Mga Prinsipyo sa Visiting Teaching, Pebrero 2018
Kilalaha Sia kag ang Iya Pamilya
Ang visiting teaching amo ang sinsero nga pagkilala kag pagpalangga sang tagsa ka sister agud mabuligan naton nga pabakuron ang iya pagtuo kag maghatag sang pag-alagad.
Pagtuo, Pamilya, Bulig
Si Rita Jeppeson kag ang iya visiting teacher nangin suod nga mag-abyan samtang sila nagabisita kag nagapaambit sang mga prinsipyo sang ebanghelyo. Pero ang ila mga pagbisita nagalakip man sang paghampang sang word games nga ululupod. Amo ini ang paborito ni Rita sa iya visiting teacher tungod nahibal-an niya nga mag-abyan sila kag ang pagbisita indi lamang para ma-“tsekan” ang ila listahan. Kadamo kaayo sang mga butang nga sarang himuon sang mga sister sa tion sang pagbisita, pareho sang paglakat-lakat ukon pagpanghilamon sa hardin samtang nagahinampang ang kabataan.
Si Elder Jeffrey R. Holland sang Korum sang Napulo’g Duha ka mga Apostoles nagsiling, “Lantawa ang inyo mga kaugalingon bilang mga tinugyanan sang Ginuo sa Iya mga anak. … Ginalauman namon … nga magtukod kamo sang isa ka bag-ong panahon sang tunay, sentro sa ebanghelyo nga pagkabalaka sa mga miyembro, nga nagabantay kag nagaulikid sa kada isa, nga nagasabat sa espirituhanon kag materyal nga mga pagkinahanglan sa bisan ano nga paagi nga makabulig.”1
Ang Ginuo paagi kay Moises nagmando sa mga anak sang Israel nga ang “dumuluong nga nagapanlugayaw upod sa inyo mangin subong sia sang tumandok sa tunga ninyo, kag higugmaon mo [sia] subong sang imo kaugalingon” (Levitico 19:34). Ang mga sister nga aton ginabisita mahimo mga “dumuluong” sa pagsugod sang aton pag-alagad, pero samtang ginakilala naton sila kag ang ila pamilya, magadugang ang aton handom nga “magpas-an sang palas-anon sang isa kag isa, agud nga mangin mamag-an ang mga ini” kag ang aton “mga tagipusuon nabugkos sing tingob sa paghiliusa kag sa gugma ang isa tuhoy sa isa” (Mosias 18:8, 21).
Si Reyna I. Aburto, Ika-duhang Manuglaygay sa Pangkabilugan nga Panguluhan sang Relief Society, nagadumdum sang isa sia ka bag-o lang nagdiborsyo, bag-o nga miyembro sang Simbahan. “Nagkadto ang akon mga visiting teacher sa balay,” siling niya, “kag nagdala sila sang manami nga balatyagon sang pagkalakip kag pagpalangga sa akon tagipusuon.”2
Binagbinaga Ini
Sa sulod sang pamilya sang mga sister nga inyo ginabisitahan, ano nga mga kahiwatan ang dapat ninyo hibal-on kag panumdumon?
© 2018 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipnas. Petsa sang pagtugot sa Ingles: 6/17. Petsa sang pagtugot sa paglubad: 6/17. Paglubad sang Visiting Teaching Principles, February 2018. Hiligaynon. 15046 861