Tha’ ni Yibe Ngongliy ni nge Mon’og Rogon

Rogon e tu’ufeg rodad ngak boech e gidii’ e ra ga’i yan ni fa’an nra fel’ thildad.

Fare wo’en e machib ngak e gidii’ e rogon nrayag ni nge mon’og fare tha’ rodad ngorad—ni fare miti tha’ ni rayag ni ngar pufpufgad ni ngar ninged e ayuw ni fa’an nra ke tu’uf e ayuw romad. Nap’an ni gadad ra gay rogon ni ngad fal’egned e biney e tha’, ma rayag ni nge thilyeg Got e yafos ko fagli tha’ ni l’agruw yang.

“Rib mich u wun’ug ngay ni dabiyag ni ngan thil ni fa’an ndariy e tha’ nib mon’og rogon,” ke yoeg Sharon Eubank, Bin Somm’on e Counselor ulan fare Relief Society General Presidency. Nga rogon ni gadad be pigpig era thilyeg e yafos rok boech e gidii’, ni ga’ar, thingar da “rin’ed ni polo’ i gum’ircha’raed ni gadad ba’adag ni ngan tayfan be’ min motoyil nge liyor ngak.”¹

Tha’ nib mangil e dani gosgos ngonglan. Ya ba tha’ nibay e tu’ufeg riy, ngonglan ab riyul’, mab “tu’ufeg nib polo’” (D&C 121:41).²

Rogon Wo’en ni ngan Gelnag e Tha’

“Gadad ma fal’eg e [tha’] ngak be’ fani yib be’ nge migid,” ni yoeg Elder Dieter F. Uchtdorf ko fare Quorum ko fare Ragag nge L’agruwi Apostles. ³ Nap’an ni gadad ra gay rogon ni nge par nib fel’ thildad ngak e pi cha’ ni gadad ma machibnag, ma fare Kan ni Thothup era powi’iydad. Tin ni ba’aray ni kan noeg e woed e pi n’en nike yog Elder Uchtdorf. ⁴

Mnang salprad.

President Ezra Taft Benson (1899–1994) e fil, “Dabiyag ni ngam pipig ngak be’ ni danmunang salpen.” Ke yoeg ni ngan nang fithngan gubin gidii’en fare tabinaew min tay u wun’uy e tin rran nib ga’fan ni woed e ngiyal’ ni gargelegey, pi taw’ath, tawfe, nge mabgol. Biney e rayag ni nge pug oren ni ngan yoloy e babyor ngak fare tabinaew ngan noeg ni kad falfalan’ gad ngorad fa n’en ni kar mu’niged. ⁵
Par u ta’abang.

Tha’ ab n’uw nap’an fani sum. Mu sapnag rogon ni rayag ni ngam par ma gabe non ngak facha’. Kan fil ni garam moeg ngak be’ ni ba tu’uf rom e rayag ni nge mon’og nag e tha’ romew. ⁶ Mu nangfan salpen e pi cha’ ni kan dugliy ngom ni ngam pipig ngorad. Mnon ngorad u galasia. Mu yus nag e bin nib m’ag u wun’um—ni woed e email, Facebook, Instagram, Twitter, Skype, kol, fan send nag e babyor. Elder Richard G. Scott (1928–2015) ko fare Ulung ko fare Ragag nge L’agruwi Apostles e weliy mornga’agen rogon nib moem mab tu’uf ni ngu’undag e tu’ufeg: “Oren ni ngiyal’ ni gura bing e pi chep nib thothup rog, … mug peri’eg buch reb e babyor nibay e thin riy nibe pi’ gelngig nike tay e [pin rog] Jeanne. … Pi babyor nem nib tu’uf rog … kuma ul’ul’ nge pi’ gelngig ma kug ma cha’ariy.” ⁷

Nge reb, tha’ ab tu’uf l’agrow ni’ ngay. Rayag ni ngam dag e tu’ufeg ma gur be’ nigab gol, machane fare tha’ e dabiyag ni nge mon’og ni fa’an ni garam thapag fare ayuw ma kum fulweg fare ayuw ngak be’. Fa’an facha’ e gabe guy ni dariyan’ riy, ma dam mu towasoriy. Mpag mag pi’ boech e ngiyal’ ngak’ ninge guy rogon ni gabe gay rogon, ma fa’an nrab tu’uf, mag non ngak fapi toyugang’ ko mornga’agan ni fa’an fare tha’ ab momaw’ rogon ni ngan thapag.
Mnon nib munguy.

Ra nge mon’og e tha’ mab tu’uf ni ngad rin’ed u fthik i gelngindad. Mnon nike mus ni nge chuw e thin riy e woed e mnon ni yibe weliy mornga’agan e n’en ni ngam rin’, fa yifang, boech ban’en nib achig, ma dar ma un mornga’agan e thamtham ngay, tin nib michuwan’uy, pi goals, nge tin nib tu’uf nrayag ni nge mon’og nag e tha’ rodad. Chitamangdad ni bay u Tharmiy e ke dag e biney nrogon nima non me weliy e tafney rok’ nge pi gagiyeg rok’ ngak Fak (muguy ko John 5:20) nge ngodad u dakan fapi profet Rok (muguy ko Amos 3:7). Weliy salpey ni gubin e rran nge tin nibe magawon nagdad nib mu’un fare gagyeg ko fare Thuthup ngay, e rayag ni nge ayuwegdad ni nge gel nag e tu’ufeg rodad ngodad magdad rin’ e pin’en nib magaran’dad ngay u ta’abang.

Motoyil e reb i bang ko mnon nib momaw’ nima dag ni gabe tu’ufeg be’. ⁸ Nap’an ni garam motoyil nib fel’ rogon, ma rayag ni ngam ayuweg boech e gidii’ nge yib ngak Kristus u nap’an ni garam nangfan salpenrad nge tin nib tu’uf rorad, nangfanrad, ma kub fel’ rogonrad.
Mu a’dag e tin nib thil u thilmed nge tin ni de thil ban’en.

“Boech … ab mich u wan’ngay ni fare Galasia e ba’dag ni nge sunmiy gubin e gidii’ nib ta’areb rogon …ni gubin e gidii’ ma ta’areb ya’an, ta’abn’en nibe thamiy, tafneynag, ma be par ni woed gubin e gidii’,” ke yoeg Elder Uchtdorf. “Biney era gathay fare gagyeg rok Got, ke sunmiy ni gubin e gidii’ mab thil ngak walagen. …

“Fare Galasia e ma mon’ag ni fa’an ni gadad ra fek e biney ngad pi’iyed e athamgil ngodad magdad yus nag fapi tawa’ath nikan pi’ ngodad ni nge pi’ gelngindad ngad ayuweged i gadad.” ⁹

Ngan tu’ufeg boech e gidii’ ni woed rogon nib tu’uf Got rodad ab tu’uf ni ngad guyed e gidii’ ni woed rogon nibe guy Got rad. President Thomas S. Monson (1927–2018) e fil, “Thingar da guyed boech e [gidii’] ni gathi kemus ko ngiyal’ ney machane woed ko miti mang gidii’ ni yad ra mang nga m’on.”¹⁰ Rayag ni ngad meybil nifen e ayuw ni ngeyag ni ngad guyed e gidii’ ni woed nibe guy Got. Gadad ra rin’ ngak’ be’ e biney ni gadad be guy fal’ngin, ma woed nrayag ni ngar sak’iygad ngalang ngar tawgad ko giney.¹¹
Pigpig ngorad.

Muguy e tin nib tu’uf rok e pi gidii’ ni gabe machib nagrad mag pi’ boech fapi’ n’en ni kan tawa’ath nigem ngay ni nge ayuwegrad nge tym rom, ni demtrug ko ngiyal’ nike tu’uf ban’en rorad fa kemus ni bachan e yad ba tu’uf rom. Rayag ni gabay u chranrad ni gabe runguyrad, mag pi’ e ayuw, fa mu pi’ e ayuw ni fa’an nra bay e magawon, m’ar, fa ban’en nib tomgin. Mu’un ko tha’ ni gab pasig ni gabe pi’ e ayuw. Got e pi’ mot’wondad nge pin’en ni ngan rin’ nge pin’en ni ngan rin’ ngoyiy (muguy 2 Nephi 2:14). Ni woed rogon ni fil fare Apostle John ni nge tu’uf Got rodad ni bachan ni gadad ba tu’uf rok ni somm’on (muguy ko 1 John 4:19), nap’an nra thimiy e gidii’ fare tu’ufeg rodad ni bachan fapi pigpig rodad, ma rayag ni nge munguynag gum’ircha’anrad me pagan’rad ngodad. ¹² Biney e rayag ni nge sunmiy fare miti ngongol ni ra mon’og nag e tha’.

Machib nib boed rogon ni rrin’ fare Tathapeg

Yesus Kristus e fal’eg fare tha’ u thilin nga fapi gachalpen (muguy ko John 11:25). Mnang rad (muguy ko John 1:47–48). I par rorad (muguy ko Luke 24:13–31). Nmon Rok ngorad e gathi kemus ni chi dakan e sbathin (muguy ko John 15:15). Ma mnang e tin nib thilthil rorad (muguy ko Matthew 9:10) ma manang fal’nginrad (muguy ko John 17:23). I pigpig ngak gubin e gidii’, ndariy fan ni’ir fare Somoel ni ga’, ya gathi ke yib ni ngan machib ngak ya Ir e nge machib ko gidii’ (muguy ko Mark 10:42–45).

Mang e garam rin’ ni rayag ni nge mon’og nag fare tha’ rom ngak e pi cha’ ni gabe pigpig ngorad?

© 2018 rok Intellectual Reserve, Inc. Gubin mabay matwon. Kan yoloey u Mariken. Kan micheg nag ko thin nu Ngalis: 6/17. Micheg nag i pilyeg: 6/17. Pilyeg e thin ko Ministering Principles, August 2018. Yapese. 15051 905