Eria Lidasip Mesej
Blong Save, blong Andastanem mo Stap Obei long Ol Komanmen blong God
Hem i wan samting blong save long ol komanmen. Hem i wan nara samting blong andastanem ol komanmen. Be yet, hem i wan nara samting blong wantem blong obei long ol komanmen.
Olsem wan niu konvet long Jos, taem mi kasem tetin ia, mi kam blong save long olgeta komanmen. Be, mi no bin andastanem risen from wanem i gat samfala komanmen blong Lod, mo mi no tingting se mi save luk olgeta blesing ia blong stap obei long olgeta. Eksampol: afta we mi bin fetful blong obei long Tok blong Waes blong wan smol taem, paoa blong mi mo paoa blong plei spot blong wan longfala taem i no kam gud moa, mo long sam kes, i mowas long hemia blong ol fren blong tim we oli no bin stap obei long evri saed blong Tok blong Waes. I luk se olgeta nao, oli olgeta we oli save ron mo oli no taed,1 be i no mi, be, wetem fet, mi bin gohed blong obei.
Antap long hemia, mi luk se olgeta komanmen oli stap katemaot mi, mo oli stap katem stael blong mi. Naoia, kolosap 48 yia afta, mi luk ol komanmen olsem oli mekem mi mi fri, be oli no mekem mi mi kalabus. ?Wanem i bin jenis? I no olgeta komanmen. Hem i andastaning blong mi mo fasin blong mi we i bin jenis.
Naoia, mi luk olgeta komanmen olsem we mi luk saen ia long ol solwota, “Swim long medel blong ol flag ia nomo;” mo mi glad long hemia. Blong mi fri blong glad blong go swim long solwota, long wan ples we oli talem finis se i sef blong swim long hem, bae mi jusum blong swim bitwin ol flag nomo. I tru. Mi save jusum blong go swim nara ples, be sapos mi mekem olsem, mi mas akseptem ol risal blong desisen ia.
Naoia, mi jusum blong obei long olgeta komanmen from se mi faenem bigfala pis mo sefti blong mekem samting ia, mo wetem taem we i pas, mi bin luk olgeta blesing blong stap obei long ol komanmen ia.
Elda Dale G. Renlund blong Kworom blong Olgeta Twelef Aposol we i bin stap toktok abaot ol komanmen, i talem: “Plan blong God, insaed i gat ol daereksen blong yumi folem, we insaed long ol skripja, oli singaotem, ol komanmen. Olgeta komanmen ia oli no ol faniwan, o oli ol eni kaen rul olbaot we oli blong trenem yumi nomo blong stap obei. Oli stap blong yumi developem ol fasin olsem hemia blong God, blong gobak long Papa blong yumi long Heven, mo kasem glad we i stap oltaem. I nomata we God i wantem yumi blong stap long kavenan rod, Hem i givim yumi gudfala fasin ia blong save mekem joes.”2
Olsem Nifae, blong gud blong mi, mi save se “Mi mas obei.”3
Glad, hapines, bigfala harem gud long yuwan, filim se yu stap sef mo gat wan tabu stamba tingting long laef, wetem taem, oli kam long olgeta we oli andastanem mo oli stap obei long ol komanmen. Wan i tru, i we, taem we yumi stap obei long olgeta komanmen wetem fet, nao bae yumi kam blong andastanem olgeta. Jon i talem toktok blong Lod we i talem se: “Mo sapos wan man i tingting strong blong mekem ol samting we God i wantem, hem bambae i faenemaot se tok ya blong mi i kamaot long God, no i kamaot long mi nomo.”4
Edgar A. Guest i raetem ol toktok ia we i kasem paoa blong mekem olsem, be i no blong jes talem nomo.
Mi laekem blong yu wan toktok, be i no blong harem wan long eni dei;
Mi laekem blong wan i wokbaot wetem mi, be i no blong hem i talem mi rod blong folem.
Ae, i wan man we i moa gud, i wantem moa samting bitim sora;
Gudfala kaonsel i save mekem tingting i fasfas, be eksampol i klia oltaem,
Mo beswan long evri priha oli olgeta man ia we oli laef folem toktok blong olgeta,
Blong luk wan gud samting i kam aksen, i wanem evriwan i nidim.
Mi save lanem kwik olsem wanem blong mekem sapos yu letem mi mi luk se oli mekem olsem wanem;
Mi save luk han blong yu long aksen, be nogud tang blong yu i ron kwik tumas.
Mo ol longfala toktok yu givim, maet oli waes mo oli tru,
Be mi wantem tumas blong kasem lesen blong mi taem mi luk wanem nao yu stap mekem.
From nogud mi mestem mi no andastanem gud yu mo advaes ia we yu givim,
Be mi no save mestem sapos mi luk hao yu mekem samting mo olsem wanem nao yu yu stap laef. 5
Blong stap olsem disaepol i no jes abaot blong save olgeta komanmen olsem we yu lanem samting long skul, mo no stap laef folem. Blong stap olsem disaepol i no blong obei ol komanmen wetem wan blaen ae. Tru fasin blong stap disaepol i blong kam blong andastanem olgeta komanmen, mo afta, blong mas glad blong obei olgeta, from se yumi kam blong save se oli wan blesing we i kam long Papa we i stap long Heven.