Meʻaʻofa Kilisimasi ʻa Kalí
ʻOku nofo ʻa e tokotaha naʻá ne faʻú ʻi Kololato, USA.
Naʻe vakavakai holo ʻa Kali ʻi he fale tauhiʻanga ʻo e fanga monumanú pea fakafokifā ʻene maʻu ha fakakaukau.
“Ko e taimi ʻoku ʻi ai ai ha ngāue ke fai, fai ia ʻi he founga malimali. Fai ʻo lahi hake ʻi he meʻa ʻoku kole atú pea fai ʻo lahi ange” (Children’s Songbook, 167).
Naʻe tetetete ʻa Kaʻala ʻi heʻene teke ʻene pasikalá ʻi he havilí. Naʻá ne fakakaukau ʻo pehē “ʻOku ʻikai ke u faʻa tatali ke u aʻu ki ʻapi ki he māfaná”. “Pea ʻoku ʻikai ke u faʻa tatali ke fakaava e ngaahi meʻaʻofa Kilisimasí!”
Naʻe toe vave ange ʻene ʻā ʻi he pongipongi ko iá ke tufa e nusipepá. ʻI heʻene teke hake ʻene pasikalá he foʻi hake ke foki ki ʻapí, naʻá ne fakakaukau ki he sinamoni Kilisimasi ʻa ʻene Mamí. ʻE ifo ʻaupito ia ki he kaí. Hangē naʻá ne ʻosi ʻahiʻahiʻi atu pē ʻe ia e ifo ʻo e kilimí.
Kilimi! Naʻe fakatoupīkoi ʻa Kali. Kuo ngalo ʻiate ia ke tatau e pulú mo e ngaahi ngāue kehe naʻe fie maʻu ke ne faí. Neongo ko e ʻaho Kilisimasi.
Naʻe tau ʻe Kali ʻene pasikalá ʻi he toumuʻa honau falé. Naʻá na feʻauhi mo hono tokouá pe ko hai ʻe ʻuluaki ʻosi ʻene tufa nusipepá. Naʻe ʻikai ke ne fakatokangaʻi ʻa e pasikala hono tokouá, ko ia ai naʻe mālohi ʻa Kali.
Ko e meʻa pango pē heʻene mālohí, kuo pau ʻeni ke tali ki hono tokouá ke toki fakaava fakataha ʻena ʻū meʻaʻofá. Pea te na toe foki leva ki tuʻa ʻo toe hoko atu ʻena ngāué. Naʻe fakaʻamu ʻa Kali ke nofo pē ʻi loto ʻo fakafiefia he Kilisimasí.
Naʻe fakakaukau ʻa Kali, “Te u fakakakato ʻe au ʻeku ngāué he taimi ni” “Pea he ʻikai leva ke toe fie maʻu ke u foki ki he tuʻa ki he momokó.” Naʻá ne fakavavevave leva ki he fale tauhiʻanga monumanú.
ʻI heʻene toʻomai e kané pea tangutu hifo ke tatau e pulú, naʻe vakavakai holo ʻa Kali. Naʻe kei fie maʻu ke fakahoko mo ha ngaahi ngāue kehé. Fakafokifā kuó ne maʻu ha foʻi fakakaukau. Kapau te ne fai kotoa e ngāué, te ne fakaʻohovaleʻi hono fāmilí pea te nau fakafiefia fakataha leva e Kilisimasí ʻi he pongopongi ko iá. ʻE hoko ia ko e meʻaʻofa Kilisimasi lelei tahá!
Naʻe fakavavevave ʻa Kali ʻo tatau e pulú. Naʻá ne fakamaau leva ʻa e fale tauhiʻanga monumanú, fafanga e fanga moá pea tānaki e ngaahi fuaʻi moá. Naʻá ne malimali ʻi heʻene fakakaukau atu ki he ʻohovale hono fāmilí.
Naʻe foki atu ʻa Kali ki loto fale. Naʻá ne kiʻi fakasiosio atu ʻi he matapaá pe kuo kakato e fāmilí ai. Peá ne moulu atu ki peito. Naʻe toki ʻosi pē ʻene faʻo ʻa e huʻakaú mo e fuaʻi moá ki he ʻaisí mo e hū mai ʻa e Fineʻeikí.
Naʻe fāʻofua ange ʻene Mamí mo pehē ange, “ʻŌ ʻio, sai kuó ke aʻu mai ki ʻapí ni”. “Ne kamata ke mau fifili pe ko fē koe.”
Naʻe tokoni ange ʻene faʻeé ke vete hono koté. ʻI he sio mai e toenga ʻo e fānaú kiate iá, ne nau kaila, “Ko Kali ʻeni! Tau fakaava ʻetau ngaahi meʻaʻofá!” Naʻa nau nofo takatakai he fuʻu ʻakau Kilisimasí mo tali ke tufa ʻe Teti e meʻaʻofá. Naʻe manako ʻa Kali ke siofi e vahevahe e tokotaha kotoa ʻenau ngaahi meʻaʻofá.
Naʻe talaange leva ʻe he tangataʻeikí. “Sai” “Ko e taimi leva ʻeni ke fai ai ʻetau ngaahi ngāué. Ka kimuʻa iá, mahalo ʻoku sai ke tau inu mo kai sinamoni”
Naʻe lue atu e tangataʻeikí ki peito ʻo fakaava e ʻaisí. Naʻá ne tuʻu ʻo toe sio fakamamaʻo.
ʻO pehē mai ʻe Teti. “Pea mou sio mai ā ki hē!” “Kuo fonu e sioki huʻakaú, pea kuo ʻosi ʻomi mo e fuaʻi moá! Ko hai ia naʻá ne fai iá?”
Naʻe foki mai ʻa Teti ki loto fale. Naʻe feinga mālohi ʻa Kali ke fakapuliki ʻene malimalí.
Naʻe lea mai e tangataʻeikí mo ne malimali pē. “Kali, ʻokú ke ʻilo ha meʻa fekauʻaki mo ʻeni? Hangē kuo ʻosi fai ʻetau ngāué ʻa tautolu.”
Naʻe kaila ʻa Kali. “Ke mou maʻu ha Kilisimasi Fiefia!”
Naʻe fāʻofua ʻa Teti kia Kali. “Mālō ʻaupito foha. Ko e fakakaukau lelei ia kuó ke faí. Mahalo pē ko ʻetau Kilisimasi lelei tahá ʻeni!”
Naʻe malimali pē ʻa Kali. Naʻá ne ʻosi ʻilo ko ʻene Kilisimasi lelei tahá ia.