Visitin Tising Toktok, Disemba 2017
Laik Tasol long Karim Hevi bilong Wanpela Narapela
Wantaim preiya stadim dispela ol samting na lukluk long painim samting long litimapim tingting long save wanem samting bai yu sherim. Hau bai save bilong yumi long as tingting bilong Rilip Sosaiti bai redim ol pikinini meri bilong God long ol blesing bilong laip oltaim oltaim?
Feit, Femili, Rilif
Presiden Thomas S. Monson i tok: “Yumi stap namel long ol dispela lain husat i nidim tingting bilong yumi, tok long strongim bel bilong yumi, sapot bilong yumi, kamfot bilong yumi, gutpela pasin bilong yumi.” “Yumi ol han bilong Bikpela antap long dispela graun, wantaim pawa long sevim na litimapim ol pikinini bilong Em. Em i nidim yumi wanwan.”1
Presiden Henry B. Eyring, Nambawan Kaunsela insait long Nambawan Presidensi, i tok: “Wanpela bikpela senis i stat long lewa bilong yu taim yu bin kam insait long Sios. Yu bin mekim wanpela kavanen, na yu bin kisim wanpela promis em bin stat long senisim dispela stret em pasin bilong yu. …
“… Yu bin promis olsem yu bai halivim Bikpela long mekim ol hevi bilong ol narapela lain bai i no hevi na bai ol i kisim kamfot. Yu bin kisim pawa long halivim long mekim ol dispela hevi bai i no inap hevi taim yu kisim presen bilong Holi Gos.”2
“Yumi laik long yusim dispela lait bilong gospel long lukim ol narapela olsem Sevia lukim ol—wantaim sori pasin, hop, na siariti,” Jean B. Bingham, Rilif Sosaiti Jenerol Presiden i bin tok. “Dispela de bai kam taim yumi bai i gat gutpela save stret long lewa na bel bilong ol narapela lain na kamap gretful long gat marimari i kam long yumi—olsem tasol yumi givim i go ol siariti tingting na toktok long ol narapela. …
“Em i wok na privilis bilong yumi long holim pas ol samting bilong soim moa gut long olgeta lain taim yumi wok hat long kamap moa olsem Sevia bilong yumi.”3
Taim yumi karim ol hevi bilong wanpela narapela na holim pas ol kavanen bilong yumi, yumi opim wei long Jisas Krais long mekim olrait ol narapela lain. Elda Jeffrey R. Holland bilong Kwarom bilong Twelpela Aposol i tis olsem: “Taim yumi tingim dispela narakain samting olgeta em pe bilong Dai Bilong Bikpela Long Diwai Kros na Atonmen, mi promisim yu Em bai no inap long tanim baksait bilong Em long yumi nau. Taim Em i tok long ol dispela husat i puwa long Spirit, ‘Kam long mi,’ Em min olsem Em save long rot i go aut na Em i save long rot i go antap. Em i save long en bikos Em i bin wokabaut pinis long en. Em i save long rot bikos Em tasolem dispela rot.”4
Sampela narapela skripsa
Matthew 25:40; Galatians 6:2; Mosiah 2:17; 18:8–9
© 2017 ikam long Intellectual Reserve, Inc. Olgeta toktok hia i bilong sios tasol Printim long USA. Tok orait long Inglis: 6/17. Tok orait long tanim tokples: 6/17. Tanim tok bilong Visiting Teaching Message, December 2017. Tok Pisin. 97932 878