Nambafo Sandei Miting (Oktoba– Disemba 2018)
Skripja Stadi blong Yuwan, mo Famli Skripja Stadi
Long ol nambafo Sandei long 2018, kworom blong ol elda mo Rilif Sosaeti, bambae oli toktok raon long topik ia, we hem i Skripja Stadi blong Yuwan, mo Famli Skripja Stadi. Ol lida mo ol tija oli save jusum blong lidim ol toktok long klas abaot eni prinsipol daon ia.
Skripja Stadi blong Yuwan
Blong helpem ol memba blong kasem insperesen blong stadi long ol skripja oltaem, tingting blong invaetem wanwan memba blong jusum wan long ol skripja ia blong hem i ridim: Josua 1:8; 2 Timoti 3:15–17; 1 Nifae 15:23–25; 2 Nifae 32:3; Doktrin mo Ol Kavenan 11:22–23; 33:16–18. Afta we oli gat taem blong ridim mo tingting hevi long olgeta skripja ia, oli save serem wetem wan narawan insaed long rum wanem nao skripja we oli ridim i stap tijim olgeta abaot skripja stadi.
Yu save invaetem tu ol memba blong oli serem ol testemoni blong olgeta abaot olgeta blesing we oli kasem taem oli stap stadi long olgeta skripja. Ol memba oli save lanem samting tu taem oli harem samting we wanwan i gat blong serem blong save mekem skripja stadi blong olgetawan i gat mining (luk long samfala eksampol long “Sam Aedia blong Kam Antap long Skripja Stadi blong Yuwan” insaed long Kam Folem Mi—Blong Wanwan Man, Woman mo Famli). Yu save serem tu wetem ol memba wanem we Elda Quentin L. Cook i bin tijim abaot “ol stamba tingting mo blesing we i go wetem jenis long taemtebol blong Sandei mo ol nara jenis” (luk long “Jenis long Laef we I Tru mo I Stap I Go long Papa long Heven mo Lod Jisas Kraes,” Liahona, long Bislama, Nov 2018). Ol memba oli save toktok raon long, hao nao, ol traehad blong olgeta blong kam antap long skripja stadi, i save help blong mekem olgeta stamba tingting ia oli kamtru. Olgeta vidio ia long LDS.org i save givim insperesen long ol memba: “Words with Friends,” “The Blessings of Scripture,” “Daily Bread: Pattern,” mo “What Scriptures Mean to Me.”
Fasin blong Stadi long Gospel Oltaem
Elda David A. Bednar i komperem fasin blong gat famli skripja stadi oltaem mo sam nara stret mo gud evri dei fasin, long ol plante smol mak long wan peinting, we long en, i mekem wan naesfala peinting. Blong helpem ol memba blong oli andastanem wanem we Elda Bedna i stap tijim, maet yu save soem wan peinting we oli save luk mak blong wanwan smol mak we artis i mekem wetem peintbras blong hem. Afta, ol memba oli save ridim fasin blong komperem samting we Elda Bednar i mekem insaed long toktok blong hem “More Diligent and Concerned at Home” Liahona, Nov. 2009, 19–20), mo toktok raon long olsem wanem nao, ol smol mak blong peintbras ia, insaed long peinting ia, oli semmak long skripja stadi. ?Wanem nao i bin helpem mifala blong winim ol samting we oli blokem fasin blong stadi long gospel oltaem, i nomata se yumi stap stadi yumi wanwan, o wetem famli blong yumi? ?Wanem nao Presiden Russell M. Nelson i bin promesem long olgeta we “oli gat strong tingting blong jenisim hom blong olgeta i kam wan senta blong lanem gospel? (Luk long “Blong Kam Ol Lata-dei Sent we I Givim Eksampol,” o Liahona, Nov. 2018). Givim taem blong ol memba oli tingting hevi mo serem wanem oli gat insperesen blong mekem from ol samting we oli bin lanem tedei.
Ol Storian o Toktok Raon long Gospel long Hom mo long Jos
Wan wei blong helpem ol memba blong andastanem hamas i impoten blong toktok raon long gospel long hom mo long jos, i blong invaetem wan pikinini mo papa o mama blong singsing “Tijim Mi blong Folem Laet Ya blong God” (STSP, pej 66). Storian ia bitwin pikinini mo papa o mama ia, insaed long ol toktok blong singsing ia, ?oli stap tijim yumi wanem abaot fasin blong lanem gospel? Maet samfala memba oli glad blong serem ol tingting blong olgeta long wei blong mekem ol toktok raon long gospel, oli kam olsem nomo, mo i pat blong famli laef. Olgeta skripja ia, oli save givim sam niu tingting: Dutronome 11:18–20; 1 Pita 3:15; Mosaea 18:9; Moronae 6:4–5, 9; Doktrin mo Ol Kavenan 88:122. ?Olsem wanem nao ol toktok o storian blong yumi long hom mo long jos oli save tekem yumi i go kolosap moa long Papa long Heven mo Jisas Kraes?