Fas Presidensi Mesej
Taem Yumi Stap Muv Tugeta I Go Fored
I Kam long Elda Russell M. Nelson
Ol brata mo sista blong mi we mi lavem yufala tumas. Mi gat tingting i stap daon taem mi stanap long fored blong yufala long moning ia. Fo dei i pas, yumi haedem bodi blong bigman ia blong yumi, wan profet blong God—Presiden Thomas S. Monson. I no gat toktok we bae i inaf blong tokbaot ol bigfala samting mo ol bigfala gudfala samting blong laef blong hem. Oltaem nomo bambae mi holemtaet frensip blong mitufala, wetem wan tangkyu hat, from ol samting we hem i bin tijim mi. Naoia, yumi mas luk i go long fored, i go long fiuja wetem wan ful fet long Lod blong yumi, Jisas Kraes, we Jos ia i blong Hem.
Tu dei i pas, evriwan long ol Aposol we oli stap laef, oli bin mit long rum we i stap antap insaed long Sol Lek Tempol. Evriwan oli bin agri long wan desisen, faswan, blong luksave Fas Presidensi we i stap naoia, mo sekenwan, se bae mi givim seves olsem Presiden blong Jos. Ol toktok oli smol tumas blong talem long yufala wanem mi bin filim taem we Ol Brata blong mi—Ol Brata we oli holem evri ki blong prishud we oli kambak tru long Profet Josef Smit long dispensesen ia—oli putum han blong olgeta antap long hed blong mi blong odenem mi, mo setem mi apat olsem Presiden blong Jos. Hem i bin wan tabu eksperiens mo i mekem tingting blong mi i stap daon.
Afta, i bin responsabiliti blong mi blong faenemaot huia Lod i bin rere blong oli kam ol kaonsela blong mi. ?Olsem wanem nao bae mi jusum tu nomo long Olgeta nara Twelef Aposol, mo antap long hemia, mi lavem wanwan long olgeta bigwan? Mi tangkyu long Lod blong save ansarem ol strong prea blong mi. Mi talem tangkyu se Presiden Dallin Harris Oaks mo Presiden Henri Bennion Eyring, tufala i glad blong wok wetem mi olsem Fas mo Seken Kaonsela. Presiden Dieter F. Uchtdorf i tekembak ples blong hem insaed long Kworom blong Olgeta Twelef Aposol. Hem i kasem finis ol bigfala wok we hem nomo i kwalifae from.
Mi tekemaot hat blong mi long hem mo long Presiden Eyring from bigfala seves blong tufala olsem ol kaonsela blong Presiden Monson. Oli ol man we oli save wok, oli givim evri samting mo oli kasem insperesen. Yumi glad tumas from tufala. Wanwan long tufala i glad blong givim seves naoia long ples we oli nidim tufala plante.
Olsem Aposol we i moa olfala olsem wan Aposol, mo i kam seken, Presiden Oaks, hem i kam Presiden blong Kworom blong Olgeta Twelef Aposol. Be, from koling blong hem long Fas Presidensi mo folem wanem we i stret wetem oda blong Jos, Presiden M. Russell Ballard, i nambatri Aposol we i moa olfala long koling blong Aposol, hem nao bae i stap olsem Akting Presiden blong kworom ia. Fas Presidensi bambae i wok tugeta wetem Olgeta Twelef blong faenemaot tingting blong Lod mo muvum tabu wok ia blong Hem i go long fored.
Mifala i talem tangkyu tumas from ol prea blong yufala. Raon long wol, oli stap prea from mifala. Long wan moning, afta we Presiden Monson i pasawe, wan smol boe blong fo yia i bin mekem wan prea olsem. Nem blong hem i Benson. Mi kwotem sam pat blong leta blong mama blong hem, we i bin raet i kam long waef blong mi, Wendy. Benson i prea: “Papa long Heven, tangkyu blong mekem se Presiden Thomas S. Monson i save luk waef blong hem bakegen. Tangkyu from niufala profet blong mifala. Helpem hem blong i save stanap strong, mo i no fraet se hem nao i niufala profet. Helpem hem blong hem i groap i kam wan man we i helti mo i strong. Helpem hem blong hem i gat paoa from se hem i gat prishud. Mo helpem mifala blong stap mekem gud long hem.”
Mi talem tangkyu long God from ol pikinini olsem Benson, mo from papa mo mama we oli ting mo wok strong blong stap stret mo gud, blong stap ol gud papa mo mama—from evri papa mo mama, tija, mo memba we oli tekem ol hevi samting, be yet, oli givim seves wetem gud hat. Long nara toktok, long wanwan long yufala, mi mi talem tangkyu from yufala wetem tingting i stap daon.
God I Stap long Stia
Taem yumi stap go tugeta long fored, mi invaetem yufala blong tingting long hae fasin we Lod i stap lidim Jos blong Hem ia. Taem wan Presiden blong Jos i ded, i no gat sikret se huia nao i nekiswan we bae oli singaotem blong givim seves long ofis ia. I no gat ileksen from, i no gat kampen from, be i gat kwaet wok blong wan tabu plan we i stap finis abaot pat ia, we Lod Hemwan i putum i stap.
Evri dei, seves blong wan Aposol i muv folem wan dei blong lanem samting, mo blong stap rere blong karem moa responsabiliti long fiuja. I tekem plante plante yia blong seves blong wan Aposol i muv i kamaot long junia jea, i go long senia jea insaed long sekol. Long tetaem ia, hem i kasem eksperiens stret long han blong hem long saed blong evri samting abaot wok blong Jos. Hem i kam blong save gud ol pipol we oli stap laef long wol ia, i save ol storian blong olgeta, i save kalja, lanwis, mo ol wok oli tekem fulap taem raon long wol. Rod ia, blong wan i tekem ples blong narawan insaed long lidasip blong Jos, i wan ia nomo, i no gat wan narawan moa samples. Mi no save wan nara samting we i semmak long hemia. Hemia i no sapos blong mekem yumi sapraes, from se hem i Jos blong Lod. Hem i no stap wok folem fasin blong ol man.
Mi bin givim seves insaed long Kworom blong Olgeta Twelef Aposol anda long faef foma Presiden blong Jos. Mi bin luk wanwan Presiden i kasem revelesen mo i mekem folem revelesen ia. Oltaem nomo Lod i bin, mo oltaem nomo bambae Hem i givim instraksen mo givim insperesen long ol profet blong Hem. Lod i stap long stia. Mifala, we oli odenem mifala blong stap ol witnes blong tabu nem blong Hem raon long wol, bambae mifala i gohed blong lukaotem blong save tingting blong Hem mo mekem folem tingting ia.
Stap long Rod blong Kavenan
Nao, long wanwan memba blong Jos ia, mi talem: gohed blong stap long rod blong kavenan. Komitmen blong yu blong folem Sevya taem yu mekem ol kavenan wetem Hem, mo afta, blong gohed blong holem ol kavenan ia, bambae i openem doa long evri blesing long saed blong spirit, mo blong kasem spesel janis ia we i stap long ol man, woman, mo pikinini long evri ples.
Olsem wan niufala Presidensi, mifala i wantem blong stat wetem en i stap insaed long maen blong mifala. From risen ia, mifala i stap long wan tempol mo stap toktok long yufala tedei. En, we wanwan long yumi i stap traehad from, i blong oli kavremap yumi wetem paoa insaed long wan haos blong Lod, blong yumi sil olsem ol famli, blong yumi stap fetful long ol kavenan we yumi mekem insaed long tempol; ol kavenan ia oli mekem yumi kwalifae from presen ia we i moa bigwan we i kam long God—we i laef we i no save finis. Ol odinens blong tempol mo ol kavenan we yufala i mekem insaed ia, oli ki blong mekem laef, mared, mo famli i gat moa paoa, mo oli ki blong mekem se yu gat paoa blong stanap fesem mo no foldaon long ol agens blong enemi. Wosip blong yufala insaed long tempol mo seves blong yufala long ples ia blong ol bubu blong yufala, bambae oli blesem yufala long wei ia we bae yufala i kasem moa revelesen blong yufalawan, bae yufala i kasem moa pis, mo bae i mekem yufala i moa strong blong wok blong stap long rod ia blong kavenan.
Nao, sapos yu bin aot long rod ia finis, mi stap invaetem yu, wetem evri hop insaed long hat blong mi, blong yu kambak, plis. Nomata wanem wari blong yu, nomata wanem jalenj blong yu, i gat wan ples blong yu insaed long ples ia, insaed long Jos blong Lod. Yu mo ol jeneresen we oli no bon i kam long wol yet, bambae oli gat blesing from ol aksen blong yu naoia blong kambak long rod ia blong kavenan. Papa blong yumi we i stap long Heven i laekem tumas ol pikinini blong Hem, mo Hem i wantem wanwan long yumi blong gobak hom, wetem Hem. Hemia bigfala gol blong Jos blong Jisas Kraes blong Ol Lata-dei Sent—blong helpem wanwan long yumi blong kambak hom.
Mi wantem talemaot dip lav we mi gat long yufala— wan lav we i bin gro ova long plante yia we mi bin mit wetem yufala, we mi bin wosip wetem yufala, mo wok wetem yufala. Tabu wok blong mifala i blong go long evri nesen, famli, lanwis mo pipol, blong help blong mekem wol ia i rere from Seken Kaming blong Lod. Hemia, bambae yumi mekem wetem fet long Lod, Jisas Kraes, wetem save ia se Hem nao i lukaot long wok ia. Hemia hem i wok blong Hem mo Jos blong Hem. Yumi, yumi ol wokman blong Hem.
Mi talemaot we ful hat mo tingting blong mi i blong God, Papa blong yumi We I No Save Finis, mo i blong Pikinini blong Hem, Jisas Kraes. Mi save Tufala, lavem Tufala, mo talem promes se bae mi wok blong Tufala—mo yufala—wetem evri win we i stap blong laef blong mi. Long tabu nem blong Jisas Kraes, amen.