Susugi Cake ni iTabatamata Tubu Cake Tiko Mai
Dua na gauna lekaleka sa oti au a vakaitavi ena dua na keba ni iTabagone Qase Cake mai Toga. Au sa tadrava tu ena mataka ni Vakaraubuka o ya e sivia na lima na drau na tamata qaqa ni Turaga. Era danisi, lagasere, ka marautaka vata na itaviqaravi ka vakarogoca na itukutuku veilaveti vakai ira yadua kei ira nodra iliuliu. Sa ka rekitaki na tiko vata kei ira, ka vakila nodra lomavinaka kau kila ni ra sa tu e mataqu eso na iliuliu ni Lotu, itikotiko raraba kei na bisinisi ni veisiga ni mataka.
E levu na ka meda marautaka ena veika vinaka era sa rawata na iTabatamata Tubu Cake Tiko Mai ni cauravou kei na goneyalewa ena Pasifika. E vuqa vei ira era sa kaulotu tiko, vakamau sara e valetabu ka veiqaravi tiko ena veitabanalevu kei na tabana ena veimatanitu ena Pasifika. Me vakataka na vinaka ni rawa-ka oqo, se tiko ga na iwiliwili levu vei ira era kaukauwa ka dina tiko ena nodra veiyalayalati kei ira era sega ni vakakina ka sai koya oqo na kauwai levu kivei keda taucoko.
Sa kaci tiko na Mataveiliutaki ni iWasewase na Pasifika ki na iTabatamata Tubu Cake Tiko Mai mera qarauna na bula raraba tawamudu ni yalodra. E sega ni dua na lewe ni itabatamata oqo ena rawa me solia na ilesilesi oqo vua e dua tale. Sa gadrevi na tamata yadua me vakadeitaka nodra vakabulai tawamudu ena nodra susugi ira cake vakayalo e gadrevi kina na vakayacori kei na maroroi ni veiyalayalati kei na vakaitavi ena itaviqaravi savasava. Na tisaipeli bula vakaivakarau i Karisito ena usutu ni nodra bula na iVakabula ka cakava na veika bibi me liu taumada. Na masu yalodina ena veisiga, wiliki ni ivolanikalou, vakaitavi ena Semineri kei na Inisitute, na laki Lotu, tiko na ivolatara ni valetabu, na vakavoui ni veiyalayalati kei na qaravi ira na tamata era sa vica walega na ka e bibi cake sara.
Me vaka ni usutu ni noda bula na Karisito, e tiko e va tale na ivakarau me vukea meda kaukauwa ka dina tiko ena Kosipeli vakalesuimai. E oka kina na vakavinavinakataka na nomu sa lewena na Lotu. Na gauna ga eda taura vakamamada kina oqo sa tekivu talega meda vakawalena na noda veiyalayalati. iKarua, meda nanuma tiko ni sa tiko na ituvatuva baleti ira na luve ni Kalou e vuravura me rawa, ni da lesu ka laki bula vata tale kei Koya. Na vinaka cake ni noda kila vinaka na iTuvatuva Cecere ni Bula Marau na kena rawa cake meda vakacavara vakataucoko na ituvatuva. iKatolu, me da nanuma tiko ni veiqaravi ni kaulotu ena vakatitobutaka na noda saumaki vua na Karisito ka vakalevutaka noda vakabauti Koya. Sa gadrevi meda sa saumaki vakataucoko meda sabaya rawa kina na gasau vidi ni vu-ni-ca. Na ikava ni ka bibi o ya meda dinata noda vakamau. Na nodrau vakamau e dua na tagane kei na dua na yalewa sa lewa mai ni Kalou ka sega ni dodonu me lokuyarataki tiko vakatawadodonu.
E sega ni kena inaki me dua e tiko duadua ena bula oqo ka sa vakadeitaka kina na Kalou ni yaco mai na veisaqasaqa sa tu na veivuke. O ira na iTabatamata Tubu Cake Tiko Mai era na kunea na loloma oqo vei ira na itubutubu vinaka, iliuliu ni Matabete kei na mataisoqosoqo, kei na itokani dauveivukei era dau wasea na nodra yavunibula. Me vakataki ira na lewenilotu taucoko, era na kunea na veivuke vinaka ni ra tekiduru ka kerea na veivuke me wali na nodra tiko leqa kei na veitemaki e dau yaco vei ira. Era na vakila, me vakataki au, na veivakauqeti ni Yalo Tabu e veidusimaki ka vakadeitaki ira tiko ena veigauna veivakaleqai.
Me baleta na tomani tiko ni nodra vukei na iTabatamata Tubu Cake Tiko Mai, a kerea vakabibi kina o Elder Christofferson vei ira na “Turaga–tama, uabula sega ni vakamau, iliuliu, dauveituberi ena vuvale—mera ivakaraitaki kilikili ka vukei ira na cauravou ni iTabatamata Tubucake Tiko Mai mera tagane qaqa. Vakavulici ira ena kila-ka ni bula raraba kei na so tale: na iwalewale ni veivosaki, na iwalewale ni veikilai kei na veimaliwai kei ira na tamata, na ivakarau ni veiwekani kei ira na yalewa kei na goneyalewa lalai, na sala ni veiqaravi, na sala ni gugumatua ka marautaka na veivakavoutaki, na sasagataki ni qito ka sega ni vakatotoganitaki kina, na sala ni vakadodonutaka na cala ka digidigi vinaka cake.” Kemuni na tagane ena Pasifika, ko ni sa kerei mo ni tucake mai ena kaci oqo ni dua na parofita ni Kalou.
A kuria tale ni “Nona veivakauqeti savasava e dua na marama ena sega tale ni vakilai na kena kaukauwa se yaga vakalevu cake ena dua tale na vanua me vakataka ena nona vale. E sega ni dua tale na vanua vinaka mera susugi kina na iTabatamata Tubu Cake Tiko Mai me vakataka na nodra matavuvale dina, ni rau na cakacaka vata kina o tama kei tina me rau qarava, vakavulica, ka susuga cake na luvedrau.” Sa matata sara, ni dua na vuvale YDE sa gacagaca bibi ni nodra susugi cake na iTabatamata Tubu Cake Tiko Mai.
Keimami sa sureti ira na itubutubu kei na iliuliu taucoko mera vakadeitaka ena gauna ni veisaqasaqa kei na veitemaki me kakua ni yali e dua na iTabatamata Tubu Cake Tiko Mai ka mo tomani ira ni ra vakasaqara tiko mera tudei tiko ena nodra veiyalayalati ka vueti ira nodra icaba era sa lako sese tu.