Ol Yang Adalt
8 Tingting blong Save Mekem Balens long Wanem Laef I Askem
Presiden M. Russell Ballard
Akting Presiden blong Kworom blong Olgeta Twelef Aposol
I kam long wan toktok blong jeneral konfrens blong Epril 1987.
Mi gat samfala tingting we mi hop se bae i gat valiu long olgeta we oli gat wari blong balensem wanem we laef i askem.
Ol pikja foto mo pikja bokis oli kam long Getty Images
-
Faswan, tingting abaot laef blong yu mo putum ol samting we oli nid blong kam faswan. Faenem wan taem we i kwaet, mo mekem hemia oltaem. Tingting dip abaot weaples yu stap go long hem, mo wanem yu nid blong mekem blong kasem ples ia. Jisas, we i eksampol blong yumi, plante taem “hem i stap go hemwan long ol ples we i no gat man, blong i prea” (Luk 5:16). Yumi nidim blong mekem sem samting wanwan taem, blong givim paoa long yumiwan long saed blong spirit, olsem we Sevya i bin mekem. Raetemdaon ol wok we bae yu mas mekem evri dei. Kipim antap long evriwan, ol tabu kavenan we yu bin mekem wetem Lod taem yu stap raetemdaon evri dei taemtebol blong yu.
-
Sekenwan, setem ol sot taem gol we yu save kasem. Setem ol gol we oli balens gud—i no plante tumas, o i no smol tumas, mo i no hae tumas, o i no daon tumas. Raetemdaon ol gol we yu save kasem, mo wok long olgeta folem hamas oli impoten. Prea blong heven i lidim yu taem yu stap putum ol gol blong yu.
-
Nambatri, tru long fasin blong yusum mane wetem waes, kontrolem ol ril nid blong yu, mo makem gud olgeta agensem ol fulap samting we yu wantem long laef. Plante man, woman mo famli, oli mekem bigfala kaon tumas. Lukaot gud long ol swit rod blong go boro mane. Hem i isi tumas blong boro mane, be i no isi nating blong stap pembak. I no gat rod we i sot kat blong stap sef long saed blong faenens. Bambae yumi neva gat balens long laef blong yumi sapos yumi no stap kontrolem nating faenens blong yumi.
Tingbaot blong pem wan ful taeting oltaem.
-
Nambafo, stap kolosap long waef o hasban blong yu, ol pikinini, ol nara famli mo ol fren. Bambae oli helpem yu blong gat balens long laef blong yu. Bildimap ol rilesensip wetem famli blong yu mo ol fren blong yu tru long wan komunikesen we i open mo i ones.
Wan gudfala mared mo wan gudfala famli rilesensip, bae oli save holemtaet tru long fasin blong toktok we i kwaet, i gat lav mo tingting long hem. Tingbaot se plante taem, wan lukluk, sarem wan ae, sakem hed, o tajem han bae i talem moa toktok. Wan gudfala wei blong save mekem fani mo fasin blong lisin gud, oli ol impoten pat blong save komunike o toktok.
-
Nambafaef, stadi ol skripja. Oli givim wan gudfala ples blong toktok wetem Spirit blong Lod. Wan long ol wei we mi bin kasem stret save blong mi se Jisas Hem I Kraes, hem i tru long stadi blong ol skripja. Presiden Russell M. Nelson i bin askem ol memba blong Jos blong prea mo stadi long Buk blong Momon evri dei.
-
Nambasikis, yumi mas putum taem long evri dei taemtebol blong kalenda blong yumi spel inaf, mekem eksasaesem mo save rilaks sapos yumi wantem glad long wan helti mo balens laef. Taem yumi mekem yumi luk gud, i mekem se yumi filim gud mo gat respek long yumiwan.
-
Nambaseven, holem famli haos naet long evri wik. Yumi no mas lusum spesel janis ia blong “tijim long wanwan long [yumi] bakegen, doktrin blong kingdom” (D&K 88:77), we bae i lidim ol famli i go long laef we i no save finis.
Oltaem, Setan i stap wok blong prapa spolem gud ol testemoni blong yumi, be bae hem i no gat paoa blong temtem, o spolem yumi i bitim paoa blong yumi save agensem hem taem yumi stap stadi long gospel mo stap laef folem ol komanmen blong gospel ia.
-
Las tingting blong mi, i blong prea oltaem. Bae yu kam blong save ol raet desisen we yu stap mekem evri dei tru long prea we yu stap mekem oltaem, mo yu mekem wetem tru tingting. Taem mi joen wetem Spirit, mi faenem se mi save balensem evri samting long laef blong mi, i isi moa.
Mi luksave se i gat ol nara tingting we yumi save ademap long ol tingting we i stap ia. Be, mi biliv se taem yumi lukluk nomo long samfala besik stamba tingting, bae yumi save lukaotem gud moa hao blong lukluk long ol plante samting we laef i askem long yumi. Tingbaot. Tumas long wan samting long laef i save sakemaot yumi, mo yumi save lusum balens. Long sem taem, taem i no gat inaf long ol impoten samting, i save mekem sem samting. King Benjamin i givim advaes ia, “se oli mekem ol samting ia long waes tingting mo long oda” (Mosaea 4:27).
Plante taem, taem yumi no gat klia daereksen mo klia gol, i save mekem se yumi westem taem mo paoa blong yumi, mo i mekem tu se bae yumi no save gat balens long laef blong yumi. Stamba gol blong yumi i long lukaot blong “nomo save ded, mo gat laef we i no save finis” (Moses 1:39). Wetem hemia olsem gol blong yumi, ?weswe nao yumi no save katemaot long laef blong yumi, ol samting ia we oli pulumaot mo kakae ol tingting, ol filing, mo ol paoa blong yumi, mo oli no givhan blong yumi kasem gol ia?
Jes mekem evri bes blong yu evri dei. Mekem ol besik samting, mo, bifo yu luksave, bae laef blong yu bae i fulap long andastaning we bae i konfemem long yu se Papa long Heven i lavem yu. Taem wan i save hemia, nao laef bae i fulap long stamba tingting mo mining, mo i mekem se i isi blong kipim wan balens i stap.