Ko ha Fakaʻapaʻapa mei he Meʻafakaʻeiki ʻo ʻEletā Robert D. Hales
6 ʻOkatopa 2017, Tāpanekale Sōlekí
ʻEletā M. Russell Ballard ʻo e Kōlomu ʻo e Kau ʻAposetolo ʻe Toko Hongofulu Mā Uá
“Te u ʻofa ki hoku kaungāmeʻa mamae ko Robert D. Hales. Kuó ma ngāue fakataha ʻeni ʻi ha taʻu ʻe 40 tupu ʻi ha ngaahi fatongia mo ha ngaahi kōmiti kehekehe ko ha ongo Taki Māʻolunga ʻo e Siasí. Kuó ma tangutu fakataha he Kōlomu ʻo e Toko Hongofulu Mā Uá ʻi he taʻu lahi ko ʻení. Te mau manatua e ngaahi fakakaukau vave ʻa ʻEletā Hales mo ʻene ngaahi tukuhua fakakata ʻi he taimi ʻe niʻihí. Te tau manatua kotoa foki … ʻene ngaahi faleʻi leleí mo ʻene ngaahi fakakaukau fakapotopotó. …
“Naʻe fuofua faingataʻaʻia ʻa Popi he mahaki mafú … ʻi ʻAokosi 1991 …
“Talu mei ai mo ʻene faʻa puke. ʻI he ngaahi taʻu lahi ko ʻeni kuó ma tangutu fakataha aí, kuó u fakamoʻoniʻi ʻa e loto-toʻa lahi mo e moʻui mateaki kakato ʻa Robert D. Hales. Kuo tuʻo lahi ʻeku kakapa atu, ala ki hono umá, mo puke hono nimá pea naʻá ku faʻa ongoʻi ʻa e mamahi mo e faingataʻaʻia naʻá ne aʻusiá. …
“Kuo hoko maʻu pē hoku kaungāmeʻa mamaé ko ha moʻungaʻi tangata kiate au, pea ʻoku ou ʻilo ʻokú ne fiemālie atu he taimí ni mo ʻene ongomātuʻa ʻofeiná, … kau mēmipa kehe ʻo e fāmilí, kae tautautefito ki heʻene foki ʻo fakataha mo ʻene Mātuʻa Fakalangí mo hono Fakamoʻuí, ko e ʻEiki ko Sīsū Kalaisí, ʻa ia kuó ne foaki līʻoa ʻene moʻuí ko ha taha ʻo ʻEne kau ʻAposetolo kuo filí.”
Palesiteni Russell M. Nelson, Palesiteni ʻo e Kōlomu ʻo e Kau ʻAposetolo ʻe Toko Hongofulu Mā Uá
“Naʻe hoko ʻa ʻEletā Hales ko ha mēmipa mahuʻinga ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi ha taʻu ʻe 23 tupu. He ʻikai lava ke tau fakasiʻia ʻene ngaahi tokoni ki he Siasí kotoa pea mo e mēmipa takitaha ʻo e Kōlomú. Naʻá ne feinga taʻetūkua ʻi heʻene ngāué. ʻI hono taʻu ʻe 42 mo e konga ko e Taki Māʻolungá, kuó ne ʻosi kau he meimei fakataha alēlea mo e kōmiti kotoa pē ʻi he Hetikuota ʻo e Siasí. Kuo tokoni lahi hono potó, ʻiló mo e ivi tākiekiná ki he laka ki muʻa e puleʻanga ʻo e ʻOtuá ʻi he funga ʻo e māmaní. …
“… Naʻá ne fakamahuʻingaʻi maʻu pē ʻene ʻofa mo e tokanga kia Melé, tokoni ki hono fāmilí mo e kau mēmipa ʻo e Siasí, pea hoko ko ha ākonga loto-toʻa ʻa e ʻEikí,
“ʻOku ʻiloa e loto-vilitaki ʻa Popi ʻi heʻene fehangahangai mo e ngaahi faingataʻa fakamoʻui leleí. Naʻá ne laka pē ki muʻa neongo e hōloa mo fakautuutu ange e faingataʻaʻia ne hoko ki hono sinó. Kuo mau fifili ʻi heʻemau vakai ki aí, pe naʻá ne lavaʻi fēfē nai ia? …
“… Kuo fakakakato ʻe ʻEletā Hales hono misioná ʻi he founga lelei tahá ʻaki e lototoʻa ʻa ha pailate vakapuna, ko e loto vilitaki ʻa ha tokotaha sipoti, ko e loto-fakatōkilalo mo e mateaki ʻa ha ākonga ʻa e ʻEikí. Kuó ne ikunaʻi e ngaahi sivi ʻo e moʻui fakamatelié pea kuó ne foki ki ʻapi mo e fakalangilangi māʻolunga tahá.”
Palesiteni Henry B. Eyring, Tokoni ʻUluaki ʻi he Kau Palesitenisī ʻUluakí
“Kuó u mātā ʻa ʻEletā Hales, ngāue fakataha mo ia mo ako meiate ia. Kuo mau feʻinasiʻaki ʻi ha ngaahi aʻusia naʻá ne akoʻi mo fakamālohia kimautolu pea siviʻi kimautolu ʻe ha niʻihi. Kuó u ako ʻi he meʻa kotoa pē meiate ia mo mamata ki he tupulaki hono mālohi fakalaumālié.
“ʻOku ʻi ai ha meʻafoaki ʻoku hangē ko ia pē ʻokú ne maʻú, talu ʻeku ʻiloʻi ia. Ko e meʻafoaki ia ʻo e hoko ko ha kaungāmeʻa moʻui mateaki kakató. Mahalo te ke pehē ko ha mālohi siʻisiʻi ia. Ka ʻoku fakalangilangiʻi ʻe he ʻEikí tonu ʻEne kau ʻAposetoló ʻaki ha ngaahi lea fakakaungāmeʻa. …
“… ʻOku fakamahinoʻi ʻe he ʻEikí e mālohi ʻe maʻu ʻe ha kaungāmeʻa pehē, ʻa ia ʻokú ne liʻaki e māmaní koeʻuhí ko e ngāue ʻa e ʻEikí:
“’Pea ʻilonga ia ʻe tali ʻa kimoutolú, te u ʻi ai foki mo au, he te u muʻomuʻa ʻi homou ʻaó. Te u ʻi homou nima toʻomataʻú pea ʻi homou toʻohemá, pea ʻe ʻi homou lotó ʻa hoku Laumālié, pea ʻe takatakai ʻa kimoutolu ʻe heʻeku kau ʻāngeló, ke poupouʻi hake ʻa kimoutolu” (T&F 84:88). …
“ʻOku ou fakatauange ʻe lau ʻe he hako ʻo ʻEletā Hales, mo kinautolu kotoa ʻoku ʻofa ʻiate iá, e ngaahi lea ko ia ʻa e ʻEikí ʻo hangē ko ia naʻe akoʻi ʻe Robert D. Hales, ko ha kaungāmeʻa mo ha ākonga moʻui mateaki kakato. …
“… Naʻá ku fakamoʻoniʻi ʻene ikunaʻi e ngaahi sivi ʻo ʻene moʻui mateakí ʻi he meʻa naʻá ne ʻilo ʻoku finangalo ki ai ʻa e ʻOtuá.”