaahi hoa mali matuʻotuʻa ʻi hotau ʻĒliá kotoa, ke nau haʻu pea ngāue ʻi he ngaahi konga ʻo e Pasifikí ʻoku kei langalanga hake ai e Siasí. Kia kinautolu kuo ngāue pe ʻoku lolotonga ngāué, ko ha founga ia ʻoku nau tokoni ai ki he niʻihi kehe ne toki ului mai ki he Siasí. Mahalo ko e tupuʻanga ko ia ʻo e faifekau hoa malí ʻi he Siasí, ne kamata ia ʻi ha ngaahi taʻu lahi kimuʻa, ʻi he taimi ne omi ai e kau faifekaú mei ʻAmelika ke akoʻi ʻenau ngaahi kui ne nau tali e ongoongoleleí. Ko e kau fuofua ului ko ia mei motú, ne nau ʻuluaki ngalikeheʻia ʻi heʻenau tui fakalotu foʻoú, ʻo hangē pē ko e kau mēmipa foʻou ki he Siasí. ʻOku mau ui atu ʻi he lolotongá ni ki heʻetau kau hoa mali matuʻotuʻa fakaonopooni ʻi he Siasi kuo fuoloa hono fokotuʻú ke omi pea tokoni ke fakamālohia honau ngaahi tokoua mo e tuofāfine ʻi he Siasi kuo ʻikai fuoloa hono fokotuʻú. Ko e moʻoni, ʻoku nau “ʻoatu ʻa e māmá”. ʻE fakamoʻoniʻi ʻe he Laumālie ʻo e ʻEikí ʻo fakafou ʻi heʻenau ngaahi sīpingá, ko e ivi tākiekina ia ʻa e ʻEikí ʻokú ne tataki kitautolú.
ʻOku fakahoko ʻe he kau faifekau hoa mali matuʻotuʻá ha liliu, ʻi heʻenau fakaʻaongaʻi ʻenau aʻusiá pea akoʻi e kau mēmipa ʻi he Siasi langalanga foʻoú ki he founga ke tataki ʻaki e Siasí, pea mo hono fakaʻaongaʻi e ongongoleleí ʻi heʻenau moʻui fakaʻahó. ʻOku ʻi ai foki e fenāpasi e ʻulungaanga fakafonuá mo e kakai mei he ngaahi feituʻu hangē ko Pāpua Niu Kini, ʻOtu Motu Solomoné, Vanuatu, ʻOtu Motu Māsoló pea mo Kilipati. ʻOku omi ʻetau ngaahi hoa mali ko ia ʻoku nau lolotonga ngāué, mei Haʻamoa mo Tonga, kae pehē foki ki he kau Haʻamoa mo e kau Tonga ʻoku nau nofo ʻi he ʻIunaiteti Siteití, Nuʻu Sila pea mo ʻAositelēlia. Ne ʻi ai foki mo hotau tokoua mo hono uaifi mei Pāpua Niu Kini ne na ngāue.
Fakakaukau ki he ngaahi fakamoʻoni ʻa e ngaahi hoa mali kuo nau ngāue pe lolotonga ngāue:
“Ko e taha e ngaahi aʻusia lelei taha kuó ma maʻu ʻi heʻema moʻuí , ko homa misiona taʻu ʻe ua ki he Ngaahi ʻOtu Motu Solomoné, . . . ʻa ia naʻe tokoni mai ke ma maʻu ha fakamoʻoni mālohi . . . ke mahino e ʻofa ʻa ʻetau Taimi ʻi Hēvaní pea mo hotau Fakamoʻuí ʻiate kitautolú, pea mo ʻEne fānaú kotoa. Kuó ma ongoʻi naʻe fakafoʻou pea mo fakamālohia kimaua pea “lue ʻo ʻikai ongosia”. Naʻá ma mamata ki ha ngaahi mana mo e toʻukupu ʻo e ʻEikí ʻi heʻema moʻuí mo e moʻui ʻa e Kāingalotú ʻi he fakalakalaka ʻo e ngāué”. —Misa Viiga mo Sisitā Lupe Fuimaono, Siteiki Haʻamoa Pesengá
Naʻá ku hoko ko ha kalake fakasiteiki ʻi ha ngaahi taʻu lahi ʻi he malumalu ʻo e tataki ʻa ha kau palesiteni fakasiteiki kehekehe. Naʻe teuteuʻi kimaua ʻe he ʻilo mo e aʻusia naʻá ku maʻú, ke ma ngāue pea tokoniʻi e Lakanga Fakataulaʻeikí mo e kau taki houalotu ʻi he Siteiki Talau Pāpua Niu Kini. Naʻá ma lau eni ko ha tāpuaki. Ko ha tāpuaki maʻu pē ʻa ʻema tokoni ki he ʻEikí mo hoku hoa taʻengata ko Sisitā Taalá”. —Misa Lamese mo Sisitā Loleta Taala, Siteiki Haʻamoa Hihifo Pango Pangó
“Naʻe fuʻu mahuʻinga ʻaupito kiate kimaua ʻa ʻema ngāue ʻi Pāpua Niu Kiní ka e tautautefito kia Misa Sekisoni, he ko e tangataʻifonua ia ʻo e fonuá. Ko ʻema ngāué ko ha fakaʻānaua fuoloa ke foki ki PNK ke talaki e ongoongolelei kuo fakafoki mai ʻo Sīsū Kalaisí ki homa fāmilí mo e kakaí. Ne ʻomi kiate kimaua ʻe he tui fakaʻaho homa pine faifekaú ha ivi makehe ʻo e tuí mo e ʻamanaki leleí. . . .” —Misa Pita mo Sisitā Selina Sekisoni, Eight Mile Plains Australia Stake
“Fakamālō atu ʻi hono ʻomi e ngaahi hoa mali fakaʻofoʻofa ko ení ke nau ngāue heni ʻi PNK. ʻOku nau tokoni lahi ki he fakalakalaka ʻa e Siasí mo hono fakamālohia e kau mēmipá ʻi hení. ʻOku nau hoko ko ha kau taki, kau ʻetivaisa, kau fai fakahinohino mo e kau faiako ʻi honau ngaahi kolo ʻo e Siasí mo e uōtí. ʻOku nau to e tokoni foki ki he kau ʻEletā taimi kakató ke tokoni ki he niʻihi ʻoku ʻikai kau ki he siasí pē ko e kau māmālohi fakatou’osi ʻoku nau foki maí. Ko hono olá, ʻoku ou vakai ai ki he tokolahi ʻo e kau maʻu houalotu sākalamēnití. ʻOku tokoni ʻa e kau fafiné ʻi he Palaimelí, Finemuí mo e Fineʻofá, ke fakamālohia e ngaahi houalotú ni”. —Palesiteni Fakamisiona Finau Hafoka, Misiona Pooti Molasipei Pāpua Niu Kini
ʻI heʻenau ngāué, ʻoku fakamālohia ai ʻe heʻetau kau faifekau hoa mali matuʻotuʻá ʻa e Siasí. ʻOku na hoko ko ha meʻa ngāue ke ʻomi ai ʻe he ʻEikí ʻa e maama ʻo ʻEne ongoongoleleí ki ha kakai mo ha fonua. ʻOku tō ha ngaahi tenga ʻi he ngaahi lotó mo ha ngaahi fakakaukau lelei. ʻOku hā mahino mai e talaʻofa ‘a e ‘Eikí, “Te Ne ʻi honau mataʻú mo honau hemá pea ʻe ʻi honau ngaahi lotó ʻa Hono Laumālié pea ʻe takatakai ʻa kinautolu ʻe Heʻene kau ʻāngeló, ke poupouʻi hake ʻa kinautolu”.