Aoaoina o le Saega o se Masiise’u [Skunk]

Ata

woman with skunk following

Soo se taimi lava ou te mafaufau ai e uiga i le ola faalagolago o le tagata ia te ia lava, ou te manatua ai lava se fuaitau mai lo’u peresitene o le misiona: “Sae a oe lava masiise’u [skunks].” Ioe o se faamatalaga e ese lava, ae e tele ni upumoni i le manatu e faapea, e i ai mea faigata i o tatou olaga e le mafai ona tatou fai atu i isi e taulimaina mo i tatou.

E faapefea la ona tatou “saeina a tatou lava masiise’u [skunks]” e faatatau i le ola faalagolago o le tagata ia te ia lava i le faalelagona? E faapefea ona tatou taulimaina mea e le fiafia ai ma aoao e pulea o tatou lagona uma lava?

O le mea e faafetai ai, e le o tuua i tatou i le pogisa—e anoanoai punaoa. E mafai ona tatou maua ni nai mea nei i le “O Auala e 14 e Toe Maua Ai Lou Ola Maloloina Faalelagona.” O le mea e sili atu le taua, e mafai ona tatou faafaigofieina le olaga pe a tatou tausia poloaiga (tagai itulau 44).

O le aoao e tali atu i mea uma e tau’ai mai e le olaga ia i tatou o se faagasologa. O le faalagolago o le tagata ia te ia lava i le faalelagona e le faapea ai o le a tatou lagona i taimi uma ia lagona tatou te mananao i ai. O lona uiga, e ala mai i le alofa tunoa o Iesu Keriso ma a tatou lava taumafaiga, o le a mafai ai ona tatou pulea lagona i ni auala maloloina ma aoga. Ua tuuina mai e Peresitene M. Russell Ballard ia i tatou nisi o fautuaga aoga mo le ausiaina o lenei paleni (tagai itulau 48).

A o tatou taumafai mo le ola faalagolago o le tagata ia te ia lava i le faalelagona, atonu tatou te lagona le pei o se manutagi laitiiti ma vaivai, (tagai itulau 46), ae a tatou faia se taumafaiga ma faapaaga faatasi ma le Tama Faalelagi, e mafai ona tatou mautinoa e i ai se aso o le a tatou “sii ae apaau e pei o aeto” (Isaia 40:31), o se auala feni lea o le fai atu, o le a tatou maua le malosi e sae ai a tatou lava masiise’u[skunks].

Ia manuia tele,

Heather J. Johnson

Fautuaga Sili Ona Lelei …

Ua faasoa mai e le autalavou matutua ia fautuaga e sili ona lelei ua latou mauaina e uiga i le vaaia lelei o o latou soifua maloloina faalelagona ma faalemafaufau:

“Fai se taimi mo oe lava e faamalositino ai, kilia ai lou mafaufau, ma aveese ai ni mafaufauga ma ni faalogona oona o ia te oe.”

—Brianna Forrester, Uosigitone, ISA

“Aua le fefe e vaai se fomai o le mafaufau. Faatasi ai ma le tuufaatasiga tatau o togafitiga faaleagaga ma faaletino, ua mafai ai ona ou ola i lo’u olaga ma o loo ou faatalitali mo se valaauga o le misiona ina ia mafai ona ou auauna atu i le Alii.”

—Nate Seal, Iuta, ISA

“Ia feololo i mea lelei uma e maua a o faaogatotonu lou olaga ia Keriso.”

—Nan Crews, Louisiana, ISA

“Ia manatua ia lava le moe. E foliga malie, ae o le mea moni e silisili le taua!”

—Sydney Smith, Kalefonia, ISA

O le a le fautuaga aupito sili ona lelei ua e mauaina e uiga i le aua e te soona faatigaina oe lava? Auina mai lau tali i le liahona.lds.org i le aso 31 o Ianuari, 2019.