Ko Lūkasi mo e Tokotaha Houtamakí
Naʻe ongoʻi fiefia ʻa Lūkasi ʻi he meʻa naʻá ne leaʻakí … kae tālunga ʻene fakatokangaʻi e fofonga ʻo Peteloó.
“Kapau te tau feʻofoʻofani” (Ngaahi Himí, fika 142).
ʻOiauē!! Ko Petelō ʻeni ʻoku haʻú!”
Naʻe ʻilo ʻe he taha kotoa he akó ko ha taha houtamaki ʻa Petelō. Naʻe kaukaua, pea naʻe ʻikai angaʻofa! Naʻá ne ui ʻaki e fānau kehé ha ngaahi hingoa, faʻoa ʻenau meʻakai hoʻataá, mo tuli takai kinautolu ʻi he ʻapi akó. Naʻe ʻikai fie feohi ha taha mo ia.
Naʻe fakalaka mai ʻa Petelō ʻia Lūkasi mo hono kaungāmeʻa ko ʻAfá. Naʻá ne ui kinaua ko e “ongo foʻi” pea tekeʻi ʻa ʻAfa.
Naʻe foʻi ʻa Lūkasi ia ʻi he anga taʻeʻofa ʻa Peteloó. Naʻe kaila atu, ʻo ʻikai toe fakakaukau, “Tuku ia, Petelō!”
Naʻe ʻikai faʻafaʻa-tui ʻa Lūkasi. Kuó ne toki fakafepakiʻi ʻa e tokotaha houtamaki taha ʻi he akoʻangá!
Ne laka atu leva ʻa Petelō kia Lūkasi ʻo kolaʻi hono soté. “Ko e hā hoʻo leá?” Ne vave fau e tā e mafu ʻo Lūkasí ʻo hangē ʻe punakaki mai ki tuʻa mei hono fatafatá! Naʻe talaange ʻe Petelō, “Ko ʻeku fakatokanga ʻuluakí atu ʻeni. Ka ke tokanga!” Naʻá ne tekeʻi leva ʻa Lūkasi pea lue atu ia.
Naʻe fai ʻe Lūkasi hono lelei tahá ke hao meia Petelō hili e meʻá ni, ka naʻe maʻu maʻu pē ia ʻe Petelō. Naʻá ne taʻofi ʻa Lūkasi mei he heké, tekeʻi ia he lolotonga ʻo e tolo pulú, sapiʻi ia ʻi he falekaí, mo fai ange maʻu pē ki ai ha ngaahi lea fakamamahi.
Naʻe vaʻinga ʻa Lūkasi mo ʻAfa ʻi ha ʻaho ʻe taha ʻi he foʻi pulu ʻa ʻAfá. Naʻe puna mai ʻa Petelō mei ha tuʻa ʻakau ʻo puke e foʻi pulú.
Naʻe pehē ange ʻe ʻAfa, “Kātaki ʻo fakafoki mai ia.”
Ko hai te ne ʻai ke u fai iá?” Naʻe tekeʻi ʻe Petelō ʻa Lūkasi ki ha fuʻu ʻakau pea kata.
Naʻe lava ke ongoʻi ʻe Lūkasi ʻoku ʻita. Naʻe fuʻu ʻita ʻaupito. “ʻOkú ke ʻilo ha meʻa, Petelō?” Ko e lea ange ia ʻa Lūkasí. “Ko e kiʻi tamasiʻi anga taʻeʻofa taha koe kuó u ʻilo! ʻOku ʻikai ke saiʻia ha taha ʻiate koe. ʻOku fakaʻamu e taha kotoa ke ke puli ʻosi!”
Naʻe tuku e kata ʻa Peteloó. Naʻe ongoʻi fiefia ʻa Lūkasi ʻi he meʻa naʻá ne leaʻakí … kae tālunga ʻene fakatokangaʻi e fofonga ʻo Peteloó. ʻE tangi? Naʻe punou vave ʻa Petelō ki lalo pea lue ʻo ʻalu.
Naʻe ongoʻi mamahi ʻa Lūkasi ʻi he taimi pē ko iá. Neongo pe ko e hā e lahi ʻo e feinga ʻa Lūkasi ʻi he toenga ʻo e ʻahó, ka naʻe ʻikai ke ne lava ʻo tekeʻi ʻa e ongoʻi fakamamahi ko iá. Naʻe māfulifuli pē ʻi hono mohengá ʻi he pō ko iá. Naʻe fakakaukau maʻu pē ki he lahi ʻo e mamahi he fofonga ʻo Peteloó.
“ʻOku lava ke loto mamahi ʻa Petelō?” Ko e fakakaukau ia ʻa Lūkasí. “ʻOku ʻikai tokanga ia pe ʻoku anga taʻeʻofa ki he toenga ʻo e kauleka kehé. Naʻe pau ke u lea hake, ko ia?” Ko e lahi ange e fakakaukau ʻa Lūkasi ki aí, ko e lahi ange ia ʻene fakatokangaʻi naʻe totonu ke ne taukaveʻi ia mo hono kaungāmeʻá. Ka naʻe hala ʻene lea ʻaki e ngaahi meʻa taʻeʻofá.
Naʻe tūʻulutui leva ʻa Lūkasi ʻi hono mohengá ʻo kole fakamolemole ki he Tamai Hēvaní. Naʻá ne fakahā ki he Tamai Hēvaní ʻoku ʻikai loto ke ne toe teitei uesia ha loto. Naʻe loto ke angaʻofa. Ko e taimi naʻe pehē ai ʻa Lūkasi, “ēmení,” naʻá ne ʻilo ʻa e meʻa kuo pau ke ne faí.
Naʻe maʻu ʻe Lūkasi ʻa Petelō ʻoku falala tokotaha pē ki ha ʻā ʻi he ʻosi e kai hoʻatā ʻo e ʻaho hono hokó. Naʻe tailiili ʻa Lūkasi. Ko e hā ʻe fai ʻe Peteloó? Naʻe fakatau ʻe Lūkasi ʻene mānavá pea luelue atu.
“ʻOku ou kole fakamolemole atu koeʻuhí ko ʻaneafi.”
Naʻe mataʻi ʻohovale ʻa Petelō. “ʻOkú ke kole fakamolemole?”
“ʻIo. Naʻá ku lea ʻaki kiate koe ha ngaahi lea taʻeʻofa, ka naʻe ʻikai totonu ke u fai ia. ʻOku ou kole fakamolemole atu.”
Naʻe sio fakamamaʻu pē ʻa Petelō ki hono suú. “ʻOku sai pē ia.”
Naʻe tā e fafangú. Pea kamata foki mai ʻa Lūkasi ki he kalasí. Naʻá ne ongoʻi fiemālie ange. Ka naʻe toe ha meʻa ʻe taha naʻá ne fie lea ʻaki. Naʻe tafoki hake leva. “Te tau lava ʻo soka ʻi he mālōloó ʻapongipongi, kapau te ke loto ki ai.”
Ne kiʻi malimali ʻa Petelō. “Ngali sai ia.”
Naʻe fakaʻau ʻo lelei ange meʻa kotoa mo Petelō ʻi he ʻosi ʻení. Naʻe faʻa houtamaki pē he taimi ʻe niʻihi ka naʻe ʻikai fuʻu taʻeʻofa fēfē. Naʻe aʻu ʻo vaʻinga mo Lūkasi ʻi he taimi mālōlō ʻe niʻihi. Pea naʻe fakafiefia moʻoni! Naʻe talaange ʻe Petelō kia Lūkasi ʻi he ʻosi e taʻu fakaakó, ʻe hiki ia. Peá ne toki lea ʻaki ha meʻa naʻe fakaʻohovale moʻoni kia Lūkasi.
Talaange ʻe Petelō, “Fakamālō atu ʻi hoʻo hoko ko hoku kaungāmeʻá.” “ʻO aʻu pē ki he taimi naʻe ʻikai ke u angalelei aí.”
Naʻe ʻai ʻe he ongoʻi māfana ʻi he loto ʻo Lūkasí ke ne ʻiloʻi ʻoku totonu maʻu pē e fili ke angaʻofá.