Atong Luna
Natandog sa mga Pulong sa Buhi nga Propeta
Paghulagway pinaagi ni J. Beth Jepson
Sa nag-edad pa ko og 15 anyos, nakakita ko og duha ka misyonaryo sa atubangan sa supermarket. Usa nila midapit nako nga moadto sa simbahan. Wala kaayo ko mainteresado, mao nga gisultihan nako sila, “Tingali sa ubang adlaw,” ug milakaw ko.
Pagkasunod adlaw, ang akong tiya nanawag ug mihangyo sa akong mama nga moadto sa iyang balay aron maminaw og espesyal nga mensahe. Ang akong mama ug ako miadto ug nakita ang sama nga mga misyonaryo nga akong nakita sa adlawan pa sa wala pa molingkod diha sa balay sa akong tiya! Nainteresado ang akong mama sa ilang mensahe, ug nagsugod usab ako sa pagpaminaw. Hinoon, sa dihang ang mga misyonaryo nangutana nako kon motuo ba ko og buhi nga propeta, mitubag ko nga klaro nga dili. Usa sa mga elder migunit og litrato ni Thomas S. Monson ug mipamatuod nga si Presidente Monson usa ka propeta. Midapit sila nako nga motambong sa kinatibuk-ang komperensya pagkasunod adlaw sa paghukom alang sa akong kaugalingon. Nakuryuso, miuyon ko nga moadto.
Pagkasunod adlaw, miabut mi sa chapel nga hapit na mahuman ang pangbukas nga pag-ampo. Samtang misulod ko sa kwarto, nakita nako si Presidente Monson nga diha sa screen. Mipahiyom siya ug miingon, “Minahal kong mga kaigsoonan, motimbaya ko …”
Sa pag-abli pa lang ni Presidente Monson sa iyang ba-ba, usa ka kusog nga pagbati ang milukop kanako, nagkumpirma nga siya usa ka propeta sa Dios. Sa katapusan sa komperensya, gisultihan nako ang mga misyonaryo, “Gusto kong magpabunyag.” Nakaserbisyo ko og misyon ug nakatudlo og daghang mga tawo sa talagsaong mga kamatuoran sa gipahiuli nga ebanghelyo.
Nasayud ko nga ang Dios mipanalangin kanato pinaagi sa pagtawag pag-usab og propeta. Nahigugma ang Dios kanato pinaagi sa moderno nga mga propeta.
Maicon B., São Paulo, Brazil
Wala Ako Maulaw
Samtang nag-eskwela ko sa boarding school, nagpuyo ko sa usa ka hostel [hotel] uban sa laing mga estudyante. Naningkamot ko pag-ayo sa pagsunod sa mga baruganan sa ebanghelyo pinaagi sa pag-ampo ug pagtuon sa mga kasulatan kanunay.
Usa ka adlaw ang usa ka kauban sa klase nakamatikod nga nagtuon ko sa Basahon ni Mormon diha sa akong higdaanan. Masuk-anon siyang nagsugod sa paglista sa tanang paagi nga sa iyang pagtuo nga ang akong simbahan sayop. Gisultihan niya ang tanan diha sa hostel mahitungod sa akong “kahibulongan” nga mga pagtuo. Ang ubang kauban sa klase nagsugod sa pagbiay-biay nako ug sa akong relihiyon; ang uban milikay ra kanako. Sa katapusan akong gitagoan ang akong Basahon ni Mormon ilawon sa kahon sa akong mga sinina ug nagtuon lamang sa Biblia aron ang akong kauban sa mga klase mohunong sa pagsug-sug nako.
Nagpadayon ko sa pagtuon sa Biblia hangtud nakaabut ko sa Mga Taga-Roma 1:16, nga nagpahayag: “Kay wala ko igakaulaw ang Maayong Balita, kay kini mao ang gahum sa Dios alang sa kaluwasan sa matag usa nga nagatuo.” Nakaamgo ko nga pinaagi sa pagtago sa Basahon ni Mormon, akong gipakita sa akong mga kauban sa klase nga ako naulaw sa akong pagtuo. Akong gikuha ang Basahon ni Mormon ug nangayo og pasaylo sa Langitnong Amahan. Dayon miadto sa akong mga kauban ug mihatag sa akong pagpamatuod sa gipahiuli nga ebanghelyo. Kadaghanan nila mihunong sa pag-insulto nako ug nahimo kaming mga higala pag-usab.
Nasayud ko nga ang Dios nakasabut sa mga pagsulay nga atong giagian. Kon mobarug kita sa atong pagtuo ug magpakita nga kita “dili maulaw sa ebanghelyo ni Kristo,” Iyang ihatag kanato ang Iyang gahum, panalipod, ug direksyon.
Pamela O., Abuja, Nigeria
Pagserbisyo pinaagi sa Sinyas
Sa dihang nag-edad pa ko og unom ka bulan, ang akong unang sinyas mao ang “gatas” ug, paglabay sa pipila ka semana, makasulti ko og “panda.” Makadungog ra ko, apan ang akong unang pinulongan mao ang American Sign Language. Ang akong mama nagserbisyo og ASL nga misyon ug dayon nagpadayon sa pagtuon og sign language sa eskwelahan, ug gusto siya makahibalo ko niini.
Ang sign language nahimo nga talagsaong panalangin sa akong kinabuhi. Nakapahimo kini nako nga makakita ug makat-on pag-ayo kay sa wala kini. Nakapahiusa kini sa mga tawo. Ganahan ko nga makatudlo sa mga tawo unsay akong nahibaloan pinaagi sa tagsa-tagsa nga pagtudlo ug paghatag og mga presentasyon sa eskwelahan ug sa simbahan. Makalingaw usab nga magtan-aw sa kinatibuk-ang komperensya ug sa ubang mga video sa Simbahan nga naggamit og sign language uban sa akong mama.
Ang sign language sa akong kinabuhi usa ka talagsaon nga tigpalig-on sa pagpamatuod. Nakahimo ko nga makaila og daghan pa nga mga anak sa Dios kay sa wala kini, ug importante usab kini nga himan nga gamiton isip pagserbisyo sa uban. Mapasalamaton ko niini nga mga panalangin sa akong kinabuhi ug sa talagsaong mga tawo nga akong nahimamat ug nakakat-on gikan nila.
Israel H., Oregon, USA